প্ৰাক্তন-প্ৰেয়সীৰ নগ্ন ফটো ছ’চিয়েল নেটৱৰ্কিং ছাইটত আপল’ড কৰি বাক্সা জিলাৰ তামুলপুৰত নগাঁৱৰ এগৰাকী যুৱক ৰঙা ঘৰত সোমাবলগীয়া হয়।
প্ৰাপ্ত তথ্য মতে যোৱা ১৩ জুলাইত ভুক্তভোগী যুৱতী গৰাকীয়ে পাটাছাৰকুছি আৰক্ষী থানাত দিয়া গোচৰৰ ভিত্তিত যোৱা শনিবাৰে আৰক্ষীয়ে নগাঁৱৰ নিপন বৰা নামৰ যুৱকজনক আটক কৰাৰ লগতে তেওঁৰ বিৰুদ্ধে IT আইনৰ আধাৰত ভাৰতীয় দণ্ডবিধিৰ ৪৯৮ (এ) ৩১৫/৫০০ আৰু ৬৭ ধাৰাৰ অধীনত ৪৫৬/১৮ নং এক গোচৰ ৰুজু কৰিছে।
বৰপেটা জিলাৰ পাটাছাৰকুছি আৰক্ষী থানাৰ অধীনৰ নতুন বেলতলা গাঁৱৰ যুৱতীগৰাকীয়ে তেওঁ দাখিল কৰা গোচৰত অভিযুক্ত যুৱকজনে ছ’চিয়েল মেডিয়াত তেওঁৰ নগ্ন ফটো আপল’ড কৰা বুলি উল্লেখ কৰে।
আনহাতে নিপন বৰাৰ সৈতে যোৱা বছৰ কামাখ্যা মন্দীৰত বিবাহপাশত আবদ্ধ হৈ পাঠশালাত একেলগে এটা ঘৰ ভাড়া কৰি বসবাস কৰি আছিল বুলি তেওঁ জানিবলৈ দিয়ে।
কিন্তু কিবা কাৰণত আজি কিছুদিন পূৰ্বে নিপনে তেওঁলোকৰ সম্পৰ্ক চ্ছেদ কৰাৰ লগতে যুৱতীগৰাকীৰ সৈতে যোগাযোগ বন্ধ কৰি দিয়ে বুলি আৰক্ষীয়ে প্ৰকাশ কৰে।
আৰক্ষীয়ে লগতে জানিবলৈ দিয়ে যে নিপনে যুৱতাগৰাকীৰ নামত এটা ভুৱা ফে’চবুক একাউণ্ট খুলি তেওঁৰ ফোন নম্বৰৰ লগতে নগ্ন ফটো আপল’ড কৰে।
আনহাতে যুৱতী গৰাকীয়ে মিছা কথাৰে তেওঁৰ সৈতে ঘণিষ্ঠ সম্পৰ্ক গঢ়ি তুলিছিল বুলি উল্লেখ কৰি নিপনে নৰ্থ-ইষ্ট নাওক কয়, ‘তেওঁ প্ৰথমে নিজকে অবিবাহিত বুলি কৈ মোলৈ অশ্লীল ফটোও পঠিয়াইছিল। কিন্তু যেতিয়াই মই তেওঁ বিবাহিত হোৱাৰ লগতে এজন অন্য যুৱকৰ সৈতে সম্পৰ্ক চলাই থকাৰ কথা গ’ম পালো মই তৎক্ষনাত তেওঁৰ সৈতে মোৰ সম্পৰ্ক চ্ছেদ কৰিলো।‘
আৰক্ষীয়ে অভিযুক্ত নিপনৰ মোবাইল ফোন জব্দ কৰাৰ লগতে পাঠশালাৰ আদালতত হাজিৰ কৰোৱাই। বৰ্তমান তেওঁক ১৪ দিনৰ ন্যায়িক জিম্মালৈ প্ৰেৰণ কৰা হৈছে।
