লোকসভা নিৰ্বাচন সমাগত, গতিকে নিৰ্বাচনী প্ৰচাৰৰ উদ্দেশ্যে ৰাজ্যলৈ সমাগম ঘটিবলৈ ধৰিছে বহু হাই প্ৰফাইল নেতাৰ। অহা ৩০ মাৰ্চৰ দিনা নৰেন্দ্ৰ মোদী বিজেপি প্ৰাৰ্থীৰ হৈ প্ৰচাৰ চলাবলৈ অহাৰ উপৰিও অহা ৩ এপ্ৰিলৰ দিনা কংগ্ৰেছৰ প্ৰাৰ্থীৰ হৈ প্ৰচাৰ চলাবলৈ অসমলৈ আহিব ৰাহুল গান্ধী।
এইক্ষেত্ৰত থমকি ৰোৱা নাই তৃণমূলৰ নেত্ৰী মমতা বেনাৰ্জীও। অহা ৫ এপ্ৰিলৰ দিনা ধুবুৰীৰ টাউনত তৃণমূলৰ প্ৰাৰ্থীৰ হৈ নিৰ্বাচনী প্ৰচাৰ চলাব পশ্চিমবংগৰ মুখ্য মন্ত্ৰীগৰাকীয়ে। উক্ত দিনা ১ বজাত মমতা ধুবুৰীত উপস্থিত হ’ব। নৰ্থ ইষ্ট নাওৰ সৈতে হোৱা কথা-বতৰাত এই কথা জানিবলৈ দিয়ে তৃণমূলৰ ৰাজ্যিক সভাপতি তথা প্ৰাক্তন বিধায়ক গোপী নাথ দাসে।
ইপিনে, মমতাৰ সৈতে ধুবুৰীত তেওঁৰ মন্ত্ৰীসভাৰ মন্ত্ৰীৰ উপৰিও ৰাজ্যসভাৰ তৃণমূলৰ সাংসদেও নিৰ্বাচনী সভাখনত অংশগ্ৰহণ কৰিব। মমতাৰ সৈতে উপস্থিত থাকিবলগীয়া মন্ত্ৰীকেইগৰাকী হৈছে ক্ৰমে ফিৰহাদ হাকিম(কলকাতাৰ মেয়ৰ), ৰবীন্দ্ৰ ঘোষ, গৌতম দেব, চিদ্দিকুল্লা চৌধুৰী।
তদুপৰি, ধুবুৰীত প্ৰচাৰ চলাবলৈ অহাৰ সময়তে মমতা বেনাৰ্জীক গুৱাহাটী আৰু বৰাক উপত্যকাত একোখনকৈ নিৰ্বাচনী সভা অনুষ্ঠিত কৰিবৰ বাবে ৰাজ্যিক তৃণমূলে অনুৰোধ জনাব বুলি দাসে আমাৰ সাংবাদিকৰ আগত কয়।
আনহাতে, ৰাজ্যৰ মুঠ লোকসভাৰ ১৪ টা লোকসভা সমষ্টিৰ ৯ টাতে তৃণমূলে প্ৰাৰ্থিত্ব প্ৰদান কৰিছে বুলি তেওঁ জনায়।
তেওঁ উল্লেখ কৰা অনুসৰি ‘যোৰহাটত প্ৰাৰ্থী ৰিবুলয়া গগৈ, মঙ্গলদৈত সুধেন্দু মোহন তালুকদাৰ, নগাওঁ লোকসভা সমষ্টিত সহদেব দাস, শিলচৰত হিতব্ৰত ৰয়, কৰিমগঞ্জত চন্দন দাস, গুৱাহাটীত মনোজ কুমাৰ শৰ্মা, বৰপেটাত এচাহাক আলি দেৱান, কোকৰাঝাৰত কমলাকান্ত দৈমাৰী আৰু ধুবুৰীত নুৰুল ইছলাম চৌধুৰীক দলটোৱে প্ৰাৰ্থী হিচাপে প্ৰক্ষেপ কৰিছে।
আনহাতে, তৃণমূল সদায় সৰ্বসাধাৰণ ৰাইজৰ লগত থকা বুলি উল্লেখ কৰি তেওঁ কয়, ‘’লোকসভা নিৰ্বাচনত তৃণমূল কংগ্ৰেছৰ যথেষ্ট ভাল ফলাফল হ’ব। ভোটৰ হাৰ বৃদ্ধি পাব।‘’
ইতিমধ্যে দলৰ তৃণমূল কৰ্মী আৰু কাৰ্য্যকৰ্তাসকলে ৯ টা লোকসভা সমষ্টিতে প্ৰচাৰৰ কাম আৰম্ভ কৰা বুলি তেওঁ দাবী কৰে।
ইপিনে, নাগৰিকত্ব সংশোধনী বিধেয়কখনৰ সন্দৰ্ভত পূৰ্বৰে পৰা স্থিতিত অটল থকা বুলি দাবী কৰি দাসে কয়, ‘’ইতিমধ্যে তৃণমূল কংগ্ৰেছৰ সাংসদসকলৰ লোকসভাৰ মজিয়াত বিধেয়কক লৈ ভূমিকা সকলোৱে গম পাইছে। লোকসভাত আমাৰ দলে ‘কেব’ৰ তীব্ৰ বিৰোধিতা কৰিছে।‘’
তেওঁ লগতে কয়, ‘’ভৱিষ্যতে নাগৰিকত্ব সংশোধনী বিধেয়কৰ প্ৰসংগৰ প্ৰশ্ন আহি নপৰে, কিয়নো বিজেপি চৰকাৰ আৰু শাসনলৈ নাহে।‘’
