মহাৰাষ্ট্ৰৰ লাতুৰত যোৱা নিশা সংঘটিত হৈছে এক নৃশংস কাণ্ড। লাতুৰৰ এজন ব্যক্তিয়ে সোমবাৰে ৰাতিৰ আহাৰত বিৰিয়ানী নৰন্ধাৰ বাবেই খঙতে পত্নীক অকথ্য নিৰ্যাতন চলোৱাৰ লগতে ছুৰিকাঘাত কৰে।
স্বামীৰ এই নৃশংস আক্ৰমণত গুৰুতৰভাৱে আহত হয় মহিলাগৰাকী। প্ৰকাশিত খবৰ অনুসৰি লাতুৰৰ নান্দেদ পথ অঞ্চলৰ কুষ্টদমৰ বিক্ৰম বিনায়ক দেদে নামৰ ব্যক্তিগৰাকীয়ে নিশা নিচাগ্ৰস্ত অৱস্থাত ঘৰত প্ৰৱেশ কৰে।
তাৰ পাছতেই দেদেই ৰাতিৰ আহাৰত বিৰিয়ানি দিবলৈ নিজ পত্নীক ধমকি দিয়ে। কিন্তু তেওঁৰ পত্নীয়ে আহাৰত বিৰিয়ানি ৰন্ধা নাই বুলি জানিবলৈ দিয়াৰ লগে লগে দেদেই পত্নীৰ সৈতে তৰ্কত লিপ্ত হয়।
লাহে লাহে এই বিবাদে উগ্ৰ ৰূপ ধাৰণ কৰে আৰু দেদেই পত্নীক শাৰীৰিকভাৱে আক্ৰমণ কৰে। কিন্তু পৰিয়ালৰ আন সদস্যসকলে হস্তক্ষেপ কৰি দেদেক আঁতৰাই পঠাবলৈ চেষ্টা কৰাৰ পাছতেই নিচাগ্ৰস্ত দেদেই এখন ছুৰি লৈ অতৰ্কিতে পত্নীক উপৰ্যুপৰি আঘাত কৰে।
আক্ৰমণ সংঘটিত কৰিয়ে দেদে নামৰ ব্যক্তিগৰাকী ঘৰৰ পৰা পলায়ন কৰে। এই ভয়াৱহ আক্ৰমণত গুৰুতৰভাৱে আঘাত পোৱা মহিলাগৰাকীক তৎকালীনভাৱে অৱশ্যে চিকিৎসালয়ত ভৰ্তি কৰে পৰিয়ালৰ সদস্যসকলে।
ইফালে ঘটনাৰ সন্দৰ্ভত আৰক্ষীয়ে ইতিমধ্যে পলাতক দেদেক বিচাৰি অনুসন্ধান অভিযান আৰম্ভ কৰিছে যদিও এতিয়ালৈকে তেওঁক গ্ৰেপ্তাৰ কৰিবলৈ সক্ষম হোৱা নাই। বিষয়টোৰ তদন্ত এতিয়াও চলি আছে আছে বুলি স্থানীয় এগৰাকী আৰক্ষী বিষয়াই জানিবলৈ দিয়ে।
