ৰাষ্ট্ৰীয়তাবাদী কংগ্ৰেছ আৰু কংগ্ৰেছ দলৰ সৈতে মিত্ৰতাৰেৰে চৰকাৰ গঠন কৰি মুখ্যমন্ত্ৰী হোৱাৰ পাছৰে পৰা মহাৰাষ্ট্ৰৰ প্ৰাক্তন মুখ্যমন্ত্ৰী উদ্ধাৱ থাকৰেৰ আৰু বিজেপিৰ সম্পৰ্ক অহি-নকুল সদৃশ হৈ আহিছে। প্ৰতিশোধৰ জ্বালাত থকা বিজেপিয়ে অৱশেষত একনাথ সিন্দেক মুখ্যমন্ত্ৰীত্বৰ টোপ দি শিৱসেনাক উলম্ব বিভাজন কৰে। যাৰফলত মুখ্যমন্ত্ৰীত্বৰ পৰা ছিটিকি পৰাই নহয় নিজ দল শিৱসেনাৰ উলম্ব বিভাজনকো ৰক্ষা কৰাটো ব্যৰ্থ হয় উদ্ধৱ থাকৰে।
এতিয়া বিজেপি নেতা তথা মহাৰাষ্ট্ৰৰ উপমুখ্যমন্ত্ৰী দেৱেন্দ্ৰ ফাদনভিছে এই উদ্ধৱ থাকৰেকে শত্ৰু নহয় বুলি কৈ নৰম হোৱা দেখা গৈছে। উপমুখ্যমন্ত্ৰী ফানদভিছে কয়, “আমি আমাৰ ৰাজনৈতিক প্ৰতিদ্বন্দ্বীক শত্ৰু বুলি গণ্য নকৰো। উদ্ধৱ থাকৰে আৰু আদিত্য থাকৰে এটা বেলেগ পথ বাছি লৈছে, আমাৰ পথ বেলেগ। আমি শত্ৰু নহয়, আমাৰ মতাদৰ্শগত পাৰ্থক্য আছে।”
অৰ্থাৎ শিৱসেনাক বিভাজিত কৰোৱাই দুয়ো ফৈদৰ মাজত অব্যাহত থকা বছৰজোৰা আইনী যুঁজে সৃষ্টি কৰা ৰাজনৈতিক পৰিৱৰ্তনক লৈ ঘঁৰিয়ালৰ চকুপানী টুকিছে শকুনি সদৃশ দেৱেন্দ্ৰ ফাডনভিছে। তেওঁ কয় যে মহাৰাষ্ট্ৰ সভ্য আৰু সংস্কৃতিবান বৈশিষ্ট্যৰ বাবে পৰিচিত, যিবোৰ ইয়াৰ অন্তৰ্নিহিত শক্তি।
উল্লেখ্য যে বিজেপিৰ সৈতে ক্ষমতাত থকা একনাথ সিন্দে ফৈদে শিৱসেনাৰ নাম আৰু প্ৰতীক লাভ কৰিছে। কিন্তু বিজেপিয়েও জানে যে মাৰাঠীৰ লোকৰ আৱেগিক সহানুভূতিৰ ঢৌ উদ্ধৱ থাকৰেৰ লগতেই থাকিব। বাবা চাহেব বাল থাকৰে প্ৰতিষ্ঠা কৰাৰ পিছৰে পৰা শিৱসেনা থাকৰে পৰিয়ালক কেন্দ্ৰ কৰিয়েই মহাৰাষ্ট্ৰত খোপনি পুটি আছে। ইফালে বাল থাকেৰেৰ প্ৰতি এতিয়াও মাৰাঠী জনতাৰ আৱেগবিহ্বল টান আছে।
ইফালে দলটো বিভাজিত হোৱাৰ লগতে দলৰ নাম আৰু প্ৰতীক হেৰুওৱাৰ পাছত উদ্ধৱ থাকৰেই মুকলিকৈ কৈছে তেওঁৰ পিতৃ বাল থাকৰেৰ উত্তৰাধিকাৰ লুণ্ঠন কৰা হৈছে আৰু বিজেপিক ইয়াৰ উচিত প্ৰতিশোধ ল’ব। বিজেপিয়ে জানে যে উদ্ধৱসেনাই আৱেগৰ ধল বোৱাই আগন্তুক সময়ত একনাথ সিন্দেৰ লগতে বিজেপিৰ প্ৰতিটো ভাবুকি সৃষ্টি কৰি তুলিব পাৰে।
ইয়াৰ মাজতে বিজেপিৰ এগৰাকী জ্যেষ্ঠ কাৰ্যকৰ্তাই দ্য ইণ্ডিয়ান এক্সপ্ৰেছক কয়, “দলটোৰ নাম আৰু প্ৰতীকৰ বাবে যুঁজখন উদ্ধৱসেনা আৰু সিন্দে ফৈদৰ মাজত হৈছিল। কিন্তু উদ্ধৱৰ সপক্ষে থকা জনসাধাৰণৰ আৱেগে বিজেপিৰ ভাবমূর্তি কলংকিত কৰিব৷ এই বছৰ হ’বলগীয়া বিএমচি নিৰ্বাচন আৰু ২০২৪ চনত লোকসভা আৰু বিধানসভা নিৰ্বাচনৰ পূৰ্বে আমি আমাৰ ৰোডমেপ সাৱধানে শুধৰাই দিব লাগিব।”
বিজেপিৰ আন আন নেতাসকলেও যুক্তি আগবঢ়ায় যে ২০১৯ চনত এন ডি এ ত্যাগ কৰাৰ বাবে উদ্ধৱ থাকৰেক শিক্ষা দিয়াটোৱেই আছিল দলটোৰ মূল উদ্দেশ্য আৰু সেয়া ইতিমধ্যে সাধন হৈছে। তেওঁলোকে কয় যে এতিয়া দলটো আগবাঢ়িব লাগে।
