আমেৰিকাৰ লছ এঞ্জেলছৰ বনজুই নতুন নতুন অঞ্চললৈ বিয়পি পৰিছে। লছ এঞ্জেলছৰ অগ্নিনিৰ্বাপক বাহিনীৰ মুৰব্বী ক্ৰীষ্টিন এম ক্ৰ’লিয়ে জনায় যে অগ্নিনিৰ্বাপক বাহিনীৰ লোকসকল জুই নিয়ন্ত্ৰণ কৰিবলৈ সংগ্ৰাম কৰি ক্লান্ত হৈ পৰিছে।
ক্ৰ’লিয়ে কয় যে আমাৰ অগ্নিনিৰ্বাপক বাহিনীয়ে নিজৰ সাধ্য অনুসৰি কাম কৰি আছে। ভাগৰুৱা হৈ পৰিছে। কিন্তু তেওঁলোকে হাৰ নামানে।
লছ এঞ্জেলছ আৰু ভেলটুৰা কাউন্টিৰ সীমান্তৱৰ্তী কেনেথ অঞ্চললৈ এই বনজুই বিয়পি পৰিছে। বৃহস্পতিবাৰে সন্ধিয়া অঞ্চলটোত বনজুই বিয়পি পৰে। কেইঘণ্টামানৰ ভিতৰতে প্ৰায় ১০০০ একৰ এলেকাত জুই বিয়পি পৰে। লছ এঞ্জেলছ কাউন্টিৰ অগ্নিনিৰ্বাপক বাহিনীৰ মুৰব্বী জন অ’ব্ৰাইনে কয় যে অগ্নিনিৰ্বাপক বাহিনীৰ সংখ্যা বৃদ্ধি কৰা হৈছে।
কালি স্থানীয় সময় অনুসৰি পুৱা ৪ বজালৈকে পাঁচটা অঞ্চলত জুই বিয়পিছিল। ইয়াৰ পৰা ১ লাখ ৩৭ হাজাৰৰো অধিক লোকে ঘৰ এৰি পলায়ন কৰিছে। এতিয়ালৈকে কমেও পাঁচজন লোকে প্ৰাণ হেৰুৱাইছে আৰু বহু আহত হৈছে।
শেহতীয়া খবৰ অনুসৰি পালিছাডছ অঞ্চলত সৰ্বাধিক বনজুই বিয়পিছে। ইটন অঞ্চলত জ্বলি আছে দ্বিতীয় বৃহত্তম বনজুই। ছানচেট, হাৰ্ষ্ট আৰু লিডিয়া অঞ্চলত এতিয়াও জুই জ্বলি আছে।
ইপিনে, শুকুৰবাৰে বন্ধ কৰা হৈছে লছ এঞ্জেলছৰ সকলো বিদ্যালয়। কাইলৈ, শনিবাৰেও বন্ধ থাকিব বিদ্যালয়। এলেকাৰ তত্বাৱধায়ক আলবাৰ্টো এম কাৰ্ভালোৱে কয় যে ছাত্ৰ-ছাত্ৰীৰ শ্ৰেণী ডিজিটেল প্ৰযুক্তিৰে চলিব। তেওঁ কয় যে বায়ুৰ গুণাগুণ পুনৰীক্ষণ কৰি পৰৱৰ্তী সিদ্ধান্ত গ্ৰহণ কৰিব কৰ্তৃপক্ষই।
লছ এঞ্জেলছ কাউন্টিৰ শ্বেৰিফ ৰবাৰ্ট লুনাই কয় যে বনজুইৰ পৰিস্থিতি নিয়ন্ত্ৰণ কৰিবলৈ নেশ্যনেল গাৰ্ড সাজু। পেচিফিক পেলিছাডছ আৰু ইটন অঞ্চলত নেশ্যনেল গাৰ্ড মোতায়েন কৰা হৈছে। শ্বেৰিফে কয় যে এই অঞ্চলসমূহত কাৰ্ফিউ বলবৎ হ’ব পাৰে।
ইটন অঞ্চলত সংঘটিত হোৱা অগ্নিকাণ্ডত ৫ হাজাৰৰো অধিক আন্তঃগাঁথনি জ্বলি গৈছে। লছ এঞ্জেলছ কাউন্টি অগ্নিনিৰ্বাপক বাহিনীৰ চীফ ডেপুটি-জন অ’ব্ৰাইনে এই তথ্য প্ৰদান কৰে।
এপিনে সকলো জুইত জ্বলি ছাই হৈ পৰিছে। আনহাতে, লুণ্ঠন চলি আছে। লছ এঞ্জেলছৰ মেয়ৰ বাছে কয় যে নেশ্যনেল গাৰ্ডৰ সদস্যসকলে ক্ষতিগ্ৰস্ত অঞ্চলসমূহ সুৰক্ষিত কৰাৰ বাবে কাম কৰি আছে। তেওঁ লুণ্ঠনকাৰীসকলৰ বিৰুদ্ধে শূন্য সহনশীলতা ঘোষণা কৰে।
যোৱা মঙলবাৰৰ পৰা আমেৰিকাৰ কেলিফৰ্ণিয়াৰ লছ এঞ্জেলছ কাউন্টিত বনজুই আৰম্ভ হৈছিল।
