আহমেদাবাদৰ বিমান দুৰ্ঘটনাত চৌদিশে শোকে ছানি ধৰাৰ সময়তে এজন যাত্ৰী জীয়াই থকাৰ খবৰে কিছু স্বস্তি কঢ়িয়াই আনিছে। দুৰ্ঘটনাগ্ৰস্ত বিমানখনৰ ১১এ নম্বৰ ছিটত বহি থকা যাত্ৰীজনক জীৱিত অৱস্থাত উদ্ধাৰ কৰা হৈছে বুলি আৰক্ষীয়ে জানিবলৈ দিয়ে। তেওঁৰ নাম ৰমেশ বিশ্বাস কুমাৰ বুলি জানিব পৰা গৈছে।
আহমেদাবাদৰ আৰক্ষী আয়ুক্ত জি এছ মালিকে সংবাদ সংস্থাক কয় যে, “১১এ চিটত বহি থকা এজন যাত্ৰীক জীৱিত অৱস্থাত উদ্ধাৰ কৰা হৈছে। বৰ্তমান তেওঁ চিকিৎসালয়ত চিকিৎসাধীন হৈ আছে। কিমানজনৰ মৃত্যু হৈছে সেয়া এতিয়াও নিশ্চিতভাৱে কোৱা সম্ভৱ নহয়। যিহেতু বিমানখন জনাঞ্চলত দুৰ্ঘটনাগ্ৰস্ত হৈছে, সেয়েহে মৃত্যুৰ সংখ্যা বৃদ্ধি পাব পাৰে।”
বৃহস্পতিবাৰে দিনৰ ১:৩৮ বজাত আহমেদাবাদ বিমানবন্দৰৰ পৰা উৰা মাৰিছিল বিমানখন। ব্ৰিটেইনৰ গেটৱিক বিমানবন্দৰ অভিমুখে গৈছিল। কিন্তু উৰণৰ পাঁচ মিনিটৰ ভিতৰতে গুজৰাটৰ মেঘনী নগৰৰ অঞ্চলত দুৰ্ঘটনাগ্ৰস্ত হয়।
বিমানখন দুৰ্ঘটনাগ্ৰস্ত হোৱা বহুমহলীয়া অট্টালিকাটো হৈছে বি জে মেডিকেল কলেজৰ মেডিকেল ষ্টুডেন্ট হোষ্টেল। সেই হোষ্টেলত প্ৰায় ৫০ জন চিকিৎসক বাস কৰে বুলি স্থানীয় লোকে দাবী কৰে।
চিকিৎসালয়ৰ সূত্ৰই জনোৱা মতে, বিমান দুৰ্ঘটনাত সেই হোষ্টেলৰ পাঁচজন চিকিৎসকৰ মৃত্যু হয়। এয়াৰ ইণ্ডিয়াই জনোৱা মতে, বিমানত থকা ২৪২ জন লোকৰ ভিতৰত ২৩০ জন যাত্ৰী। বাকী ১২ জন আছিল ক্ৰু বা কৰ্মচাৰী। যাত্ৰীসকলৰ ভিতৰত ৫৩জন ব্ৰিটিছ, ৭জন পৰ্তুগীজ নাগৰিক আৰু ১৬৯জন ভাৰতীয়।
