সলনি হ’ল দেশৰ মুখ্য নিৰ্বাচন আয়ুক্ত আৰু তেওঁৰ সহযোগীসকল। প্ৰায় পাঁচ বছৰ পাৰ হৈ গ’ল। কিন্তু এইবাৰো নিৰ্বাচনী আচৰণ বিধি উলংঘা কৰাৰ বাবে প্ৰধানমন্ত্ৰী নৰেন্দ্ৰ মোদীৰ বিৰুদ্ধে ব্যৱস্থা গ্ৰহণৰ প্ৰশ্নত নিমাত হৈ পৰিছে নিৰ্বাচনী আয়োগ। প্ৰধানমন্ত্ৰীৰ বিৰুদ্ধে নিৰ্বাচনী আচৰণ বিধি উলংঘা কৰাৰ বাবে কংগ্ৰেছে কমেও ৬টা অভিযোগ দাখিল কৰাৰ ৪৮ ঘন্টা পাৰ হৈ গ’ল। এই পৰ্যন্ত আয়োগে এই সন্দৰ্ভত কোনো ব্যৱস্থা গ্ৰহণ কৰা নাই। কংগ্ৰেছ নেতৃত্বৰ প্ৰশ্ন, সকলো অভিযোগৰ ওপৰত নৰেন্দ্ৰ মোদী নেকি? কিয় প্ৰধানমন্ত্ৰীলৈ কাৰণ দৰ্শোৱাৰ জাননীও প্ৰেৰণ কৰা নহ’ল? অৱশ্যে এই সন্দৰ্ভত প্ৰত্যুত্তৰ দিয়াৰ পৰা বিৰত আছে আয়োগে।
পাঁচ বছৰ পূৰ্বে লোকসভা নিৰ্বাচনত প্ৰধানমন্ত্ৰী নৰেন্দ্ৰ মোদীৰ বিৰুদ্ধে নিৰ্বাচনী আচৰণ বিধি উলংঘাৰ কমেও ছটা অভিযোগ উত্থাপন হৈছিল। সকলো ক্ষেত্ৰতে অৱশেষত প্ৰধানমন্ত্ৰীয়ে ক্লীনচিট পালে। কিন্তু প্ৰধানমন্ত্ৰীক সেই ক্লীনশ্বীট দিয়াক লৈ মতানৈক্য স্পষ্ট হৈ পৰিল যেতিয়া নিৰ্বাচনৰ কিছুদিন পাছতে তিনিজন নিৰ্বাচন আয়ুক্তৰ ভিতৰত দ্বিতীয় স্থানত থকা নিৰ্বাচন আয়ুক্ত অশোক লাভাছাৰে পদত্যাগ কৰে। সূত্ৰ অনুসৰি লাভাছাই সেই সময়ত কেইবাটাও অভিযোগত প্ৰধানমন্ত্ৰীক ক্লীনচিট দিয়াৰ বিৰোধিতা কৰিছিল।
এইবাৰ এতিয়ালৈকে প্ৰথম পৰ্যায়ৰ নিৰ্বাচনহে সম্পূৰ্ণ হৈছে। প্ৰধানমন্ত্ৰীৰ বিৰুদ্ধে নিৰ্বাচনী আচৰণ বিধি ভংগ কৰাৰ ছটা অভিযোগ লৈ কালি নিৰ্বাচন আয়োগৰ কাষ চাপিছিল কংগ্ৰেছ।কংগ্ৰেছ দলৰ নেতা ৰণদীপ সুৰজেৱালাই কয় যে প্ৰধানমন্ত্ৰীয়ে ধৰ্মক নিজৰ ভাষণত টানি বিভাজনৰ ৰাজনীতি কৰিছে। কংগ্ৰেছে অভিযোগ কৰে যে মোদীয়ে ঘৃণাৰ ৰাজনীতি কৰি দুয়োটা সম্প্ৰদায়ৰ মাজত শত্ৰুতা আৰু মেৰুকৰণৰ কৌশল গ্ৰহণ কৰিছে।
কংগ্ৰেছে অভিযোগ কৰে যে জনপ্ৰতিনিধিত্ব আইনৰ অধীনত কোনো প্ৰাৰ্থীয়ে ধৰ্ম, জাতি, সম্প্ৰদায় বা ভাষাৰ ভিত্তিত নিজৰ মাজত ঘৃণা বিয়পাব নোৱাৰে। কিন্তু মোদীয়ে প্ৰচাৰৰ আৰম্ভণিৰে পৰাই ঘৃণামূলক ভাষণক নিজৰ আহিলা হিচাপে ব্যৱহাৰ কৰি আহিছে। যিটো কংগ্ৰেছৰ মতে শাস্তিযোগ্য অপৰাধ। কিন্তু নিৰ্বাচন আয়োগে প্ৰধানমন্ত্ৰীৰ বিৰুদ্ধে ব্যৱস্থা লোৱাটো দূৰৰ কথা, কাৰণ দেখুৱাৰ জাননীও প্ৰেৰণ কৰিব নোৱাৰিলে। ইয়াৰ ফলস্বৰূপে নিৰ্বাচনী প্ৰক্ৰিয়াৰ অখণ্ডতা ধ্বংস হোৱা বুলি দাবী কৰি আয়োগক প্ৰয়োজনীয় ব্যৱস্থা গ্ৰহণ কৰিবলৈ অনুৰোধ জনাইছে। এই সন্দৰ্ভত সোধাত আয়োগে কয় যে আয়োগে এই সন্দৰ্ভত কোনো মন্তব্য নকৰে।
