চতুৰ্থ দিনটো ভাৰতে যিদৰে আৰম্ভ কৰিছিল, কিন্তু শেষটো সেইদৰে নহ’ল। দিনটোৰ আৰম্ভণিতে অষ্ট্ৰেলিয়াৰ ইনিংছ তাচপাতৰ ঘৰৰ দৰে ভাঙি পৰিছিল। বলিঙেৰে পুনৰ জিলিকি উঠে যশপ্ৰীত বুমৰাহ। এটা সময়ত অষ্ট্ৰেলিয়াৰ স্ক’ৰ আছিল ৯১-৬। সেই পৰিস্থিতিৰ পৰাই অষ্ট্ৰেলিয়াই টেইল এণ্ডাৰৰ শক্তিৰে এক বৃহৎ প্ৰত্যাৱৰ্তন ঘটালে।
অষ্ট্ৰেলিয়াৰ নৱম উইকেটৰ পতনৰ পাছত ভাৰতীয় বলাৰসকলে প্ৰায় ১৮ অভাৰ বলিং কৰাৰ পাছতো তেওঁলোকৰ অন্তিমটো উইকেট দখল কৰাত ব্যৰ্থ হয়। চতুৰ্থ দিনৰ শেষত অষ্ট্ৰেলিয়াই ৯ উইকেটত ২২৮ ৰান স্ক’ৰ কৰে। অগ্ৰগতি ৩৩৩ ৰানৰ।
৯ উইকেটত ৩৫৮ ৰান সংগ্ৰহ কৰি চতুৰ্থ দিনা খেলিবলৈ নামে ভাৰতে। কালিৰ নায়ক নীতিশ ৰেড্ডীয়ে ১০৫ ৰানত অপৰাজিত আছিল। আজি নাথান লায়নৰ বলত ষ্টাৰ্কৰ হাতত কেচ তুলি দি ১১৪ ৰানত উভতি যায়। ভাৰতৰ প্ৰথম ইনিংছ ৩৬৯ ৰানত শেষ হয়। ১০৫ ৰানৰ অগ্ৰগতিৰে ক্ৰীজত নামে অষ্ট্ৰেলিয়াই। কিন্তু বুমৰাহে মূৰ দাঙি উঠিবলৈ নিদিলে। আকৌ এবাৰ প্ৰমাণ কৰিলে যে তেওঁ কিয় এই মুহূৰ্তত ভাৰতৰ শ্ৰেষ্ঠ বলাৰ।
ছেম কনষ্টাসক ৮ ৰানত আউট কৰে বুমৰাহে। উছমান খোৱাজাক ছিৰাজে ২১ ৰানত ক্লীনবোল্ড কৰে। প্ৰথম ইনিংছত শতক অৰ্জন কৰা ষ্টিভ স্মিথৰ গুৰুত্বপূৰ্ণ উইকেটটোও ছিৰাজে লয়। তেওঁ ১৩ ৰানত আউট হয়।
ইয়াৰ পিছতে ট্ৰেভিছ হেডক আউট কৰি বুমৰাহে আটাইতকৈ ডাঙৰ আঘাত হানে। দুয়োটা ইনিংছতে ব্যৰ্থ হয় হেড। ২টা বলত মাত্ৰ ১ ৰান সংগ্ৰহ কৰি ড্ৰেছিং ৰুমলৈ উভতি যায় হেড। বুমৰাহে দ্ৰুতগতিত মিচেল মাৰ্ছ আৰু এলেক্স কেৰীক আউট কৰি ৪টা উইকেট দখল কৰে।
তিনি নম্বৰত নামি এটা দিশ ধৰি ৰাখিলে মাৰ্নাছ লাবুশ্বানে । কেপ্তেইন পেট কামিন্সৰ সৈতে যুটী বান্ধি দলটোক পতনৰ পৰা ৰক্ষা কৰে। ১৩৯টা বলত ৭০ ৰান সংগ্ৰহ কৰি ছিৰাজৰ বলত এলবিডব্লিউ আউট হয় লাবুশ্বান। কামিন্সে আঠ নম্বৰত নামি ৯০টা বল খেলি গুৰুত্বপূৰ্ণ ৪১ ৰান সংগ্ৰহ কৰে।
অৱশ্যে ভাৰতীয় বলাৰসকলে নাথান লায়ন আৰু স্কট ব’লেণ্ডক ঘূৰাই পঠিয়াবলৈ সংগ্ৰাম কৰিবলগীয়া হয়। দুয়োজনে প্ৰাচীৰ হৈ ৰ’ল। ৫৪ বলত ৪১ ৰানত অপৰাজিত থাকে লায়ন। ৬৫ বলত ১০ ৰান সংগ্ৰহ কৰি আছে বোলেণ্ডে। দিনটোৰ শেষত অষ্ট্ৰেলিয়াই ৩৩৩ ৰানত আগবাঢ়ি আছে।
অৱশ্যে ভাৰতে অষ্ট্ৰেলিয়াক আৰু কম ৰানত সীমাবদ্ধ কৰি ৰাখিব পাৰিলেহেঁতেন। উছমান খোৱাজা, মাৰ্নাছ লাবুশ্বান আৰু পেট কামিন্সৰ কেচ মিছ কৰি দলটোক ডুবাই পেলালে জয়ছোৱালে। ইয়াৰ বাহিৰেও নীতিশ ৰেড্ডী, ৱাশ্বিংটন সুন্দৰ আৰু ৰবীন্দ্ৰ জাডেজাক বলিং কমকৈ দিয়াৰ বাবে প্ৰশ্নৰ সন্মুখীন হ’ব ৰোহিত শৰ্মা।
