নিৰ্বাচনী প্ৰতিশ্ৰুতি অনুসৰি, চৰ্তবিহীনভাৱে সকলোৰে ঋণৰ ধন পৰিশোধ কৰিবলৈ আহ্বান জনালে লুৰীণজ্যোতি গগৈয়ে।
মুখ্যমন্ত্ৰী হিমন্ত বিশ্ব শৰ্মাক উদ্দেশ্যি গগৈয়ে কয়”২০২১চনৰ বিধান সভা নিৰ্বাচনত বিজয়ী হৈ পুনৰ চৰকাৰ গঠন কৰিব পাৰিলে মাইক্ৰ’ ফাইনেন্স প্ৰতিষ্ঠান আদিৰ পৰা ক্ষুদ্ৰ ঋণ গ্ৰহণ কৰাসকলৰ ঋণৰ সম্পূৰ্ণ ধন চৰকাৰৰ ফালৰ পৰা আদায় দিয়া হ’ব বুলি অসমৰ বৰ্তমানৰ মুখ্যমন্ত্ৰী ডঃ হিমন্ত বিশ্ব শৰ্মা ডাঙৰীয়াই প্ৰতিশ্ৰতি দিছিল৷”
নিৰ্বাচনৰ পূৰ্বে ডঃ শৰ্মাই অংশগ্ৰহণ কৰা প্ৰায় সকলো সভাতে তেওঁ এই কথা হাজাৰ হাজাৰ লোকক সাক্ষী কৰি ৰাজহুৱাকৈ ঘোষণা কৰিছিল বুলি উল্লেখ কৰে গগৈয়ে।
ডঃ শৰ্মাৰ উক্ত আশ্বাস সমূহত পতিয়ন গৈ অসমৰ ৰাইজে বিজেপিক ভোটদান কৰি ক্ষমতাত অধিষ্ঠিত কৰোৱাইছে বুলি কটাক্ষ কৰি লুৰীণ জ্যোতিয়ে কয় “কিন্তু ক্ষমতাত বহিয়ে ডঃ হিমন্ত বিশ্ব শৰ্মা ডাঙৰীয়া নেতৃত্বাধীন চৰকাৰখনে সম্পূৰ্ণ পাভ লুটি খোৱা দেখা পোৱা গৈছে।”
আনহাতে নিৰ্বাচনৰ সময়ত বহু বাৰ মাইক্ৰ’ ফাইনেন্সৰ ঋণ পৰিশোধ প্ৰসংগত বহু কেইটা ভিডিও সামাজিক মাধ্যমত ভাইৰেল হোৱা কথাক লৈ লুৰীণজ্যোতি গগৈয়ে হিমন্ত বিশ্ব শৰ্মাই দিয়া ভাষণ পুনৰ সুৱৰাই কয় “অহা ২ মে’ৰ (২০২১) ৰিজাল্ট দিয়াৰ পিছত বন্ধন আৰু মাইক্ৰ’ ফাইনেন্সত যিমান লোন আছে, এই লোন চৰকাৰে ঘুৰাই দিব, আপোনালোকে ঘুৰাই দিব নালাগে৷ (হৰ্ষোল্লাস) এই গোটেই লোন, কাৰোবাৰ এক লাখ আছে, কাৰোবাৰ ডেৰ লাখ আছে, কাৰোবাৰ চল্লিশ হাজাৰ আছে; এই যিমান লোন আছে, এই গোটেই লোনটো চৰকাৰে ঘুৰাই দিব, আপোনালোকে ঘুৰাই দিব নালাগে৷ আপোনালোকৰ পৰা আমি কেৱল হিচাপ লম যে কাৰোবাৰ এক লাখ আছে কাৰোবাৰ ডেৰ লাখ আছে কাৰোবাৰ চল্লিশ হাজাৰ আছে; এই সকলো টকা আমি চৰকাৰে বেংকক দি দিম আৰু আপোনালোকক চাৰ্টিফিকেট দি দিম যে আপোনালোক ঋণ মুক্ত৷”
লুৰীনে লগতে কয় “ডঃ শৰ্মাৰ উল্লিখিত বক্তব্যৰ পৰা এইটো স্পষ্ট যে তেওঁ বিজেপিৰ চৰকাৰ আহিলে কোনো বাচবিচাৰ নকৰাকৈ সকলো ঋণগ্ৰস্তক ঋণমুক্ত কৰি দিয়াৰ প্ৰতিশ্ৰুতি দিছিল৷ কিন্তু ঋণমুক্তিৰ বিষয়টো অধ্যয়ন কৰিবলৈ ৰাজ্য কেবিনেটে গঠন কৰি দিয়া সমিতিৰ অধ্যক্ষ তথা মন্ত্ৰী অশোক সিংঘাল ডাঙৰীয়াই কালি সংবাদ মেলত ঘোষণা কৰে যে চৰকাৰে চৰ্তসাপেক্ষে কিছু নিৰ্দিষ্ট মহিলাৰহে ঋণৰ টকা বেংকক ঘুৰাই দিব, সকলোৰে নহয়৷”
যিসকল লোকৰ বছেৰেকীয়া উপাৰ্জন এক লাখতকৈ কম, যিসকলৰ ঘৰত চাৰিচকীয়া বাহন নাই, ২০২০ চনৰ ৩১ ডিচেম্বৰৰ পূৰ্বে বেংকে ‘এন পি এ’ ঘোষণা নকৰা, যি পৰিয়ালৰ মাত্ৰ এগৰাকী মহিলাইহে ঋণ লৈছে আৰু এটা নিৰ্দিষ্ট সীমালৈকে ঋণ গ্ৰহণ কৰা লোক – এইসকলক বাদ দি বাকী আন কাৰো ঋণৰ দায়িত্ব চৰকাৰে নলয় বুলি মন্ত্ৰীগৰাকীয়ে প্ৰকাশ কৰিছে৷ মন্ত্ৰীগৰাকীৰ এই বক্তব্য মুখ্যমন্ত্ৰীয়ে নিৰ্বাচনৰ পূৰ্বে ৰাজহুৱা সভাবোৰত কৰা ঘোষণাৰ পৰিপন্থী।” বুলি লুৰীণজ্যোতি গগৈয়ে বিজেপি চৰকাৰক সমালোচনা কৰি কয়।
এই লুটি বাগৰ মাৰি ৰাইজৰ লগত হেতালি খেলা এইখন বিজেপি চৰকাৰলৈ অসম জাতীয় পৰিষদৰ হৈ লুৰীণজ্যোতি গগৈয়ে ৰাইজৰ ঋণ সমূহ ওভতাই ৰাইজক এই মহা সংকটৰ পৰা মুক্ত কৰিবলৈ আহ্বান জনায়।
