ডকাইতি কৰিবলৈ নামিল এগৰাকী কেমিষ্ট। কাহিনী যেন লাগিলেও ঘটনাটো সঁচা! অভিযুক্তৰ নাম দীপ শুভম। তেওঁ দাবী কৰে যে অৰ্থনৈতিক অৱস্থাই তেওঁক অপৰাধৰ দিশে ঠেলি দিছিল। তেওঁ মূলসুঁতিলৈ ঘূৰি আহিব বিচাৰিছিল…যদিও সেয়া আৰু হৈ নুঠিল।
দিল্লী আৰক্ষীৰ মুৰব্বী কনিষ্টবল অজয়ে কয় যে এই দীপ শুভম একাধিক বেংক ডকাইতিৰ সৈতে জড়িত আছিল। হাৰিয়ানাৰ সোহনা অঞ্চলৰ পৰা গ্ৰেপ্তাৰ কৰা হয় তেওঁক। আৰক্ষীয়ে লোকেশ্যন ট্ৰেক কৰি দীপক গ্ৰেপ্তাৰ কৰে।
জানিব পৰা মতে, ২০১৭ আৰু ২০২১ চনত দিল্লী আৰু বিহাৰত দুটাকৈ ডকাইতি সংঘটিত হৈছিল। সেইবোৰ ঘটনাৰ লগত জড়িত আছিল দীপ। আৰক্ষীৰ সূত্ৰ অনুসৰি দীপে প্ৰকৃততে এটা ইণ্টেৰিয়ৰ ডিজাইন ফাৰ্মত কাম কৰে। পঢ়া-শুনাত তেওঁ যথেষ্ট ভাল। তেওঁৰ এই কাণ্ডত আনকি আৰক্ষীও আচৰিত হৈ পৰে।
বাতৰি অনুসৰি, ৩২ বছৰীয়া দীপ বিহাৰৰ সীতামাৰীৰ বাসিন্দা। দিল্লীৰ কিৰোৰী মাল কলেজৰ পৰা ৰসায়ন বিজ্ঞান অধ্যয়ন কৰিছিল। স্নাতকোত্তৰ ডিগ্ৰী সম্পূৰ্ণ কৰাৰ পিছত তেওঁ এম ফিলও কৰিছিল। ইয়াৰ পিছত তেওঁ আইন অধ্যয়ন কৰে।
এল এল বি পাঠ্যক্ৰম কৰি থকাৰ সময়তে হঠাৎ পৰিয়ালটো আৰ্থিক সমস্যাৰ সন্মুখীন হ’ল। শিক্ষাৰ খৰচ পূৰণৰ বাবে তেওঁ সংগ্ৰাম কৰিবলগীয়া হৈছিল। এই পৰিস্থিতিত দীপে অৱশেষত ডকাইতিৰ পথ বাছি ল’বলৈ বাধ্য হৈছিল বুলি আৰক্ষীৰ সূত্ৰই প্ৰকাশ কৰিছে।
দীপে আৰক্ষীক জনোৱা মতে, যেতিয়া তেওঁৰ পৰিয়ালে তেওঁক আৰু ধন দিব নোৱাৰিলে, তেতিয়া তেওঁ অপৰাধৰ পথ বাছি লৈছিল। দীপে প্ৰথমবাৰৰ বাবে অপৰাধৰ পথত আগবাঢ়িছিল ২০১৭ চনত। তেওঁ নিৰ্মাণ কৰে স্মোক বোম। তেওঁৰ লগত মিথাইল এচিটেট আৰু বেনজিন আছিল। সেই সকলোবোৰ লৈ তেওঁ বেংক অৱ ইণ্ডিয়াৰ পৰা ৩.৬ লাখ টকা লুটি লৈছিল। তেওঁ গ্ৰেপ্তাৰো হয়। পিছত জেলৰ পৰা ওলাই অহাৰ পিছত পুনৰ একেটা পথেই লয় ।
তেওঁ লগতে গহনা আৰু মোবাইল লুট কৰা বুলিও কয়। পুনৰ একে ঘটনা সংঘটিত হোৱাৰ পিছত পুনৰ আৰক্ষীয়ে দীপৰ সন্ধান আৰম্ভ কৰে। উপ আয়ুক্ত হৰ্ষ ইন্দোৰাই কয় যে উচ্চ শিক্ষিত হোৱাৰ পিছতো দীপে অপৰাধী হোৱাৰ পথ বাছি লৈছে। ইতিমধ্যে তেওঁক জেৰা কৰা হৈছে।
