‘সভ্য সমাজত মানুহক হত্যা কৰি বেদখলমুক্ত কেতিয়াও কৰিব নোৱাৰি’ :লুৰীণজ্যোতি গগৈ

‘সভ্য সমাজৰ কাৰণে মানুহক হত্যা কৰি বেদখলমুক্ত কেতিয়াও কৰিব নোৱাৰে। মৃতদেহৰ ওপৰত অতি বৰ্বৰভাৱে গুৰিয়াই, লাঠিচালনা কৰি সমগ্ৰ পৃথিৱীৰ সন্মুখত অসমীয়া লোকক লজ্জিত কৰিলে’। ছিপাঝাৰৰ ঢলপুৰত চলা উচ্ছেদক লৈ এই মন্তব্য কৰে অসম জাতীয় পৰিষদৰ সভাপতি লুৰীণজ্যোতি গগৈয়ে।

ইপিনে, ছিপাঝাৰৰ ঢলপুৰত উচ্ছেদ কৰা সকলক পুনৰ সংস্থাপনৰ দাবী লুৰীণজ্যোতি গগৈৰ।

তেওঁ কয় ‘উচ্ছেদিত লোকসকল যদি ভাৰতীয় নাগৰিক হয় তেন্তে তেওঁলোকক পুনৰ সংস্থাপিত কৰিব লাগিব। এইটো উচ্চতম ন্যায়ালয়ৰ নিৰ্দেশনা। তেওঁলোক এতিয়ালৈকে বিদেশী বুলি প্ৰমাণিত হোৱা নাই। বিদেশী ঘোষণা বিদেশী ন্যায়াধীকৰণ আৰু NRC য়ে কৰিব।‘

তাৰোপৰি, উচ্ছেদৰ সময়ত কোনো লোক যাতে সমস্যাৰ সন্মুখীন নহয় বা মৃত্যুমুখত নপৰে সেই কথাৰ প্ৰতি লক্ষ্য ৰাখিব লাগিব বুলিও গগৈয়ে কয়।

‘কিন্তু ঢলপুৰৰ গৰুখুঁটিত ২ গৰাকী লোকৰ মৃত্যু আৰু আৰক্ষী আহত হোৱাটোৱে চৰকাৰৰ সম্পূৰ্ণ ব্যৰ্থতা উদঙাই দিছে’। গগৈয়ে এইদৰে কয়।

ইপিনে, খোদ মুখ্যমন্ত্ৰীয়ে উচ্ছেদিত লোকক ৬-৭ বিঘা মাটি দিব বুলি ঘোষণা কৰিছিল বুলি উল্লেখ কৰি গগৈয়ে লগতে কয় ‘অৰ্থাৎ চৰকাৰৰ মতে তেওঁলোক বিদেশী হয় নে নহয় প্ৰমাণিত হোৱা নাই। কিন্তু সাম্প্ৰদায়িক বাতাবৰণ সৃষ্টি কৰি এক ভাঙোনমুখী পৰিবেশৰ সৃষ্টি কৰিবলৈ প্ৰায়বোৰ লোক উঠি পৰি লাগিছে।‘

বৃহস্পতিবাৰৰ দিনটোত ৬০০ মানুহ থকা অঞ্চলত ১০ হাজাৰ লোক কেনেকৈ সমবেত হ’ল তাৰো এক উচ্চ পৰ্য্যায়ৰ তদন্ত হ’ব লাগে বুলি লুৰীণজ্যোতি গগৈয়ে দাবী তোলে।

গগৈয়ে আৰু কয় ‘উচ্ছেদিত মাটিসমূহত কাৰোবাৰ ৰঙা চকু আছে নেকি? এই প্ৰশ্নও মানুহৰ মাজলৈ আহিছে। কোনোবাই ছ’চাইটিৰ হতুৱাই মাটি দখল কৰিব নেকি? য’ত বেদখল হৈছে তাত উচ্ছেদ হ’ব লাগিব। এইখিনি ঠাইতে উচ্ছেদ কৰি কেৱল যাতে থমকি নৰয়’।
তদুপৰি, সত্ৰৰ মাটি বেদখলমুক্ত কিমান হ’ল তাৰ শ্বেতপত্ৰ প্ৰকাশ কৰিবলৈ চৰকাৰক দাবী তুলি লগতে কয় ‘তিনিচুকীয়া জিলাতো ৪ লাখ বিঘাতকৈ অধিক মাটি বেদখল হৈ আছে সেইখিনি কেতিয়া উচ্ছেদ কৰিব?’