মধ্যপ্ৰদেশত যেন এতিয়া ভূলুন্ঠিত হৈছে মানৱতা! মানৱ সমাজক লজ্জানত কৰা এটাৰ পিছত আন এটা ঘটনাই দেশজুৰি এতিয়া চৰ্চাৰ কেন্দ্ৰবিন্দু কৰি তুলিছে মধ্য প্ৰদেশক। শেহতীয়া কিছুদিন ধৰি সমগ্ৰ দেশকে জোকাৰি যোৱা ৰাজ্যখনত সংঘটিত প্ৰস্ৰাৱ কাণ্ডৰ ঘৃণনীয় দৃশ্যৰ লজ্জা মাৰ নাযাওঁতেই এইবাৰ পুনৰ সংবাদ শিৰোনাম দখল কৰিছে আন এক অমানৱীয় কাণ্ডই।
এইবাৰ এই ঘটনা সংঘটিত হৈছে ৰাজ্যখনৰ গোৱালিয়ৰত। জিলাখনৰ এক ব্যস্ত পথেৰে এখন চলন্ত বাহনৰ ভিতৰত এগৰাকী ব্যক্তিক চৰম অমানুষিক আতিশয্য চলোৱাৰ দৃশ্য সম্প্ৰতি ভাইৰেল হৈ পৰিছে। ব্যক্তিগৰাকীক দুৰ্বৃত্তই শাৰীৰিক আক্ৰমণ কৰাৰ লগতে আন এগৰাকী ব্যক্তিৰ ভৰিৰ তলুৱা চেলেকিবলৈ বাধ্য কৰা দেখিবলৈ পোৱা গৈছে।
ভিডিঅ’টো পোহৰলৈ অহাৰ পিছতে কেৱল মধ্য প্ৰদেশতে নহয়, সমগ্ৰ দেশতে সৃষ্টি হয় তীব্ৰ আলোড়নৰ। দেশজুৰি হোৱা প্ৰতিক্ৰিয়াৰ পিছতে ৰাজ্যৰ গৃহমন্ত্ৰী নৰোত্তম মিশ্ৰই এই সন্দৰ্ভত দুগৰাকী লোকক গ্ৰেপ্তাৰ কৰা হৈছে বুলি সদৰী কৰিছে। এই ঘটনাৰ ভুক্তভোগী আৰু দুই অভিযুক্ত জিলাখনৰ ডাবৰা চহৰৰ বাসিন্দা বুলি আৰক্ষীয়ে জানিবলৈ দিয়ে।
ভাইৰেল হোৱা এটা ভিডিঅ’ত ভুক্তভোগী ব্যক্তিগৰাকীক বাৰে বাৰে মুখত আঘাত কৰাৰ লগতে অভিযুক্তই অশ্ৰাব্য গালি-গালাজ কৰা দেখিবলৈ পোৱা গৈছে। তদুপৰি একেসময়তে ইটোৰ পিছত সিটোকৈ চৰ সোধাই তেওঁক “গোলু গুৰজাৰ বাপ হায়” (গোলু গুৰজাৰ পিতৃ) বুলি ক’বলৈ বাধ্য কৰা পৰিলক্ষিত হৈছে ভিডিঅ’টোত।
আন এটা ভিডিঅ’ত অভিযুক্তই ব্যক্তিগৰাকীক জোতাৰে অবিৰতভাৱে আঘাত কৰা দেখা গৈছে। ঘটনা সন্দৰ্ভত প্ৰতিক্ৰিয়া প্ৰকাশ কৰি ডাবৰাৰ এগৰাকী জ্যেষ্ঠ আৰক্ষী বিষয়াই জানিবলৈ দিয়া মতে ভভিডিঅটো ভাইৰেল হোৱাৰ পিছতে ফৰেনছিক পৰীক্ষাৰ বাবে প্ৰেৰণ কৰা হয়।
পৰিয়ালৰ অভিযোগৰ ভিত্তিত ভাৰতীয় দণ্ডবিধিৰ বিভিন্ন ধাৰাৰ অধীনত অভিযুক্তৰ বিৰুদ্ধে গোচৰ ৰুজু কৰা হৈছে বুলি আৰক্ষী বিষয়াগৰাকীয়ে লগতে সদৰী কৰে।
