নিয়মীয়াকৈ আই পি এল চাই থকা দৰ্শকে এতিয়া কেৱল মেচ চালেই নহ’ব, নিয়মীয়াকৈ যোগ-ব্যায়াম কৰি সুস্থ হৈয়ো থাকিব লাগিব। কিয়নো একেৰাহে এনে ৰুদ্ধশ্বাস মেচ চাবলৈ হ’লে হাৰ্ট সুস্থ থকা প্ৰয়োজন! শেষ বলটোৰ উত্তেজনাৰ কথা কোৱাৰ প্ৰয়োজনেই নাই।
এটা দলৰ শেষৰ পাঁচ অভাৰৰ ষ্ট্ৰাইক ৰেট আটাইতকৈ ভাল। আনটো দলৰ শেষ পাঁচ অভাৰত ইক’নমি ৰেট আটাইতকৈ বেয়া। প্ৰথম লক্ষ্ণৌ ছুপাৰ জায়েন্টছ। আনটো হৈছে ৰয়েল চেলেঞ্জাৰছ বাংগালুৰু।
এই দুটা দল মুখামুখি হোৱাৰ লগে লগে আশা কৰা ধৰণে উত্তজনাময় হৈ পৰিল মেচখনৰ শেষৰ পাঁচ অভাৰ। ৰাণৰ পাহাৰ গঢ়িও লক্ষ্ণৌৰ বেটছমেনৰ চমকৰ বাবে চিন্নাস্বামীত ইডেনৰ স্মৃতিৰ পুনৰাবৃত্তি কৰে ফেফ ডু প্লেছিছে। আনহাতে, লক্ষ্ণৌ ছুপাৰ জায়েন্টছৰ অধিনায়ক কে এল ৰাহুলৰ মুখত ফুটিল বিজয়ৰ হাঁহি।
আই পি এল মানেই হ’ল নেৰানেপেৰা বাউণ্ডেৰী-অভাৰ বাউণ্ডেৰীৰ ফুলজাৰি। বলাৰসকলে এই ক্ষেত্ৰত অগ্নিপৰীক্ষাৰ সন্মুখীন হ’ব লগা হয়। আৰু ফিল্ডাৰসকল যেন সাক্ষী গোপালহে। চিন্নাস্বামীও ইয়াৰ ব্যতিক্ৰম নাছিল।
টছ হেৰুৱাই প্ৰথমে বেটিং কৰাৰ পিছত বিৰাট কোহলীয়ে আক্ৰমণাত্মক ইনিংছ খেলিছিল। ৪৪টা বলত ৬১ ৰানত চাৰিটা চাৰিটা চাৰি আৰু চাৰিটা ছয় কোবায়। কোহলীয়েই নহয়, ডু প্লেছিছেও অধিনায়কৰ ইনিংছ খেলিছিল। মেক্সৱেলে অৰ্ধ শতক (৫৯) কৰে। আৰ চি বিয়ে মাত্ৰ দুটা উইকেট হেৰুৱাই ২১২ ৰান সংগ্ৰহ কৰে। বাংগালুৰুৰ বেটছমেনে ঘৰুৱা অনুৰাগীয়ে বিচৰা ধৰণেই বেটিং প্ৰদৰ্শন কৰে।
তথাপি, আৰ চি বিৰ অনুৰাগীসকল হতাশ হৈ ষ্টেডিয়াম এৰিবলগীয়া হ’ল। আৰ চি বিৰ বলাৰসকলে দলটোক এক কঠিন পৰিস্থিতিত পেলাই দিলে।
যদিও লক্ষ্ণৌৰ টপ অৰ্ডাৰ ব্যৰ্থ হ’ল, তথাপিও দলটোৱে মিডল অৰ্ডাৰত থকা দুই তাৰকা ষ্ট’ইনিছ আৰু নিকোলাছ পুৰাণৰ দমনীয় বেটিঙেৰে খেলখনলৈ ঘূৰি আহিল। পুৰাণৰ দুটা অভাৰৰ খেলতে লক্ষ্ণৌৰ ফালে ঘূৰি গ’ল খেলখন। লক্ষ্ণৌৱে তেওঁক নিলামৰ বাবে কিয় ইমান আগ্ৰহী আছিল তাৰ প্ৰমাণ পোৱা গ’ল।
শেষ মুহূৰ্তত তিনিটা উইকেট হেৰুৱালেও টেইল এণ্ডাৰসকলে চাপত যুঁজ অব্যাহত ৰাখে। ছয় মাৰি হিট উইকেট হৈ উভতি যায় বাডোনি। মেচখন আৰু শ্বাসৰুদ্ধকৰ হৈ পৰে। যেতিয়া জয়ী হ’বলৈ আৰু এটা ৰানৰ প্ৰয়োজন হ’ল, তেতিয়া হৰ্শলে নন ষ্ট্ৰাইকাৰৰ দিশত ৰবি বিষ্ণোইক আউট কৰিলেও তাতো বিফল হ’ল।
মুঠতে আৰ চি বিয়ে বিভিন্ন ধৰণে বহুত চেষ্টা কৰিছিল যদিও দিনটো আছিল ৰাহুলৰ। আনকি অতি গহীন গৌতম গম্ভীৰেও ঘৰতেই কোহলীক পৰাস্ত কৰাৰ উত্তেজনা লুকুৱাই ৰাখিব পৰা নাছিল।
সংক্ষিপ্ত স্ক’ৰ:
ৰয়েল চেলেঞ্জাৰ্ছ বাংগালুৰু : ২১২/২ (কোহলী-৬১, ডু প্লেছিছ-৭৯*)
লক্ষ্ণৌ ছুপাৰ জায়েন্টছ: ২১৩/৯ (ষ্ট’ইনিছ -৬৫, পুৰাণ-৬২)
১ উইকেটত বিজয়ী লক্ষ্ণৌ ছুপাৰ জায়েন্টছ
