শাসনৰ বাঘজৰী হাতত লোৱাৰ পিছতে উত্তৰ প্ৰদেশৰ মুখ্যমন্ত্ৰী যোগী আদিত্যনাথে ৰাজ্য খনৰ কেইবাটাও ঐতিহাসিক স্থানৰ নাম সলনি কৰিছে। শেহতীয়া মুখ্যমন্ত্ৰী আদিত্যনাথৰ এক টুইটৰ পৰা ৰাজ্য খনৰ ৰাজধানী চহৰ লক্ষ্ণৌৰ নাম সলনি কৰাৰ ইংগিত পোৱা গৈছে। ধাৰণা কৰা অনুসৰি লক্ষ্ণৌৰ নাম সলাই লক্ষ্মণপুৰী কৰিব পাৰে।
মুখ্যমন্ত্ৰী যোগী আদিত্যনাথৰ এটা টুইটে এই সন্দৰ্ভত জল্পনা-কল্পনাৰ সৃষ্টি কৰিছে। সোমবাৰে সন্ধিয়া প্ৰধানমন্ত্ৰী নৰেন্দ্ৰ মোদীক লক্ষ্ণৌলৈ স্বাগতম জনোৱা টুইটটোত যোগীয়ে লিখিছিল: “ভগৱান লক্ষ্মণৰ নগৰী লক্ষ্ণৌলৈ আপোনাৰ স্বাগতম ” । আদিত্যনাথে লক্ষ্ণৌৰ সৈতে লক্ষ্মণৰ নাম সাঙুৰি লোৱাৰ কথাৰ পৰাই বহুত লক্ষ্ণৌৰ নাম লক্ষ্মণপুৰী কৰা হ’ব বুলি ধাৰণা কৰিছে।
বিষয়টোকলৈ এতিয়া সামাজিক মাধ্যমত বিতৰ্কৰো সৃষ্টি হৈছে। উল্লেখ্য লক্ষ্মণৰ নামত উৎসৰ্গিত এটা বিশাল মন্দিৰ ইতিমধ্যে লক্ষ্ণৌত নিৰ্মাণ কৰা হৈছে। বিজেপি নেতাসকলে লক্ষ্ণৌৰ নাম লখনপুৰী বা লক্ষ্মণপুৰীলৈ সলনি কৰিব লাগে বুলি বহু দিনৰে পৰা দাবী উত্থাপন কৰি আহিছে। লক্ষ্ণৌত ইতিমধ্যে লক্ষ্মণৰ নামেৰে কেইবাটাও স্থান আছে । ইয়াৰ ভিতৰত অন্যতম হৈছে লক্ষ্মণ তিলা, লক্ষ্মণপুৰী আৰু লক্ষ্মণ পাৰ্ক। যোগী আদিত্যনাথ চৰকাৰে ইয়াৰ পূৰ্বে এলাহাবাদৰ নাম সলনি প্ৰয়াগৰাজ কৰিছিল।
একেদৰে চুলতানপুৰৰ নাম কুশভৱনপুৰ, আলিগড়ৰ নাম হৰিগড়, মৈনপুৰীৰ পৰা ময়নপুৰী, সম্ভলৰ পৰা পৃথ্বীৰাজ নগৰ বা কল্কি নগৰ, ফিৰোজাবাদৰ নাম চন্দ্ৰনগৰ কৰিছিল।