শ্বহীদৰ বিৰুদ্ধে অপমানসূচক মন্তব্য কৰি গ্ৰেপ্তাৰ হোৱা বিধায়ক শ্বেৰমান আলীৰ উদ্ধাৰ অভিযানত নমা কংগ্ৰেছৰ এগৰাকী নেতাক দলৰ পৰা বৰ্খাস্ত কৰা হৈছে।
শ্বেৰমান আলীক কালি আৰক্ষীয়ে গ্ৰেপ্তাৰ কৰাৰ বিৰুদ্ধে মন্দিয়া ব্লক কংগ্ৰেছ কমিটিৰ সাধাৰণ সম্পাদক ৰফিকুল ইছলামে ‘বন্ধ’ আহ্বান কৰিছিল।
কংগ্ৰেছৰ শীৰ্ষ নেতৃত্বৰ অনুমতি অবিহনেই এনেদৰে ‘বন্ধ’ ঘোষণা কৰাত ক্ষুব্ধ হৈ পৰে কংগ্ৰেছ নেতৃত্ব। আজি কংগ্ৰেছে মন্দিয়া ব্লক কংগ্ৰেছ কমিটিৰ সাধাৰণ সম্পাদক ৰফিকুল ইছলামক দলৰ অনুমতি অবিহনে বন্ধৰ সিদ্ধান্ত গ্ৰহণ কৰাৰ বাবে দলৰ পৰা বৰ্খাস্ত কৰে।
কংগ্ৰেছৰ সাধাৰণ সম্পাদক(প্ৰশাসনিক) অপূৰ্ব কুমাৰ ভট্টাচাৰ্যই সংবাদমাধ্যমলৈ প্ৰেৰণ কৰা এক বিবৃতিত এই কথা কোৱা হৈছে।
বিবৃতিটোত ভট্টাচাৰ্যই কৈছে যে ৰফিকুল ইছলামৰ কাৰ্যই দলৰ ভাৱমূৰ্তি হানি কৰিছে।
সেয়ে তেওঁক দলৰ পৰা বৰ্খাস্ত কৰা হৈছে।উল্লেখ্য অসম আন্দোলনৰ শ্বহীদৰ বিৰুদ্ধে অপমানসূচক মন্তব্য কৰাৰ বাবে কংগ্ৰেছৰ বিধায়ক শ্বেৰমান আলীক কালি পাণবজাৰ আৰক্ষীয়ে দিছপুৰৰ বিধায়ক আবাসৰ পৰাই গ্ৰেপ্তাৰ কৰিছিল।
শনিবাৰৰ নিশাটো পানবজাৰ থানাৰ আলহী হৈ থাকে শ্বেৰমান আলী।
তেওঁৰ বিৰুদ্ধে পানবজাৰ থানাত ৫১০/২০২১ নম্বৰত এক গোচৰ ৰুজু হৈছিল। বৰ্তমানলৈকে আৰক্ষীয়ে ধাৰা সমূহ প্ৰকাশ কৰা নাই যদিও ১২৪(এ) ধাৰাত গোচৰ ৰুজু হোৱাৰ সম্ভাৱনা আছে।
যোৱা নিশাটো শ্বেৰমান আলীক পাণবজাৰ থানাতে ৰখাৰ পিছত আজি তেওঁক আদালতত কৰোৱা হয়।
শ্বহীদৰ বিৰুদ্ধে কৰা অপমানসূচক মন্তব্যৰ বাবে শ্বেৰমান আলীক কংগ্ৰেছেও কাৰণ দৰ্শোৱাৰ জাননী জাৰি কৰিছিল।
