দিখৌ নদীত দুৰ্ঘটনাত পতিত গুৱাহাটীৰ হৰেণ বৰাৰ পাঁচজনীয়া পৰিয়ালটোক উদ্ধাৰ কৰাৰ কেই ঘন্টা মানৰ ব্যৱধানত গুৱাহাটীৰ শুক্ৰেশ্বৰ ঘাটৰ পৰা উত্তৰ গুৱাহাটীলৈ যোৱা ‘ব্ৰহ্মপুত্ৰ’ নামৰ যাত্ৰীবাহী ভটভটী নাৱখন ব্ৰহ্মপুত্ৰৰ বুকুত, উত্তৰ গুৱাহাটীৰ মধ্যম খণ্ডৰ অশ্বক্লান্ত দেৱালয়ৰ সমীপত সংঘটিত এক শোকাবহ নাও দুৰ্ঘটনাই অসমবাসীৰ বুকু মুচৰি গৈছে।
দুৰ্ঘটনাগ্ৰস্ত নাওখনে ইয়াৰ বহন ক্ষমতাৰ বিপৰীতে অত্যাধিক যাত্ৰী আৰু দুচকীয়া বাহন কঢ়িয়াই নিছিল। সমগ্ৰ ৰাজ্য কঁপাই যোৱা এই অসহনীয় খবৰ দুটা শুনাৰ পাছত পাছত মাজুলীবাসী অধিক শংকিত হৈ পৰিছে।
মাজুলী জিলাৰ প্ৰায় দুই লাখৰো অধিক মানুহক চৰকাৰে নৌকা যাত্ৰাৰ আধুনিকীকৰণৰ নামত ‘কণা হাঁহক পতান দিয়া’ৰ দৰে দি নতুনকৈ কেইখনমান জাহাজ উপহাৰ দিয়েই দায়িত্ব সামৰিলে। যি চাৰিখন ফেৰী মুখ্যমন্ত্ৰীয়ে মাজুলীত মুকলি কৰিলে তাৰে দুখন ফেৰী নিৰ্মাণত বিসংগতি থকাৰ বাবে আভ্যন্তৰীণ জল পৰিবহন বিভাগে দুদিন চলায়েই বন্ধ কৰি দিলে। ইয়াৰ বিপৰীতে যাত্ৰীবাহী ফেৰী দুখনৰ এখন মাল কঢ়িওৱাত ব্যৱহাৰৰ উপযোগীকৈ পুনৰ নিৰ্মাণ কৰি লয় বিভাগটোৱে। পিছে মাল কঢ়িওৱা ফেৰীখনৰ ইঞ্জিন বিকল হোৱাত নিমাতীতে পৰি ৰৈছে মুখ্যমন্ত্ৰীয়ে মাজুলীবাসীক দিয়া উপহাৰ।
ইফালে কমলাবাৰী ফেৰী-ঘাট আভ্যন্তৰীণ জল পৰিবহন বিভাগৰ কিছু নিয়ন্ত্ৰণত আছে যদিও অফলামূখ ফেৰী-ঘাটত নিতৌ অতি বিপদসংকুলভাৱে যাত্ৰী সকলক পাৰাপাৰ কৰি আহিছে। যাত্ৰী আৰু যান-বাহন পাণ জপাদি জাপি এক ভয়াবহ বিপদৰ মাজেদি নিতৌ ফেৰী চলাই অহা হৈছে। দ্বীপবাসীৰ বহু প্ৰত্যাশিত আৰু প্ৰস্তাৱিত যোৰহাট-মাজুলী সংযোগী দলঙখনৰ কাম ক্ষীপ্ৰতাৰে আগবঢ়াই নিবলৈও মাজুলীবাসীয়ে আহ্বান জনাইছে । অন্যথা অনাগত দিনত গুৱাহাটীৰ অভিশপ্ত নাও দুৰ্ঘটনাটোৰ দৰে মাজুলীৰ মানুহৰ বাবেও এনে ভয়ংকৰ দুৰ্যোগ নামি আহিব পাৰে সেই কথা একপ্ৰকাৰ নিশ্চিত বুলিব পাৰি।
এই ক্ষেত্ৰত মাজুলীৰ সৰ্বস্তৰৰ ৰাইজ, দল-সংগঠনৰ আহ্বানৰ প্ৰতি লক্ষ্য ৰাখি জিলা প্ৰশাসনে যাৱতীয় ব্যৱস্থা গ্ৰহণেৰে সকলোৰে জীৱনৰ প্ৰতি নামি আহিব পৰা আশংকা দূৰ কৰিবলৈ শীঘ্ৰে দাবী জনাইছে।
