উপ নিৰ্বাচনৰ প্ৰাকমুহূৰ্তত অসমৰ ৰাজনৈতিক বতাহ গৰম হৈ থকাৰ সময়তে আজি অজাপৰ সভাপতি লুৰিণ জ্যোতি গগৈ আৰু প্ৰদেশ কংগ্ৰেছৰ সভাপতি ভুপেন বৰাই যুটীয়াভাবে এখন সংবাদমেল অনুষ্ঠিত কৰে।
সংবাদমেলত প্ৰদেশ কংগ্ৰেছৰ সভাপতি বৰাই কয় ‘আমি ছয়টা সমষ্টিৰ ক্ষেত্ৰতেই ৰাজ্যিক সমিতিয়ে সিদ্ধান্ত লৈছিলো ।
থাওৰা , মৰিয়নি, গোসাঁই গাওঁ সমষ্টিৰ ajp ৰ বাবে মাজুলী আৰু ভৱানীপুৰ সমষ্টি ৰাইজৰ দললৈ দিছিলো৷ কিন্তু এই মুহুৰ্তলৈকে ৰাইজৰ দলে একো কোৱা নাই’৷
তেওঁ কয় যে —অখিল গগৈয়ে কৈছে মন মিলিছে সমষ্টি মিলা নাই৷
বৰাই সংবাদমেলতে স্পষ্টভাবে কয় যে মাজুলী সমষ্টি অসম জাতীয় পৰিষদ দলক এৰি দিছো৷
ভৱানীপুৰ সমষ্টিৰ বাবে হাইকামাণ্ডলৈ কোনো প্ৰাৰ্থীৰ নাম পঠিওৱা নাই বুলিও বৰাই উল্লেখ কৰে।
বৰাই কয়—’মোৰ আশা দুয়োটা দলৰ দুয়োগৰাকী সভাপতিয়ে এই সিদ্ধান্ত মানি ল’ব ৷ অখিল গগৈয়ে থাওৰা এৰি নিদিয়াৰ কথাটো আমাক কৈছে৷থাওৰাত আমাৰ দলে তিনিবাৰ জয়ী হৈছে৷আজিৰ তাৰিখত থাওৰাত আমাৰ স্থিতি সৱল৷মন মিলিলে বাকী কথা মিলাত সময় নালাগে৷থাওৰা সমষ্টি ৰাইজৰ দলক এৰি নিদিয়াৰ পোষকতা কৰিছে৷ আমাৰ মূল কথা আছিল এটা সমষ্টিত এজন প্ৰাৰ্থীৰ প্ৰসংগ৷ অসম জাতীয় পৰিষদক ছয়টা সমষ্টিৰ এটা সমষ্টি এৰি দিয়াৰ সিদ্ধান্ত লৈছিলো৷
ৰাইজৰ দলকো এটা সমষ্টি এৰি দিয়াৰ সিদ্ধান্ত লৈছিলো’৷
সংবাদমেলত লুৰিণজ্যোতি গগৈয়ে কয় —’আমি উপ নিৰ্বাচনত bjpক প্ৰতিহত কৰাৰ স্বাৰ্থত এটা সমষ্টিত এজন প্ৰাৰ্থীৰ পোষকতা কৰিছিলো৷ চৰকাৰে ইচ্ছা কৰিয়েই এনকাউণ্টাৰ আৰম্ভ কৰিছে৷ এজন দায়িত্বশীল মন্ত্ৰীয়ে কিবা এটা কোৱাৰ পাছত মুখ্যমন্ত্ৰীয়ে সেয়া সম্পূৰ্ণ সলনি কৰি দিয়ে৷ প্ৰদেশ কংগ্ৰেছে আমাৰ সিদ্ধান্তক সন্মান জনাইছে৷ এই সিদ্ধান্তক আমি আদৰণি জনাইছো’৷