মাত্ৰ এখন মেচত জয়ী হ’লেই অলিম্পিক খেলাৰ সুযোগ পাব লাভলিনাই
মাত্ৰ এখন মেচত জিকিলেই অলিম্পিক খেলাৰ সপোন বাস্তৱায়িত হ’ব অসমৰ লাভলিনা বৰগোহাঁইৰ। মেচখনত জয়ী হ’লে তেওঁ ৬৯ কেজি শাখাত টকিঅ’ অলিম্পিকলৈ যোগ্যতা অৰ্জন কৰিব।
সম্প্ৰতি জৰ্ডানৰ আম্মানত চলি আছে এছিয়ান অলিম্পিক কোৱালিফায়িং বক্সিং টুৰ্ণামেণ্ট। এই টুৰ্ণামেণ্টৰ ছেমি ফাইনেলত প্ৰৱেশ কৰা প্ৰতিগৰাকী বক্সাৰে অলিম্পিকলৈ যোগ্যতা অৰ্জন কৰিবলৈ সক্ষম হ’ব।
এই টুৰ্ণামেণ্টৰ ৬৯ কেজি শাখাত ভাগ লৈছে অসম কন্যা লাভলিনা বৰগোহাঁয়ে। প্ৰতিযোগিতাখনৰ সূচী অনুসৰি লাভলিনাৰ প্ৰথম মেচখনেই হ’ব কোৱাৰ্টাৰ ফাইনেল। ইয়াৰ অৰ্থ এইটোৱেই যে মেচখনত জয়ী হোৱা মানে অলিম্পিকলৈ যোগ্যতা অৰ্জন কৰিব লাভলিনাই।
যদিহে লাভলিনাই মেচখন জয়ী হয় তেন্তে অলিম্পিকত অংশ লোৱা অসমৰ প্ৰথমগৰাকী মহিলা বক্সাৰৰূপে পৰিগণিত হ’ব।
উল্লেখ্য যে বিশ্ব বক্সিং চেম্পিয়নশ্বিপত একেৰাহে দুবাৰ ব্ৰঞ্জৰ পদক পোৱা লাভলিনা বাছনি প্ৰক্ৰিয়াত নিজ শাখাত আছে দ্বিতীয় বাছনিত।
লাভলিনাৰ উপৰি ভাৰতৰ পূজা ৰাণী (৭৫ কেজি) আৰু ৯১ কেজি ঊৰ্দ্ধত সতীশ কুমাৰেও মাত্ৰ এখন মেচত জিকিলেই টকিঅ’ অলিম্পিকত খেলাৰ বাবে যোগ্যতা অৰ্জন কৰিব।