অসমৰ প্ৰধান ৰাজনৈতিক আঞ্চলিক দল অসম গণ পৰিষদ চমুকৈ অগপই লোকসভা নিৰ্বাচনলৈ প্ৰস্তুতি আৰম্ভ কৰা পৰিলক্ষিত হৈছে। বিজেপি নেতৃত্বাধীন ৰাজ্য চৰকাৰৰ অন্যতম অংশীদাৰী দল অগপই লোকসভা নিৰ্বাচন সন্দৰ্ভত আজি আমবাৰীস্থ কেন্দ্ৰীয় কাৰ্যালয়ত এখন বৰ্ধিত কেন্দ্ৰীয় কাৰ্যনিৰ্বাহক বৈঠকৰ আহ্বান জনাইছে।
অগপৰ সভাপতি তথা ৰাজ্য চৰকাৰৰ কৃষি বিভাগৰ মন্ত্ৰী অতুল বৰাৰ সভাপতিত্বত অনুষ্ঠিত হ’বলগীয়া বৈঠকত জানিব পৰা মতে আগন্তুক লোকসভা নিৰ্বাচনত দলে কোন কোন সমষ্টিত প্ৰতিদ্বণ্ডিতা আগবঢ়াব তাকে লৈ বিস্তৃতভাৱে আলোচনা কৰিব।
দলটোৰ এক শীৰ্ষ সূত্ৰৰ পৰা জানিব পৰা অনুসৰি ৰাজ্যৰ চৈধ্যতা লোকসভা সমষ্টিৰ ভিতৰত পাঁচটা সমষ্টিত দলে প্ৰতিদ্বণ্ডিতা আগবঢ়োৱাৰ বাবে আজিৰ বৈঠকতে অনানুষ্ঠানিকভাৱে সিদ্ধান্ত গ্ৰহণ কৰাৰ সম্ভাৱণা আছে। কোন পাঁচটা সমষ্টিত প্ৰতিদ্বণ্ডিতা কৰিব বা প্ৰাৰ্থী কোন হ’ব সেয়া এতিয়াও চূড়ান্ত হোৱা নাই বুলি জানিব পৰা যায়।
উল্লেখ্য যে বিজেপিৰ ৰাষ্ট্ৰীয় অধ্যক্ষ অমিত শ্বাহে ইতিমধ্যে অগপৰ সৈতে মিত্ৰতা সমাগত লোকসভা নিৰ্বাচনলৈ অক্ষুণ্ণ থাকিব বুলি ঘোষণা কৰি থৈছে। সেয়ে অগপয়ো মিত্ৰতা ৰক্ষাৰ স্বাৰ্থত পাঁচটা সমষ্টিত প্ৰতিদ্বণ্ডিতাৰ মন মেলিছে। অৱশ্যে বিজেপিয়ে এই ক্ষেত্ৰত কি সিদ্ধান্ত গ্ৰহণ কৰে সেয়া লক্ষ্যণীয় হ’ব।
আনহাতে কিছুদিন পূৰ্বে মুখ্য মন্ত্ৰী সোণোৱালৰ নেতৃত্বত গুৱাহাটী মহানগৰীৰ ৰাধাগোবিন্দ বৰুৱা পথ সংলগ্ন মন্ত্ৰী ড০ হিমন্ত বিশ্ব শৰ্মাৰ বাসগৃহত অগপ সভাপতি অতুল বৰা, কাৰ্যকৰী সভাপতি কেশৱ মহন্ত আৰু কেবিনেট মন্ত্ৰী ফণীভূষণ চৌধুৰীৰ মাজত এখন গুৰুত্বপূৰ্ণ বৈঠক অনুষ্ঠিত হৈছিল।
এনেদৰে গোপনীয়তা বজাই ৰাখি কৰা আলোচনাৰ পাছত আজি অগপই বৰ্ধিত কাৰ্যনিৰ্বাহক অনুষ্ঠিত কৰাটো অতি চিন্তনীয় তথা তাৎপৰ্যপূৰ্ণ বিষয় হৈ পৰিছে। আনহাতে আজিৰ বৈঠকত এন আৰ চি আৰু আগন্তুক পঞ্চায়ত নিৰ্বাচন সন্দৰ্ভতো আলোচনা হোৱাৰ সম্ভাৱণা আছে।