ওদালগুৰি জিলাৰ ভাৰত-ভূটান সীমান্তৰ পানেৰী আৰক্ষী থানাৰ অন্তৰ্গত হাতীগড় চাহ বাগিচাৰ সমীপৰ সাতঘৰীয়া গাঁৱত বনৰীয়া হাতীৰ আক্ৰমণত এজন লোকে প্ৰাণ হেৰুৱায়। মঙলবাৰে নিশা বনৰীয়া হাতীৰ আক্ৰমণত গাঁৱখনৰ কাডে হেমৰম(৫৪)নামৰ লোকজন নিহত হয়।
জানিব পৰা মতে মঙলবাৰে নিশা প্ৰায় ৯ মান বজাত এটা বনৰীয়া হাতীয়ে গাঁৱৰে খেতিপথাৰত প্ৰৱেশ কৰাৰ পাছত ৰাইজে হাতীটো খেদিবলৈ ওলাই আহে। হঠাতে, হাতীটোৱে ৰাইজৰ পিনে চোঁচা লৈ আক্ৰমণ কৰাত কাডে হেমৰম নামৰ লোকজন ঘটনাস্থলতে মৃত্যু হোৱাৰ লগতে বুধুৱা ভেংৰা নামৰ এজন লোক গুৰুতৰভাৱে আঘাতপ্ৰাপ্ত হয়।
হাতীৰ আক্ৰমণত বুধুৱা ভেংৰা নামৰ লোকজনৰ এখন ভৰি ভাঙি যায় যদিও বৰ্তমান তেওঁ সংকট মুক্ত বুলি জানিব পৰা গৈছে।
উল্লেখ্য যে যোৱা ১১ নৱেম্বৰত ওদালগুৰি জিলাৰ ভাৰত-ভূটান সীমান্তৰ ভূটিয়াচাং নতুন বস্তিত বনৰীয়া হাতীৰ আক্ৰমণত দুজন লোক আৰু ২২ অক্টোবৰৰ পুৱতি নিশা প্ৰায় ৪.৩০ বজাত ওদালগুৰিৰ ডিমাকুছি আৰক্ষী থানাৰ অন্তৰ্গত বদলাপাৰা চাহ বাগানত বিৰাছমণি বাৰা (৪৮) নামৰ এগৰাকী মহিলা চাহ শ্ৰমিকে চাহপাত চিঙি থাকোঁতে বনৰীয়া হাতীয়ে তেওঁক গছকি নিৰ্মমভাৱে হত্যা কৰিছিল।
এনেদৰে ভাৰত-ভূটান সীমান্তৰ গাঁও সমূহত নিশাৰ ভাগত জাকে জাকে বনৰীয়া হাতী প্ৰৱেশ কৰি সন্ত্ৰাসৰ সৃষ্টি কৰি অহাৰ লগতে হাতীয়ে বহু মানুহৰ প্ৰাণ কাঢ়ি লোৱাৰ পাছতো বন বিভাগৰ লোকে একো ব্যৱস্থা গ্ৰহণ নকৰাত ভাৰত-ভূটান সীমান্তবাসীৰ মাজত এতিয়া ক্ষোভৰ উদগীৰণ হোৱা পৰিলক্ষিত হৈছে।
