মালয়েছিয়া চৰকাৰে ১৬ বছৰৰ তলৰ লোকৰ বাবে ছ’চিয়েল মিডিয়া নিষিদ্ধ কৰিছে।সোমবাৰৰ পৰা কাৰ্যকৰী হৈছে এই নতুন অনলাইন সুৰক্ষা নিয়ম। নতুন আইন অনুসৰি ১৬ বছৰৰ তলৰ কোনো লোকে ছ’চিয়েল মিডিয়া একাউণ্ট খুলিব নোৱাৰিব। একে সময়তে ফেচবুক, ইনষ্টাগ্ৰাম, টিকটক, ইউটিউবৰ দৰে জনপ্ৰিয় প্লেটফৰ্মসমূহে ব্যৱহাৰকাৰীৰ বয়স পৰীক্ষা কৰাৰ ব্যৱস্থা প্ৰৱৰ্তন কৰিব লাগিব।
সমগ্ৰ বিশ্বতে শিশু আৰু কিশোৰ-কিশোৰীৰ মানসিক স্বাস্থ্য, চাইবাৰ প্ৰতাৰণা, অনলাইন আসক্তি আৰু ক্ষতিকাৰক বিষয়বস্তুৰ প্ৰতি উদ্বেগ বাঢ়িছে। সেই পৰিৱেশত মালয়েছিয়াই এই পদক্ষেপ গ্ৰহণ কৰিছে। দেশত কমেও ৮০ লাখ ব্যৱহাৰকাৰী থকা সকলো ছ’চিয়েল মিডিয়া প্লেটফৰ্মতে এই নতুন নিয়ম প্ৰযোজ্য হ’ব।
মালয়েছিয়াৰ যোগাযোগ আৰু মাল্টিমিডিয়া আয়োগে কয় যে ১৬ বছৰৰ তলৰ ব্যৱহাৰকাৰীয়ে আৰু নতুন ছ’চিয়েল মিডিয়া একাউণ্ট খুলিব নোৱাৰিব। একে সময়তে প্লেটফৰ্মসমূহক বয়স পৰীক্ষা কৰিবলৈ ৰাষ্ট্ৰীয় পৰিচয় পত্ৰ, পাছপ’ৰ্ট বা চৰকাৰী নথি-পত্ৰৰ সহায় ল’বলৈ নিৰ্দেশ দিয়া হৈছে।
অৱশ্যে এই নিয়ম কাৰ্যকৰী হ’লেও কোম্পানীসমূহক ইয়াক কাৰ্যকৰী কৰিবলৈ কিছু সময় দিয়া হ’ব। এই ‘গ্ৰেচ পিৰিয়ড’ কিমান দিন হ’ব সেয়া এতিয়াও স্পষ্ট কৰা নাই কৰ্তৃপক্ষই।
বয়স পৰীক্ষণৰ উপৰিও নতুন নিয়মত ছ’চিয়েল মিডিয়া কোম্পানীসমূহৰ ওপৰত অধিক কঠোৰ দায়িত্ব আৰোপ কৰা হৈছে। ইয়াৰ উপৰিও কোম্পানীসমূহক ক্ষতিকাৰক বিষয়বস্তু নিয়ন্ত্ৰণ কৰাৰ বাবে সক্ৰিয় পদক্ষেপ ল’বলৈ, অভিযোগৰ ব্যৱস্থা শক্তিশালী কৰিবলৈ, বিজ্ঞাপনদাতাৰ পৰিচয় পৰীক্ষা কৰিবলৈ আৰু প্ৰয়োজন হ’লে পৰিৱৰ্তিত বা বিভ্ৰান্তিকৰ বিষয়বস্তুৰ ওপৰত সতৰ্কবাণী লেবেল প্ৰদান কৰিবলৈ বাধ্য কৰায়।
নিয়ম মানি নচলা কোম্পানীক এক কোটি মালয়েছিয়ান ৰিংগিট পৰ্যন্ত জৰিমনা বিহা হ’ব পাৰে বুলি চৰকাৰে কয়, যিটো ভাৰতীয় মুদ্ৰাত কেইবা কোটি টকাৰ সমতুল্য।
শিশুৰ ছ’চিয়েল মিডিয়াৰ ব্যৱহাৰ নিয়ন্ত্ৰণত অকলে নহয় মালয়েছিয়া। যোৱা বছৰ অষ্ট্ৰেলিয়াই বিভিন্ন প্লেটফৰ্মক ১৬ বছৰৰ তলৰ লোকৰ একাউণ্ট বন্ধ কৰিবলৈ নিৰ্দেশ দিছিল।ইণ্ডোনেছিয়াইও ইয়াক অনুসৰণ কৰিছে। মাৰ্চ মাহৰ পৰা ১৬ বছৰ অনুৰ্ধৰ বাবে কেইবাটাও জনপ্ৰিয় প্লেটফৰ্ম নিষিদ্ধ কৰা হৈছে। ইউৰোপৰ কেইবাখনো দেশেও এনেধৰণৰ আইন ঘোষণা কৰিছে।
অৱশ্যে মালয়েছিয়াৰ এই সিদ্ধান্তইও বিতৰ্কৰ সৃষ্টি কৰিছে। মত প্ৰকাশৰ স্বাধীনতাৰ ওপৰত কাম কৰা আন্তঃৰাষ্ট্ৰীয় সংস্থা আৰু কিছুমান মানৱ অধিকাৰ সংগঠনে এই নিষেধাজ্ঞাক “ব্লেংকেট বেন’’ বুলি অভিহিত কৰিছে। তেওঁলোকৰ মতে, মূল লক্ষ্য হ’ব লাগে শিশুক ডিজিটেল জগতৰ পৰা আঁতৰাই দিয়া নহয়, বৰঞ্চ এক নিৰাপদ পৰিবেশ গঢ়ি তোলা।
মালয়েছিয়া চৰকাৰে স্পষ্ট কৰি দিছে যে এই নীতিৰ উদ্দেশ্য শিশুসকলক প্ৰযুক্তিৰ পৰা আঁতৰাই ৰখা নহয়, বৰঞ্চ নিৰাপদ আৰু বয়স অনুসৰি ছ’চিয়েল মিডিয়া ব্যৱহাৰৰ পৰিৱেশ গঢ়ি তোলা। এই নিয়ম কাৰ্যকৰী কৰাত বিশ্বৰ আন দেশৰ দৰে মালয়েছিয়াও কিমান সফল হ’ব সেয়া হ’ব লক্ষ্যণীয়।
