১৯৮৫ চনৰ ভয়াৱহ এয়াৰ ইণ্ডিয়া বোমা বিস্ফোৰণত নিৰ্দোষী সাব্যস্ত হোৱা কানাডাস্থিত শিখ নেতা তথা ব্যৱসায়ী ৰিপুদামান সিং মালিকক গুলীয়াই হত্যা কৰা হৈছে। আন্ত: ৰাষ্ট্ৰীয় সংবাদ সংস্থা গ্লোবেল নিউজত প্ৰকাশিত প্ৰতিবেদন অনুসৰি বৃহস্পতিবাৰে পুৱা প্ৰায় ৯.৩০ বজাত কানাডাৰ চাৰে চহৰত গুলীচালনাৰ সন্দৰ্ভত ৰয়েল কানাডিয়ান মাউণ্টেড পুলিচে ফোনযোগে খবৰ লাভ কৰে।
ঘটনাস্থলীত উপস্থিত হোৱাৰ পিছত আৰক্ষীয়ে কেইবাটাও বন্দুকৰ গুলীৰ আঘাতত পথৰ কাষতে বাগৰি থকা ৰিপুদামান সিং মালিকক উদ্ধাৰ কৰে। আৰক্ষীয়ে লগে লগে আঘাতপ্ৰাপ্ত মালিকক প্ৰাথমিক চিকিৎসা প্ৰদান কৰে যদিও মালিকৰ প্ৰাণ ৰক্ষা কৰাত বিফল হয় আৰু ঘটনাস্থলীতে তেওঁ মৃত্যুবৰণ কৰে।
ৰয়েল কানাডিয়ান মাউণ্টেড পুলিচে প্ৰকাশ কৰা বিবৃতি অনুসৰি এই হত্যাকাণ্ড সন্দৰ্ভত বৰ্তমানলৈকে কোনো অভিযুক্তক গ্ৰেপ্তাৰ কৰা হোৱা নাই। অপৰাধ সংঘটিত কৰিয়ে হত্যাকাৰীয়ে ঘটনাস্থলীৰ পৰা পলায়ন কৰে বুলি আৰক্ষীয়ে সন্দেহ কৰিছে।
বৰ্তমান কানাডাৰ সৰ্ববৃহৎ হোমিচাইড ইউনিট ইণ্টিগ্ৰেটেড হোমিচাইড ইনভেষ্টিগেচন দলে গোচৰটোৰ তদন্তৰ দায়িত্ব হাতত লৈছে।
উল্লেখ্য যে ১৯৮৫ চনৰ ২৩ জুনত এয়াৰ ইণ্ডিয়া ফ্লাইট ১৮২- ৰ বোমা বিস্ফোৰণত ৮৬ টা শিশুসহ ২৮০ জন কানাডিয়ানে, তথা সৰ্বমুঠ ৩২৯ গৰাকী লোকে প্ৰাণ হেৰুৱাইছিল। টৰণ্টোৰ পৰা লণ্ডন অভিমুখী বিমানখনত আয়াৰলেণ্ডৰ ওচৰতে বোমা বিস্ফোৰণ সংঘটিত হৈছিল। এই ভয়াৱহ বিস্ফোৰণত যাৰ ফলত বিমানখনত থকা সকলো লোক নিহত হৈছিল।
পিছত তদন্ত প্ৰতিবেদনত এই ভয়াৱহ বোমা বিস্ফোৰণৰ ষড়যন্ত্ৰ কানাডাৰ মাটিত ৰচনা কৰা হৈছিল বুলি নিশ্চিত কৰা হৈছিল। পোনপ্ৰথমে এই বোমা বিস্ফোৰণৰ পৰিকল্পনাকাৰী হিচাপে ৰিপুদামান সিং মালিকক অভিযুক্ত কৰা হৈছিল। কিন্তু বিচাৰৰ সময়ত তেওঁ নিৰ্দোষী প্ৰমাণিত হয় আৰু ইন্দ্ৰজিৎ সিং ৰেয়াত নামৰ আন এজন ব্যক্তিক দোষী সাব্যস্ত কৰা হয়।
স্মৰ্তব্য যে উক্ত বোমা বিস্ফোৰণৰ ঘটনাটোত দোষী সাব্যস্ত হোৱা ইন্দ্ৰজিৎ সিং ৰেয়াতেই হৈছে একমাত্ৰ ব্যক্তি। ৰিপুদামান সিং মালিকৰ বিচাৰত মিছা সাক্ষ্য দিয়াৰ বাবে ৰেয়াতক ২০১০ চনত ন বছৰৰ বাবে দণ্ডিত কৰা হৈছিল। ২০১৬ চনত তেওঁক কাৰাগাৰৰ পৰা মুক্তি দিয়া হৈছিল।
