চিনেমাৰ কাহিনীৰ দৰেই এক কাহিনীয়ে বাস্তৱ ৰূপ পালে উত্তৰপ্ৰদেশৰ প্ৰয়াগৰাজত।
প্ৰায় ১৫ বছৰ আগতে মুক্তি লাভ কৰা শাহিদ কাপুৰ-অমৃতা ৰাও অভিনীত ‘বিবাহ’ নামৰ ছবি খনত দেখুওৱা হৈছিল বিয়াৰ আগে আগে অমৃতাৰ দেহত জুই লাগে আৰু তেওঁ হৈ পৰে কুৰূপা।
ইমানৰ পিছতো নায়ক শাহিদে অমৃতাক পৰিত্যাগ কৰাৰ সলনি বিয়া পাতিছিল।
‘বিবাহ’ ছবি খনৰ দৰেই এক বাস্তৱ কাহিনীৰ নায়ক হৈ পৰিছে উত্তৰ প্ৰদেশৰ প্ৰয়াগৰাজৰ এই গৰাকী যুৱক।
প্ৰয়াগৰাজৰ প্ৰতাপগড়ৰ কুন্ডা অঞ্চলৰ যুৱতী আৰতী মৌৰ্যৰ সৈতে বিয়া ঠিক হৈছিল ওচৰৰে গাওঁৰ অৱধেশৰ সৈতে।
বিয়া অনুষ্ঠিত হ’বলৈ প্ৰায় ৮ ঘণ্টা সময় বাকী থাকোতেই কইনা আৰতীৰ জীৱনলৈ নামি আহে কাল অমানিশা।
ঘৰৰ ছাদত খেলি থকা এটি শিশুক পৰি যোৱাৰ পৰা বচাবলৈ গৈ আৰতী ছাদৰ পৰা তললৈ বাগৰি পৰে ।
ফলত তেওঁৰ ৰাজহাড়ৰ লগতে দেহৰ প্ৰায় ভাগ হাড়েই ভাঙি যায়।
ৰাজহাড় ভঙাৰ বাবে লগে লগে পংগু হৈ পৰে আৰতী।
প্ৰয়াগৰাজৰ চিকিৎসালয়ত ভৰ্তি কৰোৱা আৰতী আৰু কেতিয়াও আগৰ দৰে খোজকাঢ়ি ফুৰিব পৰা নহ’ব বুলি চিকিৎসকে ঘোষণা কৰাৰ পিছতে মূৰত সৰগ ভাগি পৰে কইনা ঘৰৰ সকলো লোকৰ।
এনে জটিল পৰিস্থিতিতো পিছে মুঠেও বিচলিত নহ’ল দৰা অৱধেশ।
কইনা ঘৰে কইনা আৰতীৰ সলনি আৰতীৰ ভনীয়েকক বিয়া পতাৰ বাবে অৱধেশক কয় যদিও কোনো পৰিস্থিতিতে তেনে কৰিবলৈ সন্মত নহ’ল অৱধেশ।
ইয়াৰ বিপৰীতে দৰা অৱধেশে ঘোষণা কৰিলে পূৰ্বে ঠিক হোৱাৰ দৰেই তেওঁ আৰতীকে বিয়া পাতিব।
যি লগ্নত বিয়া পতাৰ কথা আছিল সেই লগ্নতে আৰতীক বিয়া পাতিব বুলি ঘোষণা কৰিলে দৰা অৱধেশে।
অৱধেশৰ কথাত বাধ্যত পৰি আৰতীক কিছুসময়ৰ বাবে এম্বুলেন্সেৰে লৈ যোৱা হ’ল ঘৰলৈ।
আৰতীৰ হাতত চেলাইন। তেনেকৈয়ে আৰতীৰ শিৰত সেন্দুৰ পিন্ধালে অৱধেশে।
ইয়াৰ পিছতে আৰতীক পুনৰ লৈ অহা হ’ল চিকিৎসালয়লৈ।
চিকিৎসালয়ত এতিয়া পত্নীৰ শুশ্ৰূষাত ব্যস্ত অৱধেশ।
তেওঁৰ আশা আৰতী শীঘ্ৰে সুস্থ হৈ উঠিব আৰু তেওঁলোকৰ সংসাৰ ভৰি পৰিব হাঁহি হাঁহি কেৱল হাঁহিৰে।ছেল্যুট অৱধেশ।
