অষ্ট্ৰেলিয়াৰ বিমান পৰিহবণ কোম্পানি কৌনটাছে বিৰতি নোহোৱাকৈ দীৰ্ঘতম দূৰত্ব যাত্ৰী কঢ়িওৱাৰ এটা সফল পৰীক্ষা সম্পন্ন কৰিছে।
কোম্পানিটোৰ বয়িং ৭৮৭-৯ বিমানখনে ৪৯জন মানুহক লৈ আমেৰিকাৰ নিউ য়ৰ্কৰ পৰা অষ্ট্ৰেলিয়াৰ ছিডনিলৈ ১৬,২০০ কিলোমিটাৰ পথ ১৯ ঘণ্টা আৰু ১৬ মিনিটত সম্পূৰ্ণ কৰে।
এইটো আছিল এতিয়ালৈকে যিকোনো বাণিজ্যিক যাত্ৰীবাহী বিমানে মাজত নোৰোৱাকৈ কৰা দীৰ্ঘতম যাত্ৰা।
কেইবাটাও সময় মণ্ডলৰ ওপৰেৰে কৰা বিমান যাত্ৰাটোৱে পাইলট, বিমানকৰ্মী আৰু যাত্ৰীৰ শৰীৰৰ ওপৰত কি প্ৰভাৱ পেলায়, তাৰ গৱেষণা কৰা হৈছিল।
পৰৱৰ্তী মাহত লণ্ডনৰ পৰা ছিডনিলৈ অবিৰত যাত্ৰা কৰাৰ পৰিকল্পনা কোম্পানিটোৰ। বিৰামহীন দীৰ্ঘ বিমান যাত্ৰাৰ জৰিয়তে খৰচ কমাব পৰা যাব নেকি তাৰো পৰীক্ষা কৰা হ’ব।
বি বি চিৰ বাতৰি এটাত প্ৰকাশ যে কোম্পানিটোৱে এই পথকেইটাৰে অবিৰত বিমান যাত্ৰা কৰিব নে নকৰিব ২০১৯ চনৰ শেষলৈ তাৰ এটা সিদ্ধান্ত লোৱাৰ আশা কৰিছে।
বাতৰিটো একোৱা হৈছে যে কোনো বাণিজ্যিক বিমানে এতিয়ালৈকে সম্পূৰ্ণ যাত্ৰী আৰু মালবস্তুৰ বোজা লৈ ইমান দীঘলীয়া বিৰতিহীন যাত্ৰা কৰা নাই।
যদি সকলো ঠিক থাকে এই বাণিজ্যিক বিমান সেৱা ২০২২ বা ২০২৩ চনত আৰম্ভ কৰিব পৰা যাব, বাতৰিটোত কোৱা হয়।
মাজত তেল ভৰোৱাৰৰ বাবে যাতে ৰ’ব লগীয়া নহয়, তাৰ বাবে বিমানখনে এই যাত্ৰাটোত সৰ্বোচ্চ ক্ষমতাৰ পৰিমাণৰ তেল ভৰাই লৈছিল। সীমিত টাল-টোপোলাৰ বাদে মালবস্তু নিয়া নাছিল বিমানখনে।
আনহাতে যাত্ৰীসকলে যাতে অস্বস্তিৰ পৰা সকাহ পায় তাৰ বাবে তেওঁলোকৰ ঘড়ীবোৰ ছিডনিৰ সময়ৰ সৈতে মিলাই লৈছিল আৰু পূব অষ্ট্ৰেলিয়াত ৰাতি হোৱাৰ সময়লৈকে তেওঁলোকক সাৰে থাকিবলৈ দিয়া হৈছিল।
তাৰ ছঘণ্টাৰ পিছত তেওঁলোকক প্ৰচুৰ কাৰ্ব’হাইড্ৰেট থকা আহাৰ খুওৱা হৈছিল আৰু তেওঁলোকৰ টোপনি আহিবৰ বাবে পোহৰ ক্ষীণ কৰি দিয়া হৈছিল।
বিমানৰ ভিতৰত কৰা পৰীক্ষাবোৰৰ ভিতৰত আছিল পাইলটনৰ মগজুৰ তৰংগ, মেলেটনিন হৰম’নৰ স্তৰ, সজাগতা নিৰীক্ষণ আৰু লগতে যাত্ৰীৰ বাবে ব্যায়াম আদিৰ ব্যৱস্থা কৰা হৈছিল।
“এইটো সঁচাকৈয়ে এটা তাৎপৰ্য্যপূৰ্ণ বিমান যাত্ৰা। আশা কৰো এইটো এটা নিয়মীয়া সেৱাৰ পূৰ্বদৰ্শন, যিটোৱে মানুহে পৃথিৱীখনৰ এটা ফালৰ পৰা আনটো ফাললৈ যোৱাটোক দ্ৰুত কৰি তুলিব”, কৌনটাছ গ্ৰুপৰ মুখ্য কাৰ্য্যবাহী বিষয়া এলান জইছে কয়।
এতিয়ালৈকে ছিংগাপুৰ এয়াৰলাইনছে ছিংগাপুৰৰ পৰা নিউয়ৰ্কলৈ চলোৱা বিমানসেৱাই আটাইতকৈ দীৰ্ঘতম বিমানযাত্ৰা। এই বিমানে ১৫৩৪৪ কিলোমিটাৰ পথ ১৮ ঘণ্টা আৰু ২৫ মিনিটত সম্পূৰণ কৰে।
