নাগৰিকজনৰ নাম ড’নাল্ড ট্ৰাম্প। ছবিখনৰ ঠাইত জিলিকি আছে আমেৰিকাৰ ৰাষ্ট্ৰপতিৰ মুখখন। অৱশ্যে ঠিকনা মহাৰাষ্ট্ৰৰ কাৰ্জাট-জামখেদ বিধান সভা সমষ্টি।
কাৰ্জাট-জামখেদ বিধানসভা সমষ্টিৰ বিধায়ক ৰোহিত পাৱাৰৰ বিৰুদ্ধে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ নামত আধাৰ কাৰ্ড বনোৱাৰ অভিযোগ উঠিছে। এই অভিযোগক লৈ দক্ষিণ মহাৰাষ্ট্ৰৰ চাইবাৰ আৰক্ষী থানাত ৰাষ্ট্ৰীয়তাবাদী কংগ্ৰেছ পাৰ্টিৰ (এন চি পি) বিধায়ক ৰোহিত পাৱাৰৰ বিৰুদ্ধে এজাহাৰ দাখিল কৰা হৈছে।
জানিব পৰা মতে, ১৬ অক্টোবৰত এন চি পিৰ বিধায়কগৰাকীয়ে সংবাদমেলযোগে দাবী কৰিছিল যে চৰকাৰৰ অনুমোদন নোপোৱা ৱেবছাইট ব্যৱহাৰ কৰি মাত্ৰ ২০ টকা খৰচ কৰি ভুৱা আধাৰ কাৰ্ড অতি সহজে বনাব পাৰি। ইয়াৰ প্ৰমাণ হিচাপে তেওঁ ড’নাল্ড ট্ৰাম্পৰ নাম আৰু ফটো থকা এই ভোটাৰ কাৰ্ডখন তুলি ধৰিছিল। যিটো তেওঁ নিজেই বনাইছে বুলি দাবী কৰিছিল। আধাৰৰ সুৰক্ষা কিমান দুৰ্বল সেইটো প্ৰমাণ কৰিবলৈ এই কাৰ্ডখন বনাইছে বুলি দাবী কৰে বিধায়কগৰাকীয়ে।
পাৱাৰে কৈছিল যে এই অভিযানৰ উদ্দেশ্য আছিল ভুৱা আধাৰ কাৰ্ড তৈয়াৰ কৰাটো কিমান সহজ সেইটো দেখুওৱা। আধাৰৰ সুৰক্ষা কিমান দুৰ্বল ইয়াৰ দ্বাৰা প্ৰমাণিত হয় বুলি তেওঁ দাবী কৰে। এই পদ্ধতিৰে মহাৰাষ্ট্ৰৰ ভোটাৰ তালিকাত ভুৱা ভোটাৰ পঞ্জীয়ন কৰা সম্ভৱ বুলিও তেওঁ কয়।
একে সময়তে তেওঁ আধাৰ ডাটা ষ্ট’ৰেজৰ বিপদৰ বিষয়েও ব্যাখ্যা কৰে। আৰক্ষীৰ সূত্ৰ অনুসৰি বিধায়ক ৰোহিত পাৱাৰৰ বিৰুদ্ধে ভুৱা আধাৰ কাৰ্ড তৈয়াৰ কৰি বিতৰণৰ অভিযোগ উত্থাপন হৈছে। তথ্য প্ৰযুক্তি আইনৰ অধীনত জালিয়াতি, পৰিচয় চুৰি আৰু ভুৱা তথ্য প্ৰচাৰৰ অভিযোগত এটা গোচৰ ৰুজু কৰা হৈছে।
