কাগজে-কলমে বৰ্তমান তৃণমূল কংগ্ৰেছৰ হাতত ৭৮ জন বিধায়ক আছে। কিন্তু দলৰ মুৰব্বী মমতা বন্দোপাধ্যায়ে ৱাই চেনেলত আয়োজন কৰা ধৰ্ণা কাৰ্যসূচীত ১০ জন বিধায়কো উপস্থিত নাথাকিল। কাৰ্যসূচীস্থলীত মাত্ৰ ৬ জন বিধায়ক আৰু ৫ জন সাংসদকহে দেখা গ’ল। মঙলবাৰে ৰাজপথলৈ ওলাই আহি নিজৰ শক্তি প্ৰদৰ্শনৰ চেষ্টা চলাইছিল মমতা বন্দোপাধ্যায়ে। কিন্তু নিৰ্বাচনৰ পিছত আয়োজন কৰা এই কাৰ্যসূচীতো তৃণমূলৰ সাংগঠনিক দুৰ্বলতা স্পষ্ট হৈ পৰিল।
অৱশ্যে দলৰ এই দুৰৱস্থাৰ মাজতো আত্মবিশ্বাসী হৈ আছে মমতা বন্দোপাধ্যায়। তেওঁ কয় যে জীয়াই থকালৈকে বিজেপিক বংগৰ পৰা উৎখাত কৰাৰ যুঁজ অব্যাহত ৰাখিব। আনহাতে, তাৰকেশ্বৰৰ পৰা তৃণমূলৰ এই অৱস্থাক লৈ তীব্ৰ কটাক্ষ কৰে মুখ্যমন্ত্ৰী শুভেন্দু অধিকাৰীয়ে। তেওঁৰ মতে, দলটোৰ সাংগঠনিক অৱস্থা এতিয়া অত্যন্ত শোচনীয় হৈ পৰিছে।
নিৰ্বাচনত শোচনীয় পৰাজয়ৰ পিছতো মমতা বন্দোপাধ্যায়ে বাৰে বাৰে দাবী কৰি আহিছে যে তেওঁ পৰাজিত হোৱা নাই, বৰঞ্চ ষড়যন্ত্ৰৰ জৰিয়তে তেওঁক হৰুৱাই দিয়া হৈছে। পুনৰ শক্তিশালী ৰূপত উভতি অহাৰ প্ৰত্যাহ্বানো জনাইছিল তেওঁ। দলৰ নেতা-কৰ্মীসকলৰ ওপৰত ভৰসা কৰিয়েই তেওঁ এই আত্মবিশ্বাস প্ৰকাশ কৰিছিল। কিন্তু নিৰ্বাচনৰ কেইদিনমানৰ ভিতৰতে দলটোৰ সংগঠন তাচৰ ঘৰৰ দৰে ভাঙি পৰাৰ অভিযোগ উঠিছে।
মমতা বন্দোপাধ্যায় আৰু অভিষেক বন্দোপাধ্যায়ৰ ঘনিষ্ঠ বুলি পৰিচিত কেইবাজনো পুৰণি নেতাই ইতিমধ্যে দলৰ বিৰুদ্ধে মুকলিকৈ মুখ খুলিবলৈ আৰম্ভ কৰিছে। যোৱা দেওবাৰে কালীঘাটস্থিত মমতা বন্দোপাধ্যায়ৰ বাসগৃহত বিজয়ী বিধায়কসকলক লৈ এখন গুৰুত্বপূৰ্ণ বৈঠক আহ্বান কৰা হৈছিল। কিন্তু ২০ জনতকৈ অধিক বিধায়ক উপস্থিত নথকাৰ বাবে শেষ মুহূৰ্তত বৈঠকখন বাতিল কৰিবলগীয়া হয়।
ইয়াৰ পিছতেই মঙলবাৰে মমতা বন্দোপাধ্যায়ে ধৰ্ণা কাৰ্যসূচীৰ আহ্বান জনায়। কিন্তু ধৰ্ণাস্থলীত মাত্ৰ ৬ জন বিধায়ক আৰু ৫ জন সাংসদৰ উপস্থিতিয়ে তৃণমূলৰ ভিতৰুৱা সংঘাত পুনৰ স্পষ্ট কৰি তোলে।
ধৰ্ণাত উপস্থিত থকা বিধায়কসকল আছিল নয়না বন্দোপাধ্যায়, মদন মিত্ৰ, ববি হাকিম, বিমান বন্দোপাধ্যায়, অশোক দেৱ আৰু শোভনদেৱ চট্টোপাধ্যায়। সাংসদসকলৰ ভিতৰত আছিল ডেৰেক অ’ব্ৰায়েন, সমীৰুল ইছলাম, দোলা সেন, মালা ৰায় আৰু কল্যাণ বন্দোপাধ্যায়। অৰ্থাৎ সাংসদ আৰু বিধায়ক মিলাই ১৫ জন নেতাও মমতাৰ কাষত থিয় নহ’ল।
যোৱা কেইবছৰমান ধৰি মমতা বন্দোপাধ্যায় আৰু অভিষেক বন্দোপাধ্যায়ে দলত যুৱ প্ৰজন্মৰ অংশগ্ৰহণ বৃদ্ধি কৰাৰ ওপৰত গুৰুত্ব আৰোপ কৰি আহিছিল। কিন্তু মঙলবাৰৰ ধৰ্ণাত মমতাৰ কাষত মূলতঃ কেইজনমান পুৰণি নেতাকহে দেখা গ’ল। তাৰ মাজতো মমতা বন্দোপাধ্যায়ে কয় যে তেওঁ কাৰো সুদিনত কাষত নাথাকিলেও দুৰ্দিনত সদায় কাষত থাকে। তৃণমূলৰ বিধায়ক আৰু সাংসদসকলক ভয় দেখুৱাই বিজেপিয়ে দল ভঙাৰ চেষ্টা চলাইছে বুলিও তেওঁ অভিযোগ কৰে।
ইফালে, মমতাৰ ধৰ্ণাক লৈ তীব্ৰ কটাক্ষ কৰে মুখ্যমন্ত্ৰী শুভেন্দু অধিকাৰীয়ে। তেওঁ কয় যে তৃণমূল কংগ্ৰেছৰ অৱস্থা এতিয়া অত্যন্ত শোচনীয়। সংবাদ মাধ্যমৰ ফালৰ পৰা অভিষেক বন্দোপাধ্যায়ে বিধায়কসকলক বাৰে বাৰে ফোন কৰিও সঁহাৰি নোপোৱাৰ কথা পোহৰলৈ অহাত শুভেন্দু অধিকাৰীয়ে ব্যংগাত্মক মন্তব্য কৰে। তেওঁ কয় যে অভিষেক বন্দোপাধ্যায় অসুস্থ আৰু তেওঁক চেলাইন দি ৰখা হৈছে বুলি তেওঁ শুনিবলৈ পাইছে। এনে অৱস্থাত তেওঁ কেনেকৈ ইমান ফোন কৰিব পাৰিছে বুলি প্ৰশ্ন কৰি শুভেন্দুৱে তৃণমূল নেতৃত্বক তীব্ৰ কটাক্ষ কৰে।
