পঞ্জাৱৰ চণ্ডীগড় বিশ্ববিদ্যালয়ৰ ছাত্ৰীৰ স্নান কৰাৰ ছবি ভাইৰেল হোৱাকলৈ প্ৰতিক্ৰিয়া অব্যাহত থকাৰ সময়তে তামিলনাডুৰ মাদুৰাইতো অনুৰূপ ঘটনা ঘটাৰ খবৰ আহিছে। অভিযোগ অনুসৰি এগৰাকী ছাত্ৰীয়ে তেওঁ বাস কৰা ছাত্ৰী নিবাসৰ একাংশ ছাত্ৰীৰ গা ধোৱা কাপোৰ সলনি কৰাৰ ভিডিঅ’ আৰু তেওঁৰ প্ৰেমিকলৈ প্ৰেৰণ কৰিছে। আৰক্ষীয়ে ইতিমধ্যে ভিডিঅ’ প্ৰেৰণ কৰা ছাত্ৰীগৰাকীক গ্ৰেপ্তাৰ কৰিছে।
ছাত্ৰীৰ স্নান কৰা আৰু কাপোৰ পিন্ধাৰ ভিডিঅ’ প্ৰেমিকলৈ পঠিওৱা অভিযুক্ত ছাত্ৰীগৰাকীৰ নাম কালিশ্বৰী। তেওঁ মাদুৰাইৰ এখন ব্যক্তিগত মহাবিদ্যালয়ত বিএড পাঠ্যক্ৰমত অধ্যয়ন কৰি আছে ।আৰক্ষীয়ে প্ৰকাশ কৰা মতে কালিশ্বৰীয়ে এনে ভিডিঅ’ তেওঁৰ প্ৰেমিক আশিকলৈ প্ৰেৰণ কৰিছিল। একাংশ ছাত্ৰীৰ কালিশ্বৰীৰ গতিবিধিৰ বিষয়ে সন্দেহ ওপজে। সেই সন্দেহত ঠাত্ৰীসকলে কালিশ্বৰীক জেৰা কৰে।
ছাত্ৰীসকলে কালিশ্বৰীৰ মোবাইল ফোনৰ পৰা আৱাসীসকলৰ কেইবাটাও গোপন ভিডিঅ’ আৰু ছবি উদ্ধাৰ কৰে। হোষ্টেলৰ পৰা অভিযোগ পোৱাৰ পিছত, মাদুৰাই আৰক্ষীৰ চাইবাৰ অপৰাধ শাখাই তদন্ত আৰম্ভ কৰে। আৰক্ষীয়ে তদন্ত কৰি আশিক আৰু কালিশ্বৰীক গ্ৰেপ্তাৰ কৰিছে। উল্লখ্য সমগ্ৰ দেশজুৰি চাঞ্চল্যৰ সৃষ্টি কৰা চণ্ডীগড় বিশ্ববিদ্যালয়ৰ অশ্লীল ভিডিঅ’ কাণ্ড সন্দৰ্ভত পঞ্জাৱ আৰক্ষীয়ে অৰুণাচল প্ৰদেশত নিযুক্ত এজন সেনা জোৱানক গ্ৰেপ্তাৰ কৰিছে।
ধৃত সেনা জোৱানগৰাকীক সঞ্জীৱ সিং বুলি চিনাক্ত কৰা হৈছে।অভিযুক্ত সঞ্জীৱ সিং অৰুণাচল প্ৰদেশৰ চেলা পাছত নিযুক্ত হৈ আছিল। সিঙৰ বিৰুদ্ধে বিশ্ববিদ্যালয়ৰ অশ্লীল ভিডিঅ’ৰ দ্বাৰা এগৰাকী ছাত্ৰীক ব্লেকমেইল কৰাৰ লগতে আন ছাত্ৰীকো অশ্লীল ভিডিঅ’ দাবী কৰাৰ অভিযোগ উত্থাপন হৈছিল।
পঞ্জাৱৰ আৰক্ষী সঞ্চালক প্ৰধান গৌৰৱ যাদৱে উল্লেখ কৰা মতে ফৰেনচিক আৰু ডিজিটেল প্ৰমাণৰ ভিত্তিত সঞ্জীৱ সিঙক গ্ৰেপ্তাৰ কৰিবলৈ ম’হালিৰ এটা আৰক্ষী দল চেলা পাছলৈ প্ৰেৰণ কৰা হৈছিল।
দলটোৱে অৰুণাচল প্ৰদেশ আৰু অসম আৰক্ষীৰ সহযোগত অভিযুক্ত সঞ্জীৱ সিঙক গ্ৰেপ্তাৰ কৰে বুলি আৰক্ষী সঞ্চালক প্ৰধান যাদৱে লগতে জানিবলৈ দিয়ে।
উল্লেখ্য যে যোৱা সপ্তাহত পঞ্জাৱৰ ম’হালিৰ বিশ্ববিদ্যালয় চৌহদত কেইবাগৰাকীও ছাত্ৰ-ছাত্ৰীৰ আপত্তিজনক ভিডিঅ’ ৱাছৰুমত ৰেকৰ্ড কৰাৰ অভিযোগত প্ৰতিবাদে জোকাৰি গৈছিল।
ঘটনা সন্দৰ্ভত আৰক্ষীয়ে ইয়াৰ পূৰ্বে হিমাচল প্ৰদেশৰ পৰা এগৰাকী যুৱতীসহ তিনিগৰাকী লোকক গ্ৰেপ্তাৰ কৰিছিল।
