দৰং জিলাৰ মঙলদৈ চহৰৰ এগৰাকী উচ্চ শিক্ষিত যুৱকে ফিনলেণ্ডত এক মাৰাথন প্ৰতিযোগিতাত অংশগ্ৰহণ কৰি জিলাখনলৈ গৌৰৱ কঢ়িয়াই আনিছে।
এগৰাকী ২৯ বছৰীয়া চফল ডেকা সাগৰ ৰাই ডেকাই শনিবাৰে ফিনলেণ্ডৰ ৰাজধানী চহৰখনত অনুষ্ঠিত হোৱা ৩৯ সংখ্যক ৪২ কিলোমিটাৰ জোৰা হেলছিংকি চিটি মাৰাথনত অংশগ্ৰহণ কৰে।
হেলছিংকি চিটি মাৰাথনত বিশ্বৰ বিভিন্ন প্ৰান্তৰ ৩০০০ অংশগ্ৰহণকাৰীয়ে যোগদান কৰিছিল। সাগৰে মাৰাথন প্ৰতিযোগিতাখনত অংশগ্ৰহণ কৰি ৩ ঘন্টা ৪৫ মিনিটত সফলতাৰে দৌৰ সম্পন্ন কৰে।
এগৰাকী বিশিষ্ট শিশু সামাজিক কৰ্মী সাগৰৰ মাতৃ উপাসনা ডেকা আৰু এগৰাকী সুপৰিচিত উদ্যোগী পিতৃ মুকুল চন্দ্ৰ ডেকাও পুত্ৰৰ এই দু:সাহসিক অভিযানৰ সময়ত তাত উপস্থিতি আছিল। সাগৰৰ এই কৃতিত্বৰ কথা গৃহ চহৰ মঙলদৈৰ লগতে সমগ্ৰ অসমে তেওঁলোকৰ পৰাই ফোনৰ পৰাই লাভ কৰে।
তেওঁলোকে লগতে জানিবলৈ দিয়ে যে মাত্ৰ ৬০ শতাংশ অংশগ্ৰহণকাৰীয়েহে মাৰাথনটো সম্পূৰ্ণ কৰিবলৈ সক্ষম হয়।
ইয়াৰ পূৰ্বে সাগৰে ৰাছিয়াৰ ছেন্ট পিটাৰ্ছবাৰ্গত অনুষ্ঠিত ৪২ কিলেমিটাৰৰ আন্তৰ্জাতিক এৰ্গো হোৱাইট নাইটছ মাৰাথন আৰু লেহত অনুষ্ঠিত ৪২ কিলোমিটাৰৰ লাডাখ ফুল মাৰাথনত অংশগ্ৰহণ কৰিছিল।
সাগৰ হৈছে এছ আৰ ডি গ্ৰুপ অফ কোম্পানীৰ প্ৰতিষ্ঠাপক প্ৰসিদ্ধ ব্যৱসায়ী সুনন্দৰাম ডেকাৰ নাতিয়েক। মঙলদৈৰ ৰূপকোঁৱৰ জ্যোতিপ্ৰসাদ বিদ্যালয়ৰ পৰা প্ৰাথমিক শিক্ষা সমাপ্ত কৰি সাগৰে গোৱালিয়ৰৰ সিন্দিয়া বিদ্যালয়ৰ পৰা মাধ্যমিক শিক্ষা সম্পূৰ্ণ কৰে আৰু পাছত দিল্লীৰ হিন্দু কলেজৰ পৰা স্নাতক ডিগ্ৰী লাভ কৰে।
তেওঁ লগতে আন তিনিখন আগশাৰীৰ বিশ্ববিদ্যালয় য়ুনিভাৰ্ছিটি অফ আমষ্টাৰডাম, ফ্ৰান্সৰ ই ডি এইচ ই চি বিজনেছ স্কুল আৰু নেদাৰলেণ্ডৰ ৰ’টাৰডাম স্কুল অপ মেনেজমেন্টটো অধ্যয়ন কৰিছিল।
বৰ্তমান তেওঁ পৰিয়ালৰ এছ আৰ ডি গ্ৰুপ অফ কোম্পানীত নিয়োজিত হৈ আছে আৰু জিলাখনৰ লগতে ৰাজ্যখনত আয়োজিত সকলোবোৰ চাইক্লিং তথা মাৰাথন প্ৰতিযোগিতাত নিয়মিতভাৱে অংশগ্ৰহণ কৰি আহিছে।
