নাগৰিকত্ব সংশোধনী আইনক কেন্দ্ৰ কৰি দেশৰ ৰাজধানী দিল্লীত সংঘটিত হিংসাত্মক কাৰ্যত ক্ষতিগ্ৰস্ত লোকসকলৰ সহায়ৰ বাবে ত্ৰিপুৰাত চি পি আই এম দলে পুঁজি সংগ্ৰহৰ কাম আৰম্ভ কৰিছে।
দিল্লীৰ উক্ত হিংসাত্মক কাৰ্যত ৫০ ৰো অধিক লোকে প্ৰাণ হেৰুওৱাৰ লগতে বহু লোক আঘাতপ্ৰাপ্ত হয়। ইয়াৰে কিছু আঘাতপ্ৰাপ্ত লোক এতিয়াও চিকিৎসালয়ত চিকিৎসাধীন হৈ আছে।
এই হিংসাত্মক ঘটনাৰ পিছতেই ক্ষতিগ্ৰস্ত লোকসকলৰ সাহায্যৰ্থে চি পি আই এমে পুঁজি সংগ্ৰহৰ কাৰ্যসূচী গোটেই দেশতে আৰম্ভ কৰিছিল।
এই কাৰ্যসূচী অনুসৰিয়েই সোমবাৰে ত্ৰিপুৰাৰ আগৰতলাৰ ৰাজপথলৈ ওলাই আহে ৰাজ্যখনৰ প্ৰাক্তন মুখ্য মন্ত্ৰী মানিক সৰকাৰৰ লগতে বিভিন্ন নেতা-কৰ্মী।
পুঁজি সংগ্ৰহৰ সময়ত মানিক সৰকাৰে কয়, “পৰিমান ডাঙৰ কথা নহয়, দিল্লীৰ হিংসাত ক্ষতিগ্ৰস্ত লোকসকলৰ কাষত ত্ৰিপুৰাৰ সকলো লোক আছে”।
ইয়াৰ উপৰি দিল্লীৰ হিংসাত্মক কাৰ্যৰ বাবে কেন্দ্ৰীয় চৰকাৰকে জগৰীয়া কৰে প্ৰাক্তন মুখ্য মন্ত্ৰী মানিক সৰকাৰে।
