বৰপেটাত মৰানদীৰ বুকুত জপিয়াই আত্মহত্যাৰ চেষ্টা এগৰাকী ব্যক্তিৰ; এছ ডি আৰ এফৰ তীব্ৰ উদ্ধাৰ অভিযান
বৰপেটা জিলাৰ বৰপেটা চহৰৰ বিলৰতাৰীহাটীৰ পৱিত্ৰ দাস (৩৭) নামৰ এগৰাকী ব্যক্তিয়ে সোমবাৰে ৰাতিপুৱা চহৰৰ মাজেৰে বৈ যোৱা মৰানদীৰ বুদৰুটুপ দলঙৰ ওপৰৰ পৰা জপিয়াই আত্মহত্যাৰ চেষ্টা কৰা ঘটনাই সমগ্ৰ চহৰখনত চাঞ্চল্যৰ সৃষ্টি কৰিছে।
বাতৰি সংগ্ৰহ কৰাৰ সময়লৈ ভৰা নদীত জপিয়াই আত্মহত্যাৰ চেষ্টা কৰা ব্যক্তিগৰাকীক বিচাৰি এছ ডি আৰ এফৰ উদ্ধাৰকাৰী বাহিনীয়ে অভিযান চলাই যদিও সন্ধান লাভ কৰিবলৈ সক্ষম নহ’ল। মঙলবাৰে ৰাতিপুৱাৰ পৰা পুনৰ এছ ডি আৰ এফ বাহিনীয়ে উদ্ধাৰ অভিযান আৰম্ভ কৰিব।
উল্লেখযোগ্য যে, কি কাৰণত পৱিত্ৰ দাসে আত্মহত্যাৰ দৰে এনে কঠোৰ সিদ্ধান্ত গ্ৰহণ কৰিলে সেয়া জানিব পৰা হোৱা নাই। পাৰিবাৰিক কন্দল অথবা ব্যৱসায়িক লোকচানৰ বাবেই দাসে আত্মহত্যাৰ সিদ্ধান্ত গ্ৰহণ কৰিলে বুলি স্থানীয় দুই-চাৰিজন লোকে সন্দেহ প্ৰকাশ কৰিছে।
আনহাতে, আত্মহত্যাৰ চেষ্টা চলাই সন্ধানহীন হৈ থকা দাস দুটি সন্তানৰ পিতৃ বুলি খবৰ লাভ কৰা হৈছে। ৰাতিপুৱা ফুৰিবলৈ যোৱাৰ সময়তে ঘটনাটো সংঘটিত হয় বুলি স্থানীয় সূত্ৰৰ পৰা জানিব পৰা গৈছে।