মহাৰাষ্ট্ৰৰ আকোলা জিলাত এক অতি মৰ্মান্তিক ঘটনা সংঘটিত হৈছে। ৰাজ্যিক কংগ্ৰেছৰ উপ সভাপতি হিদয়াতুল্লাহ পেটেলক মছজিদৰ ভিতৰতে চোকা অস্ত্ৰৰে আক্ৰমণ কৰাৰ ফলত বুধবাৰে পুৱা তেওঁৰ মৃত্যু ঘটে। ৬৬ বছৰীয়া নেতাগৰাকীক মঙলবাৰে দিনৰ ভাগত আক্ৰমণ কৰা হৈছিল আৰু চিকিৎসালয়ত চিকিৎসাধীন অৱস্থাত তেওঁ শেষ নিশ্বাস ত্যাগ কৰে।
আৰক্ষীৰ পৰা জানিব পৰা মতে, মঙলবাৰে দিনৰ প্ৰায় ১.৩০ বজাত আকোলা জিলাৰ আকোট তালুকৰ অন্তৰ্গত মোহলা গাঁৱৰ জামা মছজিদত এই ঘটনা সংঘটিত হয়। পেটেল বিয়লিৰ নমাজ অৰ্পণ কৰি মছজিদৰ পৰা ওলাই অহাৰ সময়তে অভিযুক্তই তেওঁক লক্ষ্য কৰি আক্ৰমণ চলায়। পুৰণি শত্ৰুতাৰ বাবেই এই আক্ৰমণ কৰা বুলি প্ৰাথমিক তদন্তত ধাৰণা কৰা হৈছে।
আক্ৰমণকাৰীয়ে চোকা অস্ত্ৰৰে হিদয়াতুল্লাহ পেটেলৰ ডিঙি আৰু বুকুত আঘাত কৰিছিল। ইয়াৰ ফলত তেওঁৰ শৰীৰৰ পৰা প্ৰচুৰ ৰক্তক্ষৰণ হয়। ঘটনাৰ ঠিক পিছৰে কিছুমান দৃশ্য ছচিয়েল মিডিয়াত ভাইৰেল হৈ পৰিছে, য’ত নেতাগৰাকীক তেজেৰে লুতুৰি-পুতুৰি অৱস্থাত দেখা গৈছে। স্থানীয় ৰাইজে তেওঁক লগে লগে উদ্ধাৰ কৰি আকোটৰ এখন ব্যক্তিগত চিকিৎসালয়ৰ জৰুৰীকালীন বিভাগত ভৰ্তি কৰাইছিল যদিও চিকিৎসকে তেওঁক বচাব নোৱাৰিলে।
ঘটনাৰ খবৰ পোৱাৰ লগে লগে আৰক্ষীৰ দল ঘটনাস্থলীত উপস্থিত হয় আৰু ফৰেনছিক বিশেষজ্ঞৰ সহায়ত প্ৰমাণ সংগ্ৰহ কৰে। এই হত্যাকাণ্ডৰ সৈতে জড়িত উবেদ খান কালু খান ওৰফে ৰাজিক খান পেটেল নামৰ ২২ বছৰীয়া যুৱকজনক ধৰিবলৈ আৰক্ষীয়ে ৬ টাকৈ বিশেষ দল গঠন কৰিছিল। অৱশেষত মঙলবাৰে নিশা প্ৰায় ৮ বজাত আকোট তালুকাৰ পানাজ গাঁৱৰ পৰা অভিযুক্তক গ্ৰেপ্তাৰ কৰিবলৈ সক্ষম হয় আৰক্ষী।
এই হত্যাকাণ্ডক কেন্দ্ৰ কৰি বৰ্তমান মোহলা আৰু আকোট চহৰত চেপা উত্তেজনাই বিৰাজ কৰিছে। পৰিস্থিতি নিয়ন্ত্ৰণত ৰাখিবলৈ সমগ্ৰ এলেকাতে নিৰাপত্তা ব্যৱস্থা কটকটীয়া কৰা হৈছে। জিলা আৰক্ষী অধীক্ষক অৰ্চিত চন্দকে নিজে পৰিস্থিতিৰ তদাৰক কৰিছে। ইতিমধ্যে আকোট গ্ৰাম্য আৰক্ষীয়ে এই সন্দৰ্ভত এক গোচৰ ৰুজু কৰি তদন্ত প্ৰক্ৰিয়া অধিক ক্ষিপ্ৰতৰ কৰি তুলিছে।
