গ্ৰেমী এৱাৰ্ড ২০২১ : উজ্বলি উঠিল বৰ্ণবিদ্বেষবিৰোধী সংগীত, বিয়ন্সৰ নতুন অভিলেখ
দেওবাৰে চলিত বৰ্ষৰ ৬৩সংখ্যক গ্ৰেমী এৱাৰ্ড ঘোষণা কৰা হয়।
লজ এঞ্জেলছ সীমিতসংখ্যক লোকৰ উপস্থিতি আৰু অনলাইন অনুষ্ঠানৰ যোগেৰে আমেৰিকা যুক্তৰাষ্ট্ৰৰ ‘দ্যা ৰেকৰ্ডিং একাডেমী’য়ে বিশ্বৰ সংগীতজগতলৈ আগবঢ়োৱা এৱাৰ্ডটোৰ বিজয়ীসকৰ নাম ঘোষণা কৰি এৱাৰ্ড প্ৰদান কৰা হয়।
আমেৰিকাৰ পপষ্টাৰ টেইলৰ চুইফটে ‘ফকলৰ’ (Folklore)য়ে বৰ্ষশ্ৰেষ্ঠ এলবামৰ সন্মান লাভ কৰে।
ইয়াৰোপৰি অন্যান্য কেইটামান শিতানত শ্ৰেষ্ঠ বিবেচিত হোৱা শিল্পীসকল-
বৰ্শশ্ৰেষ্ঠ ৰেকৰ্ড হিচাপে বিবেচিত হয় বিল্লী এইল্লিছৰ ‘এফ্ৰীথিং আই ৱাণ্টেড’।
বৰ্ষশ্ৰেষ্ঠ গান হিচাপে বিবেচিত হয়- এইচ.ই.আৰ. (H.E.R)-ৰ ‘আই কাণ্ট ব্ৰেথ’।
বৰ্ষশ্ৰেষ্ঠ নৱাগত শিল্পী- মেগান ডি ষ্টেলিয়ন
উল্লেখযোগ্য আমেৰিকা যুক্তৰাষ্ট্ৰৰ পপ মিউজিকৰ সম্ৰাজ্ঞীস্বৰূপ বিয়ন্সে সমগ্ৰ কেৰিয়াৰত ২৮ বাৰৰ বাবে গ্ৰেমী সন্মান লাভ কৰিলে।
কৃষ্ণাংগমূলীয় শিল্পীগৰাকীয়ে এইবাৰ দুটাকৈ শিতানত শ্ৰেষ্ঠত্ব অৰ্জন কৰিছে।
ইয়াৰ ফলস্বৰূপে তেওঁ এৱাৰ্ডটোৰ ইতিহাসৰ বিভিন্ন শিতানত আটাইতকৈ বেছি সন্মান লাভ কৰা সংগীতশিল্পী হিচাপে অভিলেখ সৃষ্টি কৰিছে।
আনহাতে ‘ফকলৰ’ এলবামেৰে শ্ৰেষ্ঠতা অৰ্জতা কৰা টেইলৰ চুইফটেও আন এক অভিলেখ সৃষ্টি কৰিছে।
তেওঁ প্ৰথমগৰাকী নাৰী শিল্পী হিচাপে বিবেচতি হয় যি তিনি বাৰৰ বাবে শ্ৰেষ্ঠ এলবামৰ সন্মান লাভ কৰিছে।
ইয়াৰ পূৰ্বে তেওঁ ২০১০ চনত ‘ফিয়েৰলেছ’ আৰু ২০১৬ চনত ‘১৯৮৯’ শীৰ্ষক এলবামৰ বাবে এই সন্মান লাভ কৰিছিল।
উল্লেখযোগ্য যে ইয়াৰ পূৰ্বে কেৱল তিনিজন শিল্পীয়ে তিনিবাৰৰ বাবে এই সন্মান লাভ কৰিছিল।
তেওঁলোক হ’ল- ফ্ৰাংক চিনাট্ৰা, প’ল চিমন আৰু ষ্টিভী ৱণ্ডাৰ।
আনহাতে, এইবাৰৰ গ্ৰেমী এৱাৰ্ডত বৰ্ণবিদ্বেষবিৰোধী সংগীতে প্ৰাধান্য লাভ কৰিছে।
শ্ৰেষ্ঠ ‘ৰিডম এণ্ড ব্লুজ পাৰফৰ্মেন্সৰ বাবে বিয়নে লাভ কৰে শ্ৰেষ্ঠতাৰ সন্মান।
তেওঁ ‘ব্লেক পেৰেড’ নামৰ বৰ্ণবিদ্বেষবিৰোধী গানৰ বাবে এই সন্মান লাভ কৰিছে।
আনহাতে যোৱা বছৰ আমেৰিকাত হোৱা বৰ্ণবিদ্বেষবিৰোধী ‘ব্লেক লাইভছ মেটাৰ’ আন্দোলনৰ শ্লোগানৰ অনুপ্ৰেৰণাত এইচ.ই.আৰ.ৰ গান ‘আই কাণ্ট ব্ৰেথ’ শীৰ্ষক গানটোৱে শ্ৰেষ্ঠ গান হিচাপে সন্মানিত হৈছে।