Lovlina Borgohain: ই-নিলামৰ মঞ্চত টকিঅ’ অলিম্পিকত স্বৰ্ণজয়ী নীৰজ চোপ্ৰাক অতিক্রমি আগবাঢ়ি ৰৈছে অসমৰ বক্সাৰ লাভলিনা বৰগোঁহাই।
প্ৰধানমন্ত্ৰী নৰেন্দ্ৰ মোদীয়ে যিবোৰ স্মাৰক উপহাৰ হিচাপে পাইছিল তাৰ ই-নিলামত তুলিছে প্ৰধানমন্ত্ৰীৰ কাৰ্যালয়ে।
এই নিলমাত অলিম্পিকত ব্ৰঞ্জ বিজয়ী লাভলিনা বৰগোঁহাইৰ গ্ল’ভছে স্বৰ্ণজয়ী নীৰজ চোপ্ৰাৰ জেভলিনকো অতিক্ৰম কৰিছে।
শুকুৰবাৰলৈকে লাভলিনাৰ গ্ল’ভছৰ দাম উঠিছে ১.৯কোটি টকা। ইয়াৰ বিপৰীতে নীৰজৰ জেভলিনৰ দাম উঠিছে ১.৫কোটি টকা।
আনহাতে, লাভলিনাৰ গ্ল’ভছৰ বেছ প্ৰাইচ নীৰজৰ জেভলিনৰ তুলনাত বহুখিন কম আছিল। লাভলিনাৰ গ্ল’ভছৰ বেছ প্ৰাইচ ৮০লাখ টকাৰ বিপৰীতে নীৰজৰ জেভলিনৰ আছিল ১ কোটি টকা। লাভলিনাৰ গ্ল’ভছৰ দাম ইয়াৰ বেছ প্ৰাইচৰ তুলনাত ইতিমধ্যে দুগুণ হৈছেই।
Latest News:অক্টোবৰৰ ১ তাৰিখৰ পৰা ৰাজ্যত আৰম্ভ হ’ব উচ্চতৰ মাধ্যমিকৰ বিশেষ পৰীক্ষা
ইপিনে, পেৰা অলিম্পিকত স্বৰ্ণজয়ী সুমিত অন্টিলৰ জেভলিনৰ বেছ প্ৰাইচো ১ কোটি টকা ৰখা হৈছিল। এতিয়া ইয়াৰ দাম উঠিছে ১কোটি ৭হাজাৰ টকা। মুঠতে সকলো পিনৰ পৰা আগবাঢ়ি আছে লাভলিনা।
প্ৰধানমন্ত্ৰীৰ কাৰ্যালয়ৰ এই ই-নিলাম বুধবাৰৰ পৰা আৰম্ভ হৈছে আৰু নিলামত প্ৰায় ১,৩০০টা সামগ্ৰী ৰখা হৈছিল।
নীৰজ, লাভলনিৰ সামগ্ৰীৰ উপৰি পেৰা অলিম্পিয়ান অৱনী লেখাৰাৰ পদক বিজয়ৰ সময়ত পৰিধান কৰা টি-ছাৰ্টটোও ৰখা হৈছিল। ইয়াৰ বেছ প্ৰাইচ ৰখা হৈছিল ২৫লাখ টকা।
টকিঅ’ অলিম্পিকত অংশগ্ৰহণ কৰা ভাৰতৰ সকলো খেলুৱৈয়ে স্বাক্ষৰ কৰা এটি ষ্ট’লো নিলামত ৰখা হৈছে। ইয়াৰ বেছ প্ৰাইচ ধাৰ্য কৰা হৈছে ৯০লাখ টকা। সেইদৰে যিখন ৰেকেটেৰে খেলি বেডমিন্টনত পিভি সিন্ধুৱে ব্ৰঞ্জৰ পদক লাভ কৰিছিল সেইখন সিন্ধুৰ স্বাক্ষৰৰ সৈতে নিলামত ৰখা হৈছে। তদুপৰি, ভাৰতীয় পুৰুষ আৰু মহিলা দলৰ খেলুৱৈসকলৰ হকী ষ্টিকো নিলামত ৰখা হৈছে।