১১ এপ্ৰিলত অনুষ্ঠিত হ’বলগীয়া যোৰহাট লোকসভা সমষ্টিৰ নিৰ্বাচনী প্ৰস্তুতিৰ মঙলবাৰে বুজ লয় নিৰ্বাচন আয়োগৰ সাধাৰণ পৰ্য্যৱেক্ষক ৰঞ্জিত কুমাৰ সিনহাই।
প্ৰস্তুতিৰ বুজ ল’বলৈ কৰা শিৱসাগৰ ভ্ৰমণকালত ভাৰতীয় প্ৰশাসনিক সেৱাৰ বিষয়াগৰাকীয়ে জিলা উপায়ুক্ত তথা নির্বাচনী বিষয়া এছ লক্ষ্মণনকে ধৰি নিৰ্বাচনী কোষৰ বিষয়াসকলৰ সৈতে আলোচনাত মিলিত হয়।
জিলাখনত মুক্ত, নিকা আৰু শান্তিপূৰ্ণ নিৰ্বাচনী প্ৰক্ৰিয়া নিশ্চিত কৰাৰ বাবে সকলো বিষয়াকে দায়িত্ব সহকাৰে কামত মনোনিৱেশ কৰিবলৈ তেওঁ আহ্বান জনায়। যোৰহাট লোকসভাৰ অধীনত শিৱসাগৰ জিলাৰ অন্তৰ্গত সমষ্টিকেইটা হৈছে ১০৩ নং আমগুৰি, ১০৭ নং থাওৰা আৰু ১০৮ নং শিৱসাগৰ বিধানসভা সমষ্টি।
বৈঠকত জিলা উপায়ুক্ত লক্ষ্মণনে তিনিওটা বিধানসভা সমষ্টিত নিৰ্বাচনী প্ৰস্তুতি সন্দৰ্ভত এক চমু বিৱৰণ আগবঢ়োৱাৰ পিছতে আৰক্ষী অধীক্ষক অমিতাভ সিনহাই আগন্তুক নিৰ্বাচনক কেন্দ্ৰ কৰি গ্ৰহণ কৰা নিৰাপত্তামূলক ব্যৱস্থা সম্পৰ্কে পৰ্য্যৱেক্ষকগৰাকীক অৱগত কৰে।
তাৰোপৰি পৰ্য্যৱেক্ষকগৰাকীয়ে নিৰ্বাচন প্ৰক্ৰিয়াৰ লগত জড়িত সকলো কোষো পৰিদৰ্শন কৰে।
তেওঁ লগতে জনায় যে ১২ নং যোৰহাট লোকসভা সমষ্টিৰ যিকোনো নিৰ্বাচনী অভিযোগ সন্দৰ্ভত যোৰহাট আৱৰ্ত ভৱনৰ ২নং কোঠাত পুৱা ১০ বজাৰ পৰা ১১ বজাৰ ভিতৰত তেওঁক সাক্ষাৎ কৰিব পাৰিব।
তেওঁৰ ম’বাইল নং ৬৯০০৪৪৭৬৮৮ আৰু ই মে’ইল [email protected]তো ৰাইজে যোগাযোগ কৰিব পাৰিব বুলি বিষয়াগৰাকীয়ে জানিবলৈ দিয়ে।
