BREAKING NEWS: সমগ্ৰ কোকৰাঝাৰ চহৰত বিয়পি পৰিছে ৰন্ধন গেছৰ উৎকট গোন্ধ, আতংকিত চহৰবাসী,ভয়ংকৰ দুৰ্ঘটনাৰ আশংকা
এক অভাৱনীয় পৰিস্থিতিৰ সৃষ্টি হৈছে কোকৰাঝাৰ চহৰত। কিছু সময় আগৰে পৰা সমগ্ৰ কোকৰাঝাৰ চহৰতে বিয়পি পৰিছে ৰন্ধন গেছৰ উৎকট গোন্ধ।
নৰ্থ ইষ্ট নাওলৈ কোকৰাঝাৰৰ পৰা বহু লোকে ফোন কৰি এই খবৰ দিছে।
চহৰ খনৰ বতাহত ক’ৰ পৰা হঠাতে এনেদৰে ৰন্ধন গেছ মিহলি হৈ পৰিছে সেয়া এতিয়াও ৰহস্য হৈয়ে আছে।
প্ৰশাসনৰ তৰফৰ পৰাও গেছ নিৰ্গমনৰ কাৰণ সন্দৰ্ভত কোনো কথা প্ৰকাশ কৰা হোৱা নাই। বতাহত ৰন্ধন গেছ মিহলি হৈ পৰাৰ ফলত ভয়ংকৰ দুৰ্ঘটনা সংঘটিত হোৱাৰ আশংকাত কম্পিত হৈছে চহৰবাসী।
আশংকা কৰা অনুসৰি চন্দ্ৰাপাৰাত থকা এলপিজি গুদামত গেছ লীক হোৱা বাবেই বতাহত গেছ মিহলি হ’ব পাৰে।
অৱশ্যে এই বিষয়ত কোনেও সঠিককৈ একো ক’ব পৰা নাই। সবিশেষ বাতৰিৰ বাবে অপেক্ষা কৰা হৈছে।
ইপিনে কোকৰাঝাৰৰ জিলা প্ৰশাসনৰ সূত্ৰই আমাৰ সাংবাদিকৰ আগত প্ৰকাশ কৰা মতে এয়া ঢালিগাঁৱৰ বিআৰপিএল প্ৰকল্পৰ পৰা মিথেন গেছ নিৰ্গত হোৱাৰ ফলত হ’ব পাৰে।
নৰ্থ ইষ্ট নাওৰ তৰফৰ পৰা যোগাযোগ কৰাত কোকৰাঝাৰৰ উপায়ুক্ত বৰ্ণালী ডেকাই কয় যে গেছ লীক হোৱাৰ উৎসৰ সন্ধানত আৰক্ষী আৰু প্ৰশাসনৰ সকলো বিষয়া-কৰ্মচাৰী ব্যস্ত হৈ পৰিছে। এতিয়ালৈকে গেছ লীক হোৱাৰ উৎসৰ কোনো সন্ধান পোৱা হোৱা নাই।
বঙাইগাঁৱৰ পৰা বিআৰপিএলৰ এটা বিশেষজ্ঞৰ দলে কোকৰাঝাৰ অভিমুখে ৰাওনা হোৱা বুলি উপায়ুক্তগৰাকীয়ে জানিবলৈ দিয়ে। তেওঁ লগতে কয় যে দুৰ্যোগ প্ৰশমণৰ দলো সাজু কৰি ৰখা হৈছে।