লখিমপুৰ লোকসভা সমষ্টিৰ অন্তৰ্গত মাজুলী বিধানসভা সমষ্টিৰ ১৪টা দুৰ্গম ভোটকেন্দ্ৰলৈ আজি ই ভি এম-ভি ভি পি এ টি যন্ত্ৰসহ ৰাওনা হৈছে ভোটগ্ৰহণকাৰী বিষয়া-কৰ্মচাৰী আৰু নিৰাপত্তাৰক্ষীৰ দল। অহা ১১ এপ্ৰিলত সমষ্টিটোত প্ৰথম পৰ্যায়ৰ নিৰ্বাচন অনুষ্ঠিত হ’ব।
মাজুলীৰ আঁহতগুৰি আৰু দক্ষিণ আঁহতগুৰি গাঁও পঞ্চায়ত এলেকাৰ অন্তৰ্গত উক্ত ১৪টা ভোটকেন্দ্ৰ হৈছে- ১নং সাধু চাপৰি, ৭ নং মধ্য আঁহতগুৰি, ২নং বৰুৱাচুক, ৩নং আদৰ্শ এম ই স্কুল, ৪নং প্ৰগতি এম ই স্কুল, ৫নং হুটাৰ, ৬নং বুঢ়া চাপৰি, ১০নং চৰাই চাপৰি, ১১নং দলখোৱা এল পি স্কুল, ১২নং শালমৰাপাৰ, ১৩নং উজিৰআটি, ১৪নং ৰৌমাৰা, ১৫নং ভেকেলীমুগ এল পি স্কুল আৰু ৪২নং কাৰ্তিক চাপৰি ভোটকেন্দ্ৰ।
আজি মাজুলী জিলা সদৰৰ পৰা ৰাওনা হোৱা ভোটগ্ৰহণকাৰী দলসমূহৰ ভিতৰৰে সাধু চাপৰি আৰু মধ্য আঁহতগুৰি ভোটকেন্দ্ৰৰ দায়িত্বত থকা দলদুটাই নিশাটো লখিমপুৰ জিলাৰ বিহপুৰীয়াত থকা দেউৰী স্বায়ত্ব পৰিষদৰ অতিথিগৃহত ই ভি এম-ভি ভি পি এ টিসহ বাহৰ পাতি বুধবাৰে নিজ ভোটকেন্দ্ৰলৈ ৰাওনা হ’ব।
একেদৰে অৱশিষ্ট ১২টা ভোটকেন্দ্ৰৰ দায়িত্বত থকা প্ৰিজাইডিং-পোলিং বিষয়াৰ দলকেইটাই আজি নিশাটো দেৰগাঁৱস্থিত আৰক্ষী প্ৰশিক্ষণ কেন্দ্ৰৰ অতিথিশালাত বাহৰ পাতি কাইলৈ পুৱাই নিজ ভোটকেন্দ্ৰলৈ ৰাওনা হ’ব।
