যোৰহাটস্থিত অসম মহিলা বিশ্ববিদ্যালয়ৰ প্ৰথম গৰাকী উপাচাৰ্য হিচাপে ড০ মালিনী গোস্বামীক নিযুক্তি দিয়া হৈছে।
আজি ৰাজ্য চৰকাৰৰ উচ্চ শিক্ষা বিভাগে জাৰি কৰা এক জাননীৰ জৰিয়তে অসমৰ ৰাজ্যপাল তথা মহিলা বিশ্ববিদ্যালয়খনৰ আচাৰ্য জগদীশ মুখীয়ে ড০ মালিনী গোস্বামীক উপাচাৰ্য ৰূপে নিযুক্তি প্ৰদান কৰে।
গুৱাহাটী বিশ্ববিদ্যালয়ৰ অসমীয়া বিভাগৰ মুৰব্বী অধ্যাপিকা হিচাপে কৰ্মৰত মালিনী গোস্বামীক অহা পাঁচ বছৰৰ বাবে মহিলা বিশ্ববিদ্যালয়খনৰ উপাচাৰ্য হিচাপে নিযুক্তি দিছে।
দীৰ্ঘদিন ধৰি উপাচাৰ্য নিযুক্তিৰ সমস্যাই জুৰুলা কৰি থকা উত্তৰ-পূবৰ একমাত্ৰ মহিলা বিশ্ববিদ্যালয়খনে বুধবাৰ অৰ্থাৎ ১১ ছেপ্তেম্বৰত ষষ্ঠ সংখ্যক প্ৰতিষ্ঠা দিৱস পালন কৰে।
গোস্বামীক উপাচাৰ্য হিচাপে নিযুক্তি দিয়াৰ পূৰ্বে চলিত বছৰৰ জুলাই মাহত অৱসৰ গ্ৰহণ কৰা অসম কৃষি বিশ্ববিদ্যালয়ৰ উপাচাৰ্য কে এম বুজৰবৰুৱাই মহিলা বিশ্ববিদ্যালয়খনৰ মেণ্টৰ হিচাপে দায়িত্বত আছিল।
প্ৰতিষ্ঠাৰ ছবছৰৰ মূৰত ড০ মালিনী গোস্বামীক বিশ্ববিদ্যালয়খনৰ স্থায়ী উপাচাৰ্য হিচাপে নিযুক্তি দিয়াত আনন্দিত হৈছে অধ্যয়নৰত ছাত্ৰী সকল।
উল্লেখ্য যে প্ৰতিষ্ঠাকালৰে পৰা বিশ্ববিদ্যালয়খনৰ সকলো শিক্ষকে তদৰ্থভিত্তিক (ad hoc) সেৱা আগবঢ়াই আহিছে।