কেন্দ্ৰীয় গৃহমন্ত্ৰী অমিত শ্বাহৰ মহাৰাষ্ট্ৰ ভ্ৰমণৰ সময়ত যোৱা মঙ্গলবাৰে ৰাজ্যখনৰ উপ মুখ্যমন্ত্ৰী দেৱেন্দ্ৰ ফাড়নভিছৰ বাসগৃহ ভ্ৰমণ কৰিছিল। এনে সময়ত গৃহমন্ত্ৰীঘৰাকীৰ নিৰাপত্তা ব্যৱস্থা ভংগ কৰাৰ অভিযোগত গ্ৰেপ্তাৰ হৈছে অন্ধ্ৰপ্ৰদেশৰ এগৰাকী সাংসদৰ ব্যক্তিগত সহায়ক হিচাপে কাৰ্যনিৰ্বাহ কৰা ব্যক্তি।
গৃহমন্ত্ৰী শ্বাহে ফাডনাভিছৰ ঘৰত উপস্থিত হোৱাৰ সময়ত কেন্দ্ৰীয় গৃহ মন্ত্ৰালয়ৰ বিষয়া হিচাপে ছদ্মবেশ ধৰি অভিযুক্ত ব্যক্তিগৰাকীয়ে শ্বাহৰ নিৰাপত্তা বেষ্টনীৰ ওচৰত সন্দেহজনকভাৱে ঘূৰি ফুৰিছিল।
সেই সময়ত হেমন্ত পাৱাৰ নামৰ এই ৩২ বছৰীয়া ব্যক্তিগৰাকীয়ে গৃহ মন্ত্ৰালয়ৰ নিৰ্ধাৰিত ষ্ট্ৰেপ পৰিধান কৰি আছিল। কিন্তু মন্ত্ৰালয়ৰ বিষয়া নোহোৱাৰ বাবে নিয়ম অনুসৰি তেওঁ এই ষ্ট্ৰেপ পৰিধান কৰাৰ বাবে উপযুক্ত নাছিল।
আনহাতে পিছত যেতিয়া মহাৰাষ্ট্ৰ আৰক্ষীয়ে সন্দেহজনকভাৱে ঘূৰি ফুৰা এই ব্যক্তিগৰাকীৰ বিষয়ে জানিব পাৰে, লগে লগে অনুসন্ধান অভিযান আৰম্ভ কৰি তিনি ঘণ্টাৰ ভিতৰতে হেমন্ত পাৱাৰক মহাৰাষ্ট্ৰৰে ধুলে নামৰ নিজৰ গৃহচহৰলৈ যোৱাৰ পথতে আটক কৰে।
আৰক্ষীয়ে জানিবলৈ দিয়া মতে পাৱাৰ অন্ধ্ৰ প্ৰদেশৰ এগৰাকী সাংসদৰ ব্যক্তিগত সহায়ক হিচাপে কাম কৰিছিল। কিন্তু তেওঁ পৰিধান কৰা গৃহ মন্ত্ৰালয়ৰ ষ্ট্ৰেপ অনুমোদিত নাছিল আৰু এয়া ছদ্মবেশৰ সমপৰ্যায়ৰ।
অভিযুক্ত হেমন্ত পাৱাৰে আন মানুহৰ সন্মুখত জ্যেষ্ঠ নেতৃত্বৰ ঘনিষ্ঠ হিচাপে আৰু গৃহ মন্ত্ৰালয়ৰ বাবেও কাম কৰিছিল বুলি দেখুৱাব খোজাৰ বাবেই এনে কাৰ্য কৰিছিল বুলি আৰক্ষীয়ে সন্দেহ প্ৰকাশ কৰিছে।
