চলিত লোকসভা নিৰ্বাচনত বিজেপিয়ে মিত্ৰ অগপক কম আসন দি ঠগা বুলি আঞ্চলিক দলটোৰ বহু সমৰ্থকে ক্ষোভ প্ৰকাশ কৰিলেও, এক বিপৰীত ছবিহে মঙলবাৰে প্ৰকাশ কৰিছে ৰঞ্জিত দাসে।
গেৰুৱা দলটোৰ ৰাজ্যিক সভাপতিজনৰ মতে অগপই বিচৰাতকৈয়ো বেছি আসনহে এৰি দিছে বিজেপিয়ে।
অসমত ভোটগ্ৰহণ সমাপ্ত হোৱা নিৰ্বাচনটোত তিনিখন আসনত প্ৰতিদ্বন্দ্বিতা কৰা আঞ্চলিক দলটোৱে আচলতে, দাসৰ মতে, দুটা সমষ্টিহে বিচাৰিছিল।
“লোকসভা নিৰ্বাচনত এ’ জি পিয়ে মাত্ৰ দুটা ছীট বিচাৰিছিল– বৰপেটা আৰু কলিয়াবৰ। আামি তেওঁলোকক ধুবুৰীৰ আসনখনো দি দিছো,” বিজেপি নেতাজনে কয়।
আনহাতে ধুবুৰী সমষ্টিত বিজেপিৰ প্ৰত্যেকটো ভোট অগপই পাইছে বুলিও দাবী কৰে দাসে।
“আমি নিজাববীয়াকৈ ধুবুৰীৰ আসনখন দখল কৰিব নোৱাৰিলোহেঁতেন। ধুবুৰীত বিজেপি ভোটৰ ১০০ শতাংশই অগপই পাইছে,” দাসে জনায়।
নিৰ্বাচনটোত ৩টা সমষ্টিত প্ৰতিদ্বন্দ্বিতা আগবঢ়োৱা অগপই ১০খন আসনত গেৰুৱা দলক সমৰ্থন কৰিছিল। বাকী কোকৰাঝাৰত আছিল মিত্ৰজোঁটৰে বি পি এফ প্ৰাৰ্থী প্ৰমিলাৰাণী ব্ৰহ্ম।
আনহাতে ধুবুৰীত ১০০ শতাংশ বিজেপি ভোট মিত্ৰ অগপই পোৱা বুলি দাসে দাবী কৰাৰ বিপৰীতে অসম আন্দোলনৰ সৃষ্টি অগপৰ নাগৰিকত্ব বিধেয়ক-বিৰোধী বহু ভোট কংগ্ৰেছমুখী হোৱাৰ সম্ভাৱনাও আছে।
আঞ্চলিক দলটোৰ প্ৰতিষ্ঠাপক তথা অসমৰ বাহিৰত দলটোৰ একমাত্ৰ মুখ, প্ৰাক্তন মুখ্য মন্ত্ৰী প্ৰফুল্ল মহন্ত স্পষ্টভাৱে নিৰ্বাচনী প্ৰচাৰৰ পৰা আঁতৰি আছিল।
বিধেয়ক-বিৰোধিতাক নিৰ্বাচনৰ “বিষয়”ৰূপে ল’বলৈ আহ্বান জনায় মহন্তই নিজে ভোট দিয়াৰ পৰা বিৰত আছিল।
বিতৰ্কিত বিধেয়কখনৰ প্ৰশ্নত যোৱা জানুৱাৰিত মিত্ৰতা ভাঙি মাত্ৰ কেইমাহমানতে পুনৰ জোঁট বন্ধাক লৈ নিৰ্বাচনৰ প্ৰাক মুহূৰ্তত কেইবাজনো নেতাই আঞ্চলিক দলটো ত্যাগ কৰিছিল। বহুতক বহিষ্কাৰ আৰু আনকি কেইবাখনো আঞ্চলিক সমিতিক কাৰণ দৰ্শোৱাৰ জাননী দিব লগা হৈছে অগপৰ “শীৰ্ষ” নেতৃত্বই।
বিধেয়ক বিষয়টোৰ অৱশ্যে এতিয়াও কোনো সমাধান সূত্ৰ ওলোৱা নাই আৰু তাৰ বিপৰীতে বিজেপিয়ে বিধেয়ক গ্ৰহণৰ ৰাষ্ট্ৰীয় সংকল্পৰেৰে এই নিৰ্বাচনত অৱতীৰ্ণ হৈছে।
