ভিডিঅ’টো চাই আপোনাৰো বুকু কপি উঠিব! জীৱনটো কচু পাতৰ পানীৰ দৰে পানীৰ দৰে। গণৰাজ্য দিৱস উদযাপনৰ ভিডিঅ’ এটা চাই আপুনি নিশ্চয় এই কথাই ভাবিব। মহাৰাষ্ট্ৰৰ ধাৰাশিৱ জিলাৰ এখন থানাৰ ঘটনা। আৰক্ষী জোৱানসকলে দেশৰ ৭৭ সংখ্যক গণৰাজ্য দিৱস উদযাপন কৰিছিল। সেই সময়ত সংঘটিত হয় এই কৰুণ ঘটনা।
সেই সময়ত বহুতে অনুষ্ঠানটো ৰেকৰ্ডিং কৰি আছিল। সেই ভিডিঅ’টোত দেখা গৈছে যে অনুষ্ঠানৰ সময়তে হঠাতে মাটিত লুটি খাই পৰি যায় এজন জ্যেষ্ঠ আৰক্ষী বিষয়া। ছটফটাই থাকি নিথৰ হৈ পৰে। এনে ঘটনাত তেওঁৰ সহকৰ্মীসকল স্তম্ভিত হৈ পৰিছিল। সকলো বাদ দি আৰক্ষী বিষয়াজনক চিকিৎসালয়লৈ লৈ গ’ল। সূত্ৰ অনুসৰি এই অনুষ্ঠানৰ সময়ত ব্যক্তিজনৰ হাৰ্ট এটেক হয়। পিছত যেতিয়া তেওঁক চিকিৎসালয়লৈ লৈ যোৱা হয়, তেতিয়া তাতেই তেওঁৰ মৃত্যু হোৱা বুলি কোৱা হয়।
আৰক্ষীৰ সূত্ৰ অনুসৰি ওমেৰগা তহচিলৰ তালমোদ সীমান্তৰ চেকপইণ্টত পতাকা উত্তোলন অনুষ্ঠান চলি আছিল। অনুষ্ঠানৰ অন্তত ৫৬ বছৰীয়া মোহন যাদৱে সহকৰ্মীসকলৰ সৈতে গ্ৰুপ ফটো এখনৰ বাবে থিয় হৈ থকা অৱস্থাত হঠাৎ অসুস্থ অনুভৱ কৰি ঢলি পৰে।
জানিব পৰা মতে গণৰাজ্য দিৱসৰ নিৰাপত্তাৰ প্ৰতি লক্ষ্য ৰাখি বিভিন্ন স্থানত অতিৰিক্ত আৰক্ষী মোতায়েন কৰা হৈছিল। ধাৰাশিৱৰ উমৰগড়ৰ তালমোদ চেকপোষ্টতো আৰক্ষী মোতায়েন কৰা হয়। প্ৰোহিবিশ্যন অফিচাৰ মোহন যাদৱ তাত কৰ্তব্যত আছিল।
গণৰাজ্য দিৱসৰ কাৰ্যসূচীত কোনো ধৰণৰ সমস্যাৰ পৰা হাত সাৰিবলৈ ধাৰাশিৱৰ উমৰগড়ৰ তালমোদ চেকপোষ্টত আৰক্ষী মোতায়েন কৰা হয়। নিহত লোকজনৰ নাম প্ৰোহিবিশ্যন অফিচাৰ মোহন যাদৱ বুলি ঘোষণা কৰা হৈছে। মৰণোত্তৰ পৰীক্ষাৰ প্ৰতিবেদনত গুৰুতৰ হাৰ্ট এটেকক মৃত্যুৰ কাৰণ হিচাপে উল্লেখ কৰা হৈছে।
ইপিনে, পৰিয়ালটোৱে কয় যে সেইদিনা ৰাতিপুৱাও তেওঁ সম্পূৰ্ণ সুস্থ আছিল, অসুস্থতাৰ কোনো লক্ষণ নাছিল। অনুষ্ঠানলৈ যাবলৈ নিয়মমতে নিজকে সাজু কৰি লৈছিল। পৰিয়ালটোৱে দাবী কৰে যে ভিতৰি কিবা সমস্যা অনুভৱ কৰিলেও তেওঁ কাকো কোৱা নাছিল।
মঙলবাৰে সোলাপুৰত তেওঁৰ অন্তিম অনুষ্ঠান সম্পন্ন কৰা হয়। আৰক্ষী বিষয়া মোহন যাদৱৰ আকস্মিক মৃত্যুত প্ৰশাসন আৰু সহযোগীসকলৰ মাজত শোকৰ ছাঁ পৰিছে। আৰক্ষী জোৱানৰ মাজত তেওঁ এজন কৰ্তব্যপৰায়ণ আৰু অনুশাসিত বিষয়া হিচাপে পৰিচিত আছিল। তেওঁৰ অকাল মৃত্যুত তেওঁৰ পৰিয়াল আৰু সহকৰ্মীসকল স্তম্ভিত হৈ পৰিছে।
