ফুলি থকা পদুমৰ পাহিবোৰ দেখি আপোনাৰো মন পুলকিত হৈ উঠিব; ৰাজ্যৰ ক’ত আছে এইটো পদুম পুখুৰী?

বিলত তিৰবিৰাইছে পদুমৰ পাহিয়ে! বৰষুণ এৰাৰ পিচত সূৰ্যৰ হেঙুলীয়া কিৰণত খিলখিলাই হাঁহিছে বতাহত হালিজালি খেলি থকা ফুলৰ ৰাণী পদুমৰ পাহিবোৰে।

পুদুম ফুলেৰে ভৰি থকা এই পুখুৰীটোৰ ওচৰলৈ গ’লে প্ৰতিগৰাকী লোকে যেন আপোনা-আপনি গুণগুণাব গীতিকাৰ কমলানন্দ ভট্টাচাৰ্য দেৱে ৰচনা কৰা সেই জনপ্ৰিয় গীতটি-

“বিলত তিৰেবিৰাই পদুমৰ পাহি অই, পাতত তিৰেবিৰাই পানী, ৰ’দত তিৰেবিৰাই জিঞাৰে পাখি অই, ফুলনীত ফুলৰে ৰাণী”৷

গোৱালপাৰাৰ মৰনৈত প্ৰকৃতিৰ সমাহাৰ ৷ অসমৰ দ্বিতীয় সৰ্ববৃহৎ পুখুৰীত ফুলি উঠা শ শ পদুম ফুলে প্ৰকৃতি প্ৰেমিক দিছে অনাবিল আনন্দ ৷

পুখুৰীটোত এতিয়া মাথোঁ সৌন্দৰ্য্যৰ সমাহাৰ ৷ পদুম ফুলেৰে ভৰপূৰ এই পুখুৰীটোৰ নান্দনিক দৃশ্য উপভোগ কৰিবলৈ পুৱা আবেলি ভিৰ কৰিছে বহু প্ৰকৃতি প্ৰেমীয়ে ৷

প্ৰবাদ আছে কুমাৰ ভাস্কৰ বৰ্মাৰ দিনতে ঐতিহাসিক শ্ৰী শ্ৰী সূৰ্য পাহাৰৰ পূৱ দিশত খন্দা হৈছিল আজিৰ এই পদুম পুখুৰীটো ৷

কুমাৰ ভাস্কৰ বৰ্মাৰ দিনৰে পৰা পুখুৰীটো সজীৱ হৈ আছে পদুম ফুলেৰে৷ এতিয়া যান্ত্ৰিকতাৰ মাজতে পুখুৰীৰ নান্দনিক দৃশ্য চাই পুলকিত হৈছে প্ৰতিজন ব্যক্তি ৷

অঞ্চলটোৰ গৌৰৱ পুদুম পুখুৰীটো বহু সম্ভাৱনা থকাৰ পিছতো যেন আজি অৱহেলিত, অনাদৃত ৷

মৰনৈৰ উদ্যোগিক বিকাশ কেন্দ্ৰৰ ভিতৰুৱা এই ঐতিহাসিক পদুম পুখুৰী ৷

বন্যহস্তীৰ ক’ৰিডৰ এই অঞ্চলত উদ্যোগ স্থাপনৰ সলনি ঐতিহাসিক এই পুখুৰীটো সংৰক্ষণ কৰি পৰ্যটন কেন্দ্ৰ গঢ়ি তোলাৰ বাবে ৰাইজে দাবী কৰি আহিছে যদিও চৰকাৰ-প্ৰশাসনে আজিলৈকে কোনো গুৰুত্ব প্ৰদান নকৰিলে ৷

শিৱসাগৰৰ জয়সাগৰৰ পিচতে ইতিহাস প্ৰসিদ্ধ অসমৰ দ্বিতীয় সৰ্ববৃহৎ এই পুখুৰীক মৰনৈবাসীয়ে সংৰক্ষণৰ দাবী কৰিছে ৷