কোনো কৰ্তৃত্বশীল ব্যক্তিৰ ভেশ লৈ ফোনযোগে দাবী-ধমকি বা ভুৱা কথাৰে প্ৰৱঞ্চনা কৰা বহু দৃশ্য হয়তো চিনেমাত দেখিছে। হয়তো কেতিয়াবা এনে ঘটনা সমুখত দেখিছে বা শুনিছে। এনেদৰেই শেহতীয়াকৈ ভুৱা বিধায়কৰ ভেশ ধৰি ৰঙাঘৰৰ আলহী হ’বলগীয়া হৈছে এক দুৰ্বৃত্তই।
এই ঘটনা সংঘটিত হৈছে দক্ষিণ ভাৰতীয় ৰাজ্য কৰ্ণাটকত। কৰ্ণাটকৰ ৰাজ্যিক পথ পৰিবহণ নিগমত এজন চালক-তথা-কণ্ডাক্টৰক কৰ্মৰত ঠাইৰ পৰা আন ঠাইলৈ বদলিৰ বাবে বিধায়কৰ ভেশ লৈ বিভাগীয় উৰ্ধতন কৰ্তৃপক্ষলৈ ফোন কৰি বিপদত পৰিছে এই দুৰ্বৃত্ত।
বিভাগীয় এগৰাকী বিষয়াই সদৰী কৰা অনুসৰি, মাণ্ডিয়া জিলাৰ মালাৱল্লীৰ পুনিথ নামৰ প্ৰৱঞ্চকগৰাকীয়ে ২৮ অক্টোবৰত নিগমৰ পৰিচালনা সঞ্চালক ভি অনবুকুমাৰক ফোন কৰি মাইচুৰুৰ চামাৰাজা সমষ্টিক প্ৰতিনিধিত্ব কৰা বিধায়ক হিচাপে নিজকে চিনাকি দিয়ে।
ৰাজ্যখনৰ শাসকীয় দল বিজেপিৰ বিধায়ক এল নগেন্দ্ৰৰ নাম লৈ পুনিথে বালাৰাজ নামৰ চালক-তথা-কণ্ডাক্টৰগৰাকীক মাণ্ডিয়া ডিপোৰ পৰা মালাৱল্লী ডিপোলৈ বদলি কৰিবলৈ আহ্বান জনায়।
পিছে এম.ডি.-ৰ নিৰ্দেশত বিভাগীয় নিয়ন্ত্ৰকে বিধায়ক নগেন্দ্ৰলৈ ফোন কৰি পূৰ্বৰ ফোনকলৰ সত্যতা পৰীক্ষা কৰে আৰু বিধায়কগৰাকীয়ে অনবুকুমাৰক ফোন কৰা নাছিল বুলি জানিব পাৰে।
লগে লগে ফোনত বদলি কৰিবলৈ কোৱা বালাৰাজ নামৰ কৰ্মচাৰীগৰাকীক মাতি পঠোৱা হয় আৰু তেওঁক জেৰা কৰাৰ পাছতে প্ৰকৃত সত্য ফাদিল হয়। বালাৰাজে তেওঁৰ ট্ৰেন্সফাৰৰ বাবে পুনিথে সহায় কৰাৰ উদ্দেশ্যে বিভাগীয় বিষয়ালৈ ফোন কৰা বুলি স্বীকাৰ কৰে।
বালাৰাজৰ স্বীকাৰোক্তিৰ পিছতে ৰাজ্যিক পথ পৰিবহণ নিগম তাৎক্ষণিকভাৱে আৰক্ষীৰ কাষ চাপে আৰু বিভাগৰ অভিযোগৰ ভিত্তিত প্ৰৱঞ্চক পুনিথক আৰক্ষীয়ে গ্ৰেপ্তাৰ কৰে।