মণিপুৰত পুনৰ সংঘটিত হৈছে হিংসাত্মক ঘটনা। বুধবাৰে পুৱতি নিশা তামেংলং জিলাত এজন বিদ্যুৎ বিভাগৰ লাইনমেনক গুলীয়াই হত্যা কৰাৰ লগতে কাংপোকপি জিলাৰ দুখন নগা গাঁৱত কমেও ২৪টা ঘৰ জ্বলাই দিয়াৰ অভিযোগ উত্থাপন হৈছে।
আৰক্ষীৰ তথ্য অনুসৰি, তামেই থানাৰ অন্তৰ্গত লাছান গাঁৱত পুৱা প্ৰায় ৪ বজাত এই ঘটনা সংঘটিত হয়। ৩৩ কেভি বিদ্যুৎ সংযোগৰ মেৰামতিৰ কামত নিয়োজিত ৩৬ বছৰীয়া পাওজাংগাম চংলোইক অচিনাক্ত সশস্ত্ৰ লোকৰ এটা দলে গুলীয়াই হত্যা কৰে। মৃত চংলোই ৱাকটফাই গাঁৱৰ বাসিন্দা আছিল।
ঘটনাৰ পিছতে ৱাকটফাই গাঁও কৰ্তৃপক্ষৰ এগৰাকী বিষয়াই হত্যাকাণ্ডৰ তদন্ত আৰু গোচৰ ৰুজুৰ বাবে আৰক্ষীৰ কাষ চাপে। অভিযোগত NSCN-IMৰ কেডাৰ আৰু লাংকা গাঁৱৰ একাংশ লোকৰ নাম উল্লেখ কৰা হৈছে যদিও এই অভিযোগ এতিয়াও নিশ্চিত হোৱা নাই।
ইয়াৰ কেইঘণ্টামান পিছতে পুৱা প্ৰায় ৫ বজাত কাংপোকপি জিলাৰ চাওলা থানাৰ অন্তৰ্গত মাকুই খুমান আৰু মাকুই থানাম্বা/চামৰুইউইউ নামৰ দুখন নগা গাঁৱত আক্ৰমণ আৰু অগ্নিসংযোগৰ ঘটনা সংঘটিত হয়। দুয়োখন গাঁৱত প্ৰায় ১২টাকৈ পৰিয়াল আছিল বুলি জানিব পৰা গৈছে।
স্থানীয় বাসিন্দাৰ মতে, আক্ৰমণকাৰীয়ে দুয়োখন গাঁৱৰ ঘৰসমূহত জুই লগাই দিয়ে। পিছত গাঁওবাসী উভতি আহি মুঠ ২৪টা ঘৰ ভস্মীভূত হোৱা দেখা পায়। সংঘাতৰ পৰিপ্ৰেক্ষিতত গাঁও দুখনৰ বাসিন্দাসকল ইতিমধ্যে স্থানান্তৰিত হৈ প্ৰায় ১২ কিলোমিটাৰ দূৰৰ মাকুই খুনজাওত আশ্ৰয় লৈ আছিল।
আৰক্ষীয়ে জনোৱা মতে, ঘটনাস্থলীত তৎকালীনভাৱে উপস্থিত হ’ব পৰা নাছিল তেওঁলোক। সেয়ে কাংপোকপি আৰক্ষীক ঘটনাস্থলী পৰিদৰ্শন কৰি তদন্ত আৰু আইনী ব্যৱস্থা গ্ৰহণ কৰিবলৈ অনুৰোধ কৰা হৈছে।
এই ঘটনাৰ কিছুদিন পূৰ্বে তামেই অঞ্চলত ১৭ বছৰীয়া এগৰাকী নগা কিশোৰো অচিনাক্ত লোকৰ আক্ৰমণত নিহত হৈছিল। সাম্প্ৰতিক ঘটনাক কেন্দ্ৰ কৰি তামেংলং, কাংপোকপি আৰু ইয়াৰ আশে-পাশে থকা পাহাৰীয়া অঞ্চলত নগা-কুকি সম্প্ৰদায়ৰ মাজৰ উত্তেজনা পুনৰ বৃদ্ধি পোৱাৰ আশংকা কৰা হৈছে।
