ৰাষ্ট্ৰীয় ৰাজধানী দিল্লীত ক্ৰমাৎ গুৰুতৰ হৈ পৰা বায়ু প্ৰদূষণ নিয়ন্ত্ৰণৰ আবেদনৰ শুনানি গ্ৰহণ কৰি ভাৰতৰ মুখ্য ন্যায়াধীশ এন ভি ৰমনা নেতৃত্বাধীন উচ্চতম ন্যায়ালয়ৰ বিচাৰপীঠে Air Quality Index (AQI)ৰ বৰ্ধিত স্তৰৰ মোকাবিলা কৰিবলৈ কেইদিনমানৰ বাবে লকডাউনৰ দৰে জৰুৰী কালীন ব্যৱস্থা গ্ৰহণ কৰিব পাৰি নেকি বুলি প্ৰশ্ন কৰিছে কেন্দ্ৰীয় চৰকাৰক।
মুখ্য ন্যায়াধীশ ৰমনাই কেন্দ্ৰক কয়, “আমি কেনেকৈ AQI কমেও ২০০ পইণ্ট হ্ৰাস কৰিব পাৰোঁ আমাক কওঁক। কিছুমান জৰুৰী ব্যৱস্থা লওক। দুদিনৰ লকডাউন বা আন জৰুৰীকালীন উপায়ৰ কথা ভাবিব পাৰি নেকি? দিল্লীত বায়ুৰ মানদণ্ড গুৰুতৰ শ্ৰেণীত আছে আৰু ২ ৰ পৰা ৩ দিনৰ ভিতৰত ই আৰু হ্ৰাস পাব। জৰুৰীকালীন সিদ্ধান্ত লওক। আমি পিছত এটা দীৰ্ঘম্যাদী সমাধানৰ পথ চিন্তা কৰিম।”
উচ্চতম ন্যায়ালয়ে কয় যে বায়ু প্ৰদূষণে এক গুৰুতৰ পৰিস্থিতি উদ্ভৱ কৰিছে আৰু বায়ুৰ মানদণ্ডৰ অৱনতিৰ ফলত মানুহে আনকি ঘৰতো মাস্ক পিন্ধিবলৈ বাধ্য হৈছে।
তদুপৰি বিচাৰপীঠে দিল্লী চৰকাৰক স্মগ টাৱাৰ আৰু নিৰ্গমন নিয়ন্ত্ৰণ প্ৰকল্প স্থাপনৰ সিদ্ধান্তৰ প্ৰক্ৰিয়াৰ অগ্ৰগতি সম্পৰ্কেও প্ৰশ্ন কৰে।
বিচাৰপীঠে অৰবিন্দ কেজৰিৱাল নেতৃত্বাধীন আপ চৰকাৰক প্ৰদূষণৰ ক্ষেত্ৰত লোৱা প্ৰচেষ্টা সন্দৰ্ভত প্ৰশ্ন কৰে যে, “দিল্লী চৰকাৰে দিল্লীত সকলো বিদ্যালয় খুলি দিছে আৰু এতিয়া শিশুসকল প্ৰদূষণৰ সংস্পৰ্শলৈ আহিছে। এই বিষয়টো কেন্দ্ৰৰ নহয়, ৰাজ্য চৰকাৰৰ অধিকাৰক্ষেত্ৰ। সেই সন্দৰ্ভত কি ব্যৱস্থা লোৱা হৈছে?”
বায়ু প্ৰদূষণৰ মোকাবিলাৰ বাবে কি পদক্ষেপ গ্ৰহণ কৰিছে বুলি কেন্দ্ৰক প্ৰশ্ন কৰি বিচাৰপীঠে কয়, “কেন্দ্ৰীয় চৰকাৰে কয় যে নৰা জ্বলোৱাৰ বাবে ২ লাখ যন্ত্ৰ উপলব্ধ আৰু বজাৰত ২-৩ প্ৰকাৰৰ যন্ত্ৰ উপলব্ধ আছে কিন্তু কৃষকসকলে সেইবোৰ ক্ৰয় কৰিব নোৱাৰে। কেন্দ্ৰ/ৰাজ্য চৰকাৰে কৃষকসকলক এই যন্ত্ৰবোৰ কিয় প্ৰদান কৰিব নোৱাৰে?”
শীৰ্ষ ন্যায়ালয়ে কেন্দ্ৰীয় চৰকাৰক ৰাজনীতি আৰু চৰকাৰৰ বাহিৰত প্ৰদূষণৰ বিষয়টো গ্ৰহণ কৰিবলৈ নিৰ্দেশ দিয়ে।
আদালতে ১৫ নৱেম্বৰত বিষয়টোৰ পৰৱৰ্তী শুনানিৰ দিন ধাৰ্য কৰিছে।