মহাৰাষ্ট্ৰত আদানী গ্ৰুপৰ দুটা পৃথক প্ৰকল্পৰ বাবে প্ৰায় ৮৩,৭০০ বৰ্গফুট বনভূমি অনুমোদন দিয়াক লৈ বিতৰ্কৰ সৃষ্টি হৈছে। খবৰ অনুসৰি ২০২৬ চনৰ আগষ্ট মাহত ৰাজ্যৰ বন বিভাগে এই ভূমি প্ৰকল্পৰ বাবে ব্যৱহাৰৰ অনুমতি দি দুটা পৃথক চৰকাৰী নিৰ্দেশনা জাৰি কৰিছিল। মুঠ মাটিকালি প্ৰায় ০.৭৮ হেক্টৰ।
ইয়াৰে সৰ্বাধিক অংশ ৰায়গড় জিলাৰ আলিবাগ তালুকৰ শ্বাহাপুৰ আৰু শ্বাহাবাজ অঞ্চলৰ প্ৰস্তাৱিত আদানী চিমেণ্ট লিমিটেড প্ৰকল্পৰ বাবে দিয়া হৈছে। বাকী থকা মাটিখিনি আমৰাৱতী জিলাত আদানী টোটেল গেছ লিমিটেডৰ প্ৰাকৃতিক গেছ পাইপলাইন নেটৱৰ্ক নিৰ্মাণৰ বাবে আবণ্টন দিয়া হৈছে।
চৰকাৰী নথি অনুসৰি আলিবাগৰ শ্বাহাপুৰ আৰু শ্বাহাবাজ গাঁৱৰ প্ৰায় ৬৯,৯৩৩ বৰ্গফুট সংৰক্ষিত বনাঞ্চল আৰু মেংগ্ৰোভ এলেকা আদানী চিমেণ্ট প্ৰকল্পৰ প্ৰস্তাৱিত চিমেণ্ট বাল্ক টাৰ্মিনেলৰ আন্তঃগাঁথনি নিৰ্মাণৰ বাবে ব্যৱহাৰ কৰা হ’ব।
এই ভূমিত জেটি, কনভেয়াৰ কৰিডৰ আৰু সংযোগী পথ নিৰ্মাণৰ পৰিকল্পনা কৰা হৈছে। এই উপকূলীয় অঞ্চলত মেংগ্ৰোভৰ উপস্থিতিৰ বাবে ভূমি ব্যৱহাৰৰ অনুমোদনে বিশেষ দৃষ্টি আকৰ্ষণ কৰিছে। কাৰণ, মেংগ্ৰোভ কেৱল উপকূলীয় পৰিৱেশৰ এক গুৰুত্বপূৰ্ণ অংশই নহয়, ধুমুহা আৰু জোৱাৰ-ভাটাৰ সময়ত প্ৰাকৃতিক সুৰক্ষা বলয় হিচাপেও কাম কৰে। আনহাতে, অমৰাৱতী জিলাৰ আদানী টোটেল গেছ লিমিটেডক প্ৰায় ১৩,৭৮৮ বৰ্গফুট সংৰক্ষিত বনাঞ্চল ভূমি দিবলৈ অনুমোদন দিয়া হৈছে।
চৰকাৰী নিৰ্দেশনাত উল্লেখ আছে যে এই ভূমি মূলতঃ প্ৰাকৃতিক গেছ বিতৰণৰ বাবে মাটিৰ তলত পাইপলাইন স্থাপনৰ বাবে ব্যৱহাৰ কৰা হ’ব। অৰ্থাৎ দুয়োটা প্ৰকল্পৰ উদ্দেশ্য বেলেগ হ’লেও দুয়োটা ক্ষেত্ৰতে বনভূমি ব্যৱহাৰৰ অনুমতি দিয়া হৈছে। কিন্তু এই অনুমতি নিঃচৰ্ত নহয়। বন বিভাগৰ নিৰ্দেশিকাত কেইবাটাও চৰ্ত আৰোপ কৰা হৈছে। তাৰে এটা হ’ল সংশ্লিষ্ট এলেকাত বন বিভাগৰ বিষয়াসকলৰ মুক্ত চলাচলৰ অধিকাৰ বজাই ৰাখিব লাগিব৷
প্ৰকল্পৰ কামৰ বাবে বনকৰ্মীৰ পৰিদৰ্শন বা কৰ্তব্য পালনত কোনো বাধাৰ সৃষ্টি হ’ব নোৱাৰে। চৰকাৰৰ চৰ্ত উলংঘা হ’লে ভূমি ব্যৱহাৰৰ অনুমতি প্ৰত্যাহাৰ কৰাৰ ক্ষমতাও চৰকাৰৰ হাতত থাকিব বুলি জনোৱা হৈছে। ফলত প্ৰকল্প কোম্পানীসমূহে কিছুমান নিয়ম অনুসৰি নিৰ্মাণ আৰু আন্তঃগাঁথনিৰ কাম আগবঢ়াই নিব লাগিব।
কিন্তু চৰকাৰী অনুমোদনৰ পিছতো পৰিৱেশ বিষয়ক লৈ উদ্বেগ সৃষ্টি হৈছে। বিশেষকৈ আলিবাগ প্ৰকল্পৰ ক্ষেত্ৰত মেংগ্ৰোভ আৰু সংৰক্ষিত বনাঞ্চলৰ কিছু অংশ ব্যৱহাৰৰ বিষয়টোৱে পৰিৱেশবিদসকলৰ দৃষ্টি আকৰ্ষণ কৰিছে। তেওঁলোকৰ আশংকা যে যদিহে স্পৰ্শকাতৰ উপকূলীয় অঞ্চলত নিৰ্মাণৰ কাম কৰা হয় তেন্তে ইয়াৰ প্ৰভাৱ স্থানীয় পৰিৱেশ তন্ত্ৰত পৰিব পাৰে।
মেংগ্ৰোভ ধ্বংস বা ক্ষতিগ্ৰস্ত হ’লে জলজ প্ৰাণী, চৰাই আৰু স্থানীয় জৈৱ বৈচিত্ৰ্যৰ ওপৰত ইয়াৰ দীৰ্ঘম্যাদী প্ৰভাৱ পৰাৰ সম্ভাৱনা আছে। ইয়াৰ উপৰিও উপকূলীয় অঞ্চলত প্ৰাকৃতিক দুৰ্যোগৰ আশংকা হ্ৰাস কৰাত মেংগ্ৰোভৰ ভূমিকা সম্পৰ্কেও প্ৰশ্ন উত্থাপন হৈছে।
