দেশত দ্ৰুতগতিত বৃদ্ধি পাইছে নাৰীৰ ওপৰত হোৱা অত্যাচাৰ তথা ধৰ্ষণৰ দৰে নিশংস কাণ্ড। দেশত বাঢ়ি অহা এনে ঘৃণনীয় ঘটনাৰ মাজতে মধ্যপ্ৰদেশত সংঘটিত হৈছে মানৱ সমাজক লজ্জানত কৰা এক অতি নিকৃষ্ট ঘটনা।
ৰাজ্যখনৰ এগৰাকী লোকে ধৰ্ষণৰ ঘটনাত কাৰাবাস খাটি জামিনত মুকলি হৈ অহাৰ পিছতে পুনৰ ধৰ্ষণ কৰিছে একেগৰাকী মহিলাকে। এই নৃশংস কাণ্ড সংঘটিত হৈছে মধ্য প্ৰদেশৰ জবলপুৰত।
অভিযুক্ত ব্যক্তিগৰাকীক ২০২০ চনত সেই সময়ত কিশোৰী অৱস্থাত থকা মহিলাগৰাকীক ধৰ্ষণ কৰাৰ বাবে গ্ৰেপ্তাৰ কৰা হৈছিল। প্ৰায় এবছৰৰ পিছত তেওঁক জামিনত মুক্তি দিয়া হৈছিল।
জামিনত মুকলি হৈ অহাৰ পিছত প্ৰতিশোধৰ তাড়নাত ব্যক্তিগৰাকীয়ে কেইদিনমান পূৰ্বে মহিলাগৰাকীক পুনৰ ধৰ্ষণ কৰে। ধৰ্ষণৰ লগতে তেওঁ মহিলাগৰাকীক পূৰ্বে দাখিল কৰা গোচৰ প্ৰত্যাহাৰ কৰিবলৈও ভাবুকি দিয়ে।
ভুক্তভোগী মহিলাগৰাকীয়ে অভিযোগ কৰা মতে এইবাৰ অভিযুক্ত লোকজনে তেওঁৰ বন্ধুবৰ্গৰ সৈতে ঘৰত প্ৰৱেশ কৰি তেওঁক উপৰ্যুপৰি ধৰ্ষণ কৰিছিল।
তেওঁ লগতে দাবী কৰিছে যে ধৰ্ষণকাৰী সকলে এই সমগ্ৰ ঘটনাটোৰ এটা ভিডিঅ’ প্ৰস্তুত কৰিছিল আৰু যদি গোচৰটো প্ৰত্যাহাৰ কৰা নহয়, তেওঁলোকে ভিডিঅ’টো ভাইৰেল কৰাৰ ভাবুকি দিয়ে।
উল্লেখ্য যে ভুক্তভোগী মহিলাগৰাকীৰ বয়স এতিয়া মাত্ৰ ১৯ বছৰ। ইতিমধ্যে তেওঁ আৰক্ষীৰ ওচৰত এই সন্দৰ্ভত এক অভিযোগ দাখিল কৰিছে।
আৰক্ষীয়ে জানিবলৈ দিয়া মতে অভিযুক্ত ব্যক্তিগৰাকীক বিবেক পেটেল বুলি চিনাক্ত কৰা হৈছে। তেওঁ বৰ্তমান পলাতক অৱস্থাত আছে বুলি আৰক্ষীয়ে উল্লেখ কৰিছে।
আৰক্ষীয়ে এই ঘটনাৰ সৈতে জড়িত অভিযুক্ত সকলক আটক কৰাৰ বাবে ইতিমধ্যে এক অনুসন্ধান অভিযান আৰম্ভ কৰিছে বুলি লগতে জানিবলৈ দিছে।