হিমন্ত বিশ্বলৈ কোটি টকীয়া শক্তিশেল মমতাৰ
সাৰধা কেলেংকাৰিত চি বি আইৰ ভূমিকাক কেন্দ্ৰ কৰি ৰণচণ্ডী ৰূপধাৰিণী পশ্চিম বংগৰ মুখ্য মন্ত্ৰী মমতা বেনাৰ্জীয়ে অসমৰ মন্ত্ৰী হিমন্ত বিশ্ব শৰ্মালৈ এইবাৰ এৰিছে ৩ কোটি টকীয়া শক্তিশেল।
কেলেংকাৰিটোৰ মূল অভিযুক্ত সাৰদাৰ মুৰব্বী সুদীপ্ত সেনে অসমৰ প্ৰভাৱশালী মন্ত্ৰীজনে তেওঁৰ পৰা “কমেও ৩ কোটি টকা” লোৱা বুলি লিখা পত্ৰখন তুলি ধৰি মঙলবাৰে এই আক্ৰমণৰ পাতনি মেলিছে বেনাৰ্জীয়ে।
খোদ তদন্তকাৰী সংস্থা চি বি আইলৈ লিখা ১৮ পৃষ্ঠাজোৰা চিঠিখনত সেনে লিখিছে, “আন এজন উচ্চ পৰ্য্যায়ৰ ব্যক্তিয়ে মোক ঠগিছিল। তেওঁ হেমন্ত (হিমন্ত) বিশ্ব শৰ্মা। যোৱা ডেৰ বছৰ বাদ দিও, কেৱল যোৱা ছমাহতে তেওঁ আমাৰ পৰা নগদ কমেও ৩ কোটি টকা লৈছে।” পত্ৰখনত মন্ত্ৰী শৰ্মাৰ লগতে নাম আছে প্ৰাক্তন সাংসদ মাতং সিং আৰু মনোৰঞ্জনা সিঙৰ। কেলেংকাৰিটোত তেওঁলোক দুয়োজনে ইতিমধ্যে কাৰাৱাস খাটিছে।
মুঠ ২২গৰাকী লোকৰ নাম থকা চিঠিখনত হিমন্ত বিশ্বই সাৰধাক ধন ঘটাৰ বাবে “ব্যৱহাৰ” কৰিছিল বুলিও উল্লেখ আছে। সেনৰ পত্ৰখন ৱটচ এপযোগেও ইতিমধ্যে ভাইৰেল হৈ পৰিছে।
অসমৰ মন্ত্ৰীগৰাকীৰ উল্লেখেৰে প্ৰধান মন্ত্ৰী নৰেন্দ্ৰ মোদী আৰু বিজেপি সভাপতি অমিত শ্বাহকো প্ৰত্যাহ্বান জনাইছে মমতা বেনাৰ্জীয়ে।
“আমাৰ হাততে চিঠি আছে। কিবাটো কৰক। বিজেপি কৰিলে সাত খুন মাফ। যত চোৰ, ডকাইত, গুণ্ডা, ক’লা, দাগী, আচামী সৱ সুৰক্ষা পাইছে কাৰণে বিজেপিলৈ গৈছে। আমাক ভয় দেখুৱাই লাভ নাই। আমি ইমান ফাল্টু মানুহ নহয়। আমাৰ হাতটোতো তথ্য-প্ৰমাণ আছে,” ক’লকাতাত মোদী-শ্বাহক এই হুংকাৰ মমতাৰ।
মমতা বেনাৰ্জীৰ আচৰণ “বেদনাদায়ক” বুলি উল্লেখ কৰি মন্ত্ৰী শৰ্মাই মঙলবাৰে কৰা এটা টুইটত কয় যে তেওঁ ঘটনাটোৰ “মাত্ৰ সাক্ষী”হে আৰু তেওঁক ইতিমধ্যেই চি বি আই-এ সোধ পোচ কৰিছে।
The frivolous & baseless campaign by @MamataOfficial Didi against me is very painful. I am not fortunate enough like your Police Commissioner. I've joined the investigations and offered my full cooperation as a witness. And all this happened much much before I joined @BJP4India
— Himanta Biswa Sarma (@himantabiswa) February 5, 2019
নৰ্থ ইষ্ট নাও-এ শৰ্মাৰ মন্তব্য জনাৰ বাবে ফ’নযোগে চেষ্টা কৰিছিল যদিও তেওঁৰ সঁহাৰি পোৱা নগ’ল।
কেলেংকাৰিটো সন্দৰ্ভত শৰ্মাক ২০১৪ চনত চি বি আই-এ সোধ পোচ কৰিছিল। অসমত ব্যৱসায় চলোৱাৰ বাবদ সুদীপ্ত সেনৰ পৰা প্ৰতিমাহে ২০ লাখকৈ টকা লোৱা বুলি তেওঁ অভিযুক্ত হৈছিল।