ৰাজনৈতিক দলসমূহে যে একমাত্ৰ ক্ষমতাৰ বাবেহে ৰাজনীতি কৰে সেয়া ৰাজ্যৰ ৰাজনীতিত পুনৰ এবাৰ প্ৰমাণিত হ’ল এ আই য়ু ডি এফ আৰু য়ু পি পি এলৰ মিত্ৰতাই। আগন্তুক লোকসভা নিৰ্বাচনত কোকৰাঝাৰ সমষ্টিৰ পৰা য়ু পি পি এলৰ প্ৰাৰ্থী উৰ্খাও ব্ৰহ্মৰ বিজয় নিশ্চিত কৰাৰ বাবেই দলটোৱে মিত্ৰতাত আৱদ্ধ হ’ল এ আই য়ু ডি এফৰ সৈতে।
বুধবাৰে গুৱাহাটীৰ হাতীগাঁওস্থিত হোটেল গ্ৰেণ্ড মেজিষ্ট্ৰিত দুয়োটা দলে যৌথভাৱে এখন সংবাদমেলৰ আয়োজন কৰি এই কথা ঘোষণা কৰে। এ আই য়ু ডি এফৰ সাধাৰণ সম্পাদক আমিনুল ইছলাম আৰু য়ু পি পি এলৰ উপ-সভাপতি ৰণগৌৰা নাৰ্জাৰীয়ে সংবাদমেল সম্বোধন কৰি কয় যে হাগ্ৰামা মহিলাৰীৰ দল বি পি এফক পৰাস্ত কৰা আৰু উৰ্খাও ব্ৰহ্মক বিজয়ী কৰাৰ স্বাৰ্থতে দুয়োটা দলে এই মিত্ৰতাৰ পাশত আবদ্ধ হৈছো।
মিত্ৰতাৰ কথা আনুষ্ঠানিকভাৱে ঘোষণা কৰি কয় যে উন্নয়নৰ স্বাৰ্থত কোকৰাঝাৰত বি পি এফৰ প্ৰাৰ্থী প্ৰমীলা ৰাণী ব্ৰহ্মক পৰাস্ত কৰিবই লাগিব।
কোকৰাঝাৰত এ আই য়ু ডি এফে য়ু পি পি এলক সহায় কৰাৰ বিপৰীতে ধুবুৰী আৰু বৰুপেটা লোকসভা সমষ্টিত এ আই য়ু ডি এফৰ প্ৰাৰ্থীক সহায় কৰিব য়ু পি পি এলে।
আনহাতে মঙলদৈ সমষ্টি সন্দৰ্ভত দুয়োটা দলে ৰহস্যজনক স্থিতি অৱলম্বন কৰা পৰিলক্ষিত হয়। উল্লেখ্য যে মঙলদৈ সমষ্টিত এ আই য়ু ডি এফে প্ৰাৰ্থী দিয়াৰ পৰা বিৰত থকাৰ বিপৰীতে নিৰ্বাচনী যুঁজত অৱতীৰ্ণ হৈছে য়ু পি পি এল। সেয়ে সাংবাদিকে মঙলদৈ সমষ্টি সম্পৰ্কে এ আই য়ু ডি এফৰ স্থিতি কি হ’ব বুলি প্ৰশ্ন সোধাত সেয়া ৰাইজে নিৰ্ধাৰণ কৰিব বুলি আমিনুল ইছলামে মন্তব্য কৰে।
মঙলদৈ সমষ্টি সন্দৰ্ভত আমিনুল ইছলামে কয় যে দুয়োটা দলে ধুবুৰী, বৰপেটা আৰু কোকৰাঝাৰ সমষ্টিৰ বাবেহে বুজাবুজি কৰিছো। মঙলদৈ সম্পৰ্কে একো সিদ্ধান্ত লোৱা নাই। সেয়ে মঙলদৈত কোন প্ৰাৰ্থীক ভোট দিব সেয়া ভোটাৰ ৰাইজে সিদ্ধান্ত ল’ব বুলি কয় ইছলামে।
সেয়া যি কি নহওক, কোকৰাঝাৰ সমষ্টিৰ বাবে দুয়োটা দলৰ মিত্ৰতাই এতিয়া স্বাভাৱিকতে শলঠেকত পেলাব বি পি এফক। ইতিমধ্যে উৰ্খাও ব্ৰহ্ম প্ৰত্যাহ্বান হিচাপে ঠিয় দিছে বি পি এফৰ প্ৰাৰ্থী প্ৰমীলা ৰাণী ব্ৰহ্মৰ বিৰুদ্ধে। তদুপৰি সমষ্টিটোত অবড়োৰ প্ৰসংগৰে সাংসদ হোৱা নৱ শৰনীয়াইও প্ৰমীলা আৰু উৰ্খাওৰ বিৰুদ্ধে ব্যাপক ৰূপত চলাই আছে প্ৰচাৰ অভিযান।
এ আই য়ু ডি এফ-য়ু পি পি এলৰ মিত্ৰজোঁটৰ প্ৰাৰ্থী উৰ্খাও ব্ৰহ্ম, বৰ্তমানৰ সাংসদ নৱ শৰণীয়াৰ বিৰুদ্ধে হাগ্ৰামা নেতৃত্বাধীন বি পি এফে কি ৰণ কৌশল প্ৰস্তুত কৰে সেয়া সময়ত লক্ষ্যণীয় হ’ব।
