নীলা ভিখে পাটিলৰ জন্ম ছুইডেনত। কিন্তু তেওঁৰ শিপা আছে মহাৰাষ্ট্ৰতেই। তেওঁ শৈশৱো ইয়াতেই কটাইছিল। এইবাৰ তেওঁ ছুইডেনৰ সাংসদ হিচাপে নিৰ্বাচিত হৈছে। গ্ৰীণ পাৰ্টিৰ হৈ ষ্টকহ’ম চিটি চেণ্টাৰৰ পৰা জয়লাভ কৰিছে নীলাই। অৱশ্যে তেওঁ কেৱল ভাৰতীয় মূলৰ হোৱাই নহয়, তেওঁৰ আন এক পৰিচয়ো আছে। নীলা মহাৰাষ্ট্ৰ বিজেপি নেতা তথা জলসম্পদ মন্ত্ৰী ৰাধাকৃষ্ণ ভিখে পাটিলৰ ভতিজী।
নীলাই শৈশৱ আহমেদনগৰত কটাইছে। পিছত তেওঁ ছুইডেনলৈ উভতি যায়। তেওঁ ৰাজনৈতিক পৰিয়ালত ডাঙৰ-দীঘল হৈছিল। অৱশ্যে তেওঁৰ পিতৃ অশোক ভিখে পাটিলৰ ৰাজনীতিৰ লগত কোনো সম্পৰ্ক নাই। তেওঁ মহাৰাষ্ট্ৰৰ শিক্ষাবিদ। কিন্তু নীলাৰ ককাক হৈছে প্ৰাক্তন কেন্দ্ৰীয় মন্ত্ৰী বালাছাহেব ভিখে পাটিল। আৰু খুৰাক ৰাধাকৃষ্ণ ভিখে পাটিল এতিয়া মহাৰাষ্ট্ৰৰ জলসম্পদ মন্ত্ৰী।
নীলাই ছুইডেনৰ গোটেনবাৰ্গ স্কুল অৱ বিজনেছৰ পৰা অৰ্থনীতি বিজ্ঞানত স্নাতক ডিগ্ৰী লাভ কৰে। পিছলৈ তেওঁ এম বি এ কৰে। আইনৰ শিক্ষাও লৈছিল। এই সময়ছোৱাতে তেওঁ গ্ৰীণ পাৰ্টিত যোগদান কৰে। পঢ়া-শুনা সমাপ্ত কৰি কেইবাটাও সংগঠনত কাম কৰিছিল। ২০২০ চনত PwC Sweden ত যোগদান কৰে। পাঁচ বছৰৰ পিছত ২০২৫ চনত পাব্লিক একাউণ্টেণ্ট হয়।
নীলাই কেইবাবছৰ ধৰি ছুইডেনৰ ৰাজনীতিত সক্ৰিয় হৈ আছে। কলেজত পঢ়ি থকাৰ সময়তে গ্ৰীণ পাৰ্টি (মিলজোপাৰ্টিয়েট)ত যোগদান কৰে। দলটোৰ যুৱ সংগঠন ছুইডিছ ইয়ং গ্ৰীণছ, গ্ৰীণ পাৰ্টি গোটেনবাৰ্গ, ছুইডেনৰ গ্ৰীণ ষ্টুডেণ্টছৰ বিভিন্ন দায়িত্ব চম্ভালিছে। পিছলৈ দলটোৰ ষ্টকহ’ম শাখাৰ কাৰ্যনিৰ্বাহক সমিতিতো স্থান লাভ কৰে। তেওঁ ষ্টকহোম গ্ৰীণ পাৰ্টিৰ নিৰ্বাচনী সমিতিৰ সদস্যও আছিল।
পিছত তেওঁক ডাঙৰ দায়িত্ব দিয়া হয়। তেওঁ প্ৰধানমন্ত্ৰী ষ্টেফান লফভেনৰ ৰাজনৈতিক উপদেষ্টা হিচাপে যোগদান কৰে। পিছলৈ তেওঁ ষ্টকহোম চহৰ পৰিষদলৈও নিৰ্বাচিত হয়। এইবাৰ গ্ৰীণ পাৰ্টিয়ে ছুইডেনৰ ৰাষ্ট্ৰীয় নিৰ্বাচনত তেওঁক মনোনীত কৰে। ষ্টকহ’মৰ সমষ্টিৰ পৰা বিপুল ভোটত জয়ী হয়। দেশৰ শিশু আৰু পৰিৱেশৰ বাবে কাম কৰিব বিচাৰে নীলাই। তেওঁ কয়, ‘মই ভোট দিব নোৱাৰাসকলৰ হৈ কথা ক’ব বিচাৰো। মই চহৰ আৰু দেশৰ বাবে আৰু অধিক কিবা কৰিব বিচাৰো।’
যদিও ছুইডেনত আছে, ভাৰতৰ সৈতে তেওঁৰ সম্পৰ্ক এতিয়াও অবিচ্ছেদ্য। নীলাই কয়, ‘মই ভাৰতক বৰ ভাল পাওঁ। দেশৰ লগত মোৰ সংযোগ আছে। বহু ভাৰতীয় মোৰ ঘনিষ্ঠ বন্ধু।’
উল্লেখ্য যে ৩৪৯খন আসনৰ ৰাষ্ট্ৰীয় নিৰ্বাচনত ছ’চিয়েল ডেম’ক্ৰেটকে ধৰি চাৰিটা বিৰোধী দলে ১৭৬খন আসন লাভ কৰে। নীলাৰ গ্ৰীণ পাৰ্টিয়ে ২২খন আসনত জয়লাভ কৰে। ছ’চিয়েল ডেম’ক্ৰেট দলে ৯৯খন আসনেৰে সৰ্ববৃহৎ দল হিচাপে আত্মপ্ৰকাশ কৰিছে।
