পান্নুন হত্যাৰ ষড়যন্ত্ৰত অভিযুক্তক কূটনৈতিক সাহায্য; পোহৰলৈ আহিল চাঞ্চল্যকৰ তথ্য!

জুন মাহৰ পৰা চেক কাৰাগাৰত বন্দী হৈ থকা এজন ভাৰতীয় বিষয়াৰ নিৰ্দেশত খালিস্তানৰ বিচ্ছিন্নতাবাদী নেতা গুৰপতৱন্ত সিং পান্নুনক হত্যাৰ ষড়যন্ত্ৰ কৰাৰ অভিযোগত আমেৰিকাই অভিযুক্ত কৰা নিখিল গুপ্তাক কমেও তিনিবাৰকৈ দূতাবাসৰ সাহায্য (কনছুলাৰ এক্সেছ) প্ৰদান কৰা হৈছিল।

বৈদেশিক পৰিক্ৰমা মন্ত্ৰালয়ৰ মুখপাত্ৰ অৰিন্দম বাগচিয়ে কয়, ‘এজন ভাৰতীয় নাগৰিক বৰ্তমান চেক কৰ্তৃপক্ষৰ জিম্মাত আছে। আমি কমেও তিনিবাৰ কনছুলাৰ এক্সেছ লাভ কৰিছো। আমি ব্যক্তিজনক প্ৰয়োজন অনুসৰি প্ৰয়োজনীয় দূতাবাসৰ সহায় আগবঢ়াইছো।”

চেক গণৰাজ্যৰ ৰাজধানী প্ৰাগৰ কাৰাগাৰত বন্দী হৈ থকা নিখিল গুপ্তাৰ ক্ষেত্ৰত ভাৰতক কমেও তিনিবাৰ কনছুলাৰ এক্সেছৰ অনুমতি দিয়া হৈছিল। এই তথ্য বৈদেশিক পৰিক্ৰমা মন্ত্ৰালয়ে অৱগত কৰিছে।

লগতে পঢ়কঃ অধিবক্তাৰ হাতত হেণ্ডকাফ লগাই বিপদত আৰক্ষী :  ৫ লাখ টকাৰ জৰিমনা ভৰাৰ নিৰ্দেশ গুৱাহাটী উচ্চ ন্যায়ালয়ৰ

ভাৰতীয় বিষয়াৰ নিৰ্দেশত খালিস্তানৰ বিচ্ছিন্নতাবাদী নেতা গুৰপতৱন্ত সিং পান্নুনক হত্যাৰ ষড়যন্ত্ৰ ৰচনা কৰা নিখিল গুপ্তাৰ বিৰুদ্ধে আমেৰিকাই অভিযোগ উত্থাপন কৰিছে। ইয়াৰ পিছতে প্ৰাগৰ এটা এয়াৰপৰ্টৰ পৰা তেওঁক গ্ৰেপ্তাৰ কৰা হয়।

খালিস্তানৰ বিচ্ছিন্নতাবাদী গুৰপতৱন্ত সিং পান্নুনক হত্যাৰ ষড়যন্ত্ৰৰ অভিযোগত অভিযুক্ত নিখিল গুপ্তাক কমেও তিনিবাৰকৈ কনছুলাৰ এক্সেছৰ সুবিধা দিয়া হৈছিল বুলি বৈদেশিক পৰিক্ৰমা মন্ত্ৰালয়ে প্ৰকাশ কৰিছে।

দৰাচলতে আমেৰিকাই অভিযোগ কৰিছে যে ভাৰতীয় বিষয়াজনৰ নিৰ্দেশত চেক গণৰাজ্যৰ (ইউৰোপীয় দেশ) কাৰাবন্দী নিখিল গুপ্তাই পান্নুক হত্যাৰ ষড়যন্ত্ৰ কৰা হৈছিল। কনছুলাৰ এক্সেছৰ অৰ্থ হ’ল যেতিয়া কোনো এখন দেশৰ কোনো ব্যক্তিক আন এখন দেশত কাৰাগাৰত ৰখা হয়, তেতিয়া কনছুলাৰ এক্সেছৰ অধীনত দেশৰ কোনো কূটনীতিবিদ বা বিষয়াক বন্দীজনৰ ওচৰলৈ যাবলৈ অনুমতি দিয়া হয়।

লগতে পঢ়কঃ চেক বিশ্ববিদ্যালয়ত বন্দুকধাৰী ছাত্ৰৰ গুলীত নিহত ১৫ জন; ৰাছিয়াৰ সৈতে কি সংযোগ হত্যাকাৰীৰ?

এই সন্দৰ্ভত বাগচিয়ে কয় যে আমি আমেৰিকাই দিয়া তথ্যক গুৰুত্বসহকাৰে লৈছো আৰু বিষয়টোৰ সকলো দিশ চাবলৈ উচ্চ পৰ্যায়ৰ তদন্ত সমিতিও গঠন কৰা হৈছে। বৈদেশিক পৰিক্ৰমা মন্ত্ৰালয়ে লগতে কয় যে এখন উচ্চ পৰ্যায়ৰ কমিটীয়ে আমেৰিকাৰ ইনপুট পৰীক্ষা কৰি আছে।

বৰ্তমান এই সন্দৰ্ভত তদন্ত চলি থকাৰ বাবে এতিয়া এই সন্দৰ্ভত কোনো মন্তব্য কৰাটো উপযুক্ত নহ’ব বুলিও বাগচিয়ে কয়। ইয়াৰ পূৰ্বে ব্ৰিটেইনৰ দৈনিক কাকত ফাইনেন্সিয়েল টাইমছত প্ৰকাশ পাইছিল যে আমেৰিকাৰ মাটিত পান্নুনক হত্যাৰ ষড়যন্ত্ৰ আমেৰিকাই বিফল কৰিছে আৰু এই বিষয়ে ভাৰতক সকীয়াই দিছে।